રાજસ્થાનમાં ઇથેનોલ પ્લાન્ટ વિરોધ ઉગ્ર: પોલીસ-ખેડૂત અથડામણ
રાજસ્થાનના હનુમાનગઢ જિલ્લાના રાઠી ખેડા ગામમાં ઇથેનોલ પ્લાન્ટ સ્થાપવાના વિરોધમાં ગ્રામજનો અને ખેડૂતોનું પ્રદર્શન બુધવારે હિંસક બન્યું હતું. પરિસ્થિતિને કાબૂમાં લેવા માટે વહીવટીતંત્ર દ્વારા સમગ્ર વિસ્તારમાં કલમ 144 લાગુ કરવામાં આવી છે, ઇન્ટરનેટ સેવાઓ સ્થગિત કરવામાં આવી છે અને શાળાઓ તેમજ દુકાનો બંધ રાખવાનો આદેશ આપવામાં આવ્યો છે.
બગડેલી પરિસ્થિતિ અને પોલીસ કાર્યવાહી :&nbsp;
લગભગ ₹450 કરોડના ખર્ચે નિર્માણાધીન આ પ્લાન્ટના વિરોધમાં ખેડૂતોએ ટ્રેક્ટર વડે પ્લાન્ટની નિર્માણાધીન દીવાલ તોડી પાડતા મામલો ગરમાયો હતો. ખેડૂતો ઉશ્કેરાઈ જતાં પોલીસે લાઠીચાર્જ કર્યો હતો, જેના પગલે અથડામણ થઈ હતી.
અથડામણ દરમિયાન એક ડઝનથી વધુ લોકો ઘાયલ થયા હોવાના અહેવાલ છે. ઉશ્કેરાયેલા ખેડૂતોએ પોલીસકર્મીઓ અને વહીવટીતંત્રના વાહનોને આગ ચાંપી દીધી હતી અને પથ્થરમારો પણ કર્યો હતો. જવાબમાં, પોલીસે પરિસ્થિતિને નિયંત્રિત કરવા માટે આંસુ ગેસના ગોળા છોડવા પડ્યા હતા.
આ હિંસક ઘટનામાં કોંગ્રેસના ધારાસભ્ય અભિમન્યુ પુનિયા પણ ઘાયલ થયા હતા અને તેમને હનુમાનગઢ જિલ્લા હોસ્પિટલમાં દાખલ કરવામાં આવ્યા છે.
ખેડૂતોનું વિરોધ કરવાનું કારણ :&nbsp;
ખેડૂતોનો મુખ્ય વિરોધ પ્લાન્ટથી થનારા સંભવિત પ્રદૂષણને લઈને છે. તેમનો આરોપ છે કે ઇથેનોલ પ્લાન્ટની સ્થાપનાથી આ વિસ્તારમાં પ્રદૂષણ ફેલાશે, જે પર્યાવરણ અને સ્થાનિક રહેવાસીઓના સ્વાસ્થ્ય માટે ગંભીર જોખમ ઊભું કરશે.
પ્રશાસને ટિબ્બી અને આસપાસના વિસ્તારોમાં હિંસા વધુ ન ફેલાય તે માટે ભારે પોલીસ બંદોબસ્ત ગોઠવી દીધો છે.
&nbsp;
&nbsp;

હનુમાનગઢ ઇથેનોલ વિરોધ

ખેડૂતો અને પોલીસ વચ્ચે અથડામણ; ઈન્ટરનેટ સેવાઓ સ્થગિત, કલમ 144 લાગુ

December 11, 2025 | 16:07 IST