જમ્મુ-કાશ્મીરના ડોડા અને કિશ્તવાડ જિલ્લામાં વાદળ ફાટવાની ઘટનાને કારણે ભારે વિનાશ સર્જાયો છે. ડોડાના થાથરી સબ-ડિવિઝનમાં વાદળ ફાટવાથી પહાડો પરથી અચાનક આવેલા પૂરમાં 10થી વધુ મકાનો અને અનેક પુલો તણાઈ ગયા છે. છેલ્લા 24 કલાકમાં ડોડા જિલ્લાના ભલેશા, થાથરી અને મરમત વિસ્તારોમાં કુલ 4 લોકોના મોત થયા છે.
અધિકારીઓના જણાવ્યા મુજબ, 2 લોકોના મોત ઘર ધરાશાયી થવાથી થયા જ્યારે અન્ય 2 પૂરના કારણે મૃત્યુ પામ્યા છે. આ ભારે વરસાદ અને પૂરની સ્થિતિને કારણે જમ્મુ-કાશ્મીરમાં વૈષ્ણોદેવી યાત્રાને પણ રોકવામાં આવી છે. વાહનોની અવર-જવર ખોરવાઈ ન જાય તે માટે બટોટે-કિશ્તવાડ નેશનલ હાઈવે (NH-244) બંધ કરવામાં આવ્યો છે.
હાલમાં, અસરગ્રસ્ત વિસ્તારોમાં રાહત અને બચાવ કાર્ય પુરજોશમાં ચાલી રહ્યું છે અને જિલ્લા વહીવટીતંત્ર તેમજ ડિઝાસ્ટર રિસ્પોન્સ ટીમ સંપૂર્ણપણે એલર્ટ પર છે. આ પહેલા 14 ઓગસ્ટના રોજ કિશ્તવાડના ચાસોટી ગામમાં પણ વાદળ ફાટવાની ઘટના બની હતી, જેમાં 65 લોકોના મોત થયા હતા અને 200 લોકો હજુ પણ ગુમ છે. તે સમયે મચૈલ માતા યાત્રા માટે આવેલા શ્રદ્ધાળુઓ, તેમની બસો અને કેમ્પ તણાઈ ગયા હતા.

જમ્મુ-કાશ્મીરના ડોડા અને કિશ્તવાડમાં વાદળ ફાટ્યું

જમ્મુ-કાશ્મીરના ડોડા અને કિશ્તવાડમાં વાદળ ફાટવાથી પૂર આવ્યું, જેમાં 4ના મોત થયા

August 26, 2025 | 20:42 IST