Kashmir માં CRPF વાહન ખાઈમાં ખાબક્યું, નવ જવાન ઘાયલ, બેની હાલત ગંભીર

મધ્ય કાશ્મીરના બડગામ જિલ્લાના ખાનસાહિબ તાલુકાના દૂધપથરીના તંગનાર વિસ્તારમાં એક અણધારી ઘટના બની હતી. CRPF નું એક વાહન, જેનો રજિસ્ટ્રેશન નંબર હજી સુધી જાણી શકાયો નથી તે રસ્તા પરથી લપસીને એક ઊંડી ખાઈમાં ખાબક્યું. આ દુર્ઘટનામાં સ્પેશિયલ QAT સાઉથ શ્રીનગર રેન્જના નવ જવાનો ઘાયલ થયા છે, જેમાંથી બેની હાલત ગંભીર હોવાનું જાણવા મળ્યું છે. તમામ ઘાયલોને તાત્કાલિક શ્રીનગરના આર્મી બેઝ હોસ્પિટલમાં ખસેડવામાં આવ્યા છે.

અધિકારીઓએ આપેલી માહિતી મુજબ, મંગળવારના રોજ મધ્ય કાશ્મીરના બડગામ જિલ્લાના ખાનસાહિબ તાલુકાના દૂધપથરીના તંગનાર વિસ્તારમાં CRPF નું એક વાહન નિયંત્રણ ગુમાવી બેઠું અને સીધું જ ઊંડી ખાઈમાં જઈ પડ્યું. તેમણે જણાવ્યું કે, વાહન અચાનક અસંતુલિત થઈ ગયું અને રસ્તા પરથી સરકીને ખાઈમાં ગબડી ગયું. એક અધિકારીએ આ ઘટના વિશે માહિતી આપતાં જણાવ્યું કે, "આ દુર્ઘટનામાં CRPF ના ઘણા જવાનો ઘાયલ થયા છે." તેમણે ઉમેર્યું કે, ઘટના બન્યાની તુરંત જ બચાવ કાર્ય શરૂ કરી દેવામાં આવ્યું હતું. જો કે, ઘાયલ જવાનોની ચોક્કસ સંખ્યા અને તેમની હાલત વિશે હજુ સુધી ચોક્કસ માહિતી મળી શકી નથી. આ કષ્ટદાયક ઘટનાને પગલે વિસ્તારમાં ચિંતાનો માહોલ છવાયો છે.