8 ફેબ્રુઆરીએ Delhi વિધાનસભા ચૂંટણીની મતગણતરી, CAPF ની 38 કંપનીઓ તૈનાત

દિલ્હીમાં 70 વિધાનસભા બેઠકો માટે મત ગણતરી 8 ફેબ્રુઆરીએ થશે. આ માટેની તમામ તૈયારીઓ પૂર્ણ કરી લેવામાં આવી છે. દિલ્હી પોલીસના સ્પેશિયલ સીપી (SPNO) દેવેશ ચંદ્ર શ્રીવાસ્તવે શુક્રવારે જણાવ્યું હતું કે રાજધાનીમાં મતગણતરી 19 મતગણતરી કેન્દ્રો પર થશે. આ તમામ મતગણતરી કેન્દ્રો પર બહુસ્તરીય સુરક્ષા ઘેરો ગોઠવવામાં આવ્યો છે. પોલીસ અધિકારીએ જણાવ્યું હતું કે, અર્ધલશ્કરી દળના જવાનો સ્ટ્રોંગ રૂમ સહિત, મત ગણતરી સ્થળની સુરક્ષા પૂરી પાડશે. આ માટે, દરેક મતગણતરી કેન્દ્ર પર CAPF ની બે કંપનીઓ તૈનાત કરવામાં આવશે. દિલ્હીના મતગણતરી કેન્દ્રો પર CAPF ની કુલ 38 કંપનીઓ તૈનાત કરવામાં આવી છે.

અમારો ઉદ્દેશ્ય મુક્ત અને ન્યાયી મતગણતરી કરાવવાનો છે : પોલીસ

શ્રીવાસ્તવે જણાવ્યું હતું કે, દરેક મતગણતરી કેન્દ્રની સુરક્ષાની જવાબદારી એડિશનલ DCP સ્તરના અધિકારીની રહેશે. દરેક કેન્દ્ર પર, મત ગણતરી સ્થળથી લગભગ 100 મીટરના અંતરે બેરિકેડિંગ હશે. મત ગણતરી નિરીક્ષકો અને મત ગણતરીમાં રોકાયેલા અન્ય કર્મચારીઓને તપાસ કર્યા પછી જ અંદર જવા દેવામાં આવશે. કોઈને પણ અંદર મોબાઈલ ફોન લાવવાની મંજૂરી આપવામાં આવશે નહીં. તેમણે કહ્યું કે અમારો ઉદ્દેશ્ય સ્વતંત્ર, ન્યાયી અને શાંતિપૂર્ણ રીતે મત ગણતરી કરાવવાનો છે. લોકોને મેટલ ડિટેક્ટરમાંથી પસાર થવું પડશે.

આચારસંહિતા ભંગના 1,100 કેસ નોંધાયા...

દિલ્હી પોલીસે આદર્શ આચાર સંહિતા (MCC) ના કથિત ઉલ્લંઘન માટે 1,100 કેસ નોંધ્યા છે અને આ કેસોના સંદર્ભમાં 35,000 થી વધુ લોકોની ધરપકડ અથવા અટકાયત કરવામાં આવી છે. દિલ્હીમાં આદર્શ આચારસંહિતા લાગુ થયા પછી, 7 જાન્યુઆરીથી 6 ફેબ્રુઆરી દરમિયાન તમામ કેસ નોંધાયા હતા. સત્તાવાર નિવેદન અનુસાર, આદર્શ આચારસંહિતાનું ઉલ્લંઘન કરવા બદલ કુલ 35,516 લોકોની ધરપકડ કરવામાં આવી હતી અથવા અટકાયતમાં લેવામાં આવ્યા હતા.

538 કારતૂસ જપ્ત...

નિવેદનમાં જણાવાયું છે કે, પોલીસે 477 ગેરકાયદેસર હથિયારો અને 538 કારતૂસ જપ્ત કર્યા છે. નિવેદનમાં કહેવામાં આવ્યું છે કે, આર્મ્સ એક્ટ હેઠળ 499 લોકોની ધરપકડ કરવામાં આવી હતી. પોલીસે 1,15,103 લિટર દારૂ જપ્ત કર્યો અને 11,426 લોકોની ધરપકડ કરી. પોલીસે 77.9 કરોડ રૂપિયાથી વધુ કિંમતના 206. 712 કિલોગ્રામ માદક દ્રવ્યો અને 1,200 થી વધુ પ્રતિબંધિત ઇન્જેક્શન જપ્ત કર્યા છે અને આ સંબંધમાં અત્યાર સુધીમાં 179 લોકોની ધરપકડ કરવામાં આવી છે.

11.70 કરોડ રૂપિયાની રોકડ જપ્ત...

નિવેદનમાં જણાવાયું છે કે, કાયદા અમલીકરણ એજન્સીઓએ 11.70 કરોડ રૂપિયા રોકડા અને 37.39 કિલો ચાંદી પણ જપ્ત કરી છે. દિલ્હીની તમામ 70 વિધાનસભા બેઠકો માટે બુધવારે મતદાન થયું હતું અને મતગણતરી શનિવારે થશે.