China અને America ના સંબંધોમાં તણાવ, નવા ટેરિફ અને ગુગલની તપાસ

અમેરિકાના રાષ્ટ્રપતિ ડોનાલ્ડ ટ્રમ્પ દ્વારા શરૂ કરાયેલું વેપાર યુદ્ધ અટકવાના કોઈ સંકેત દેખાઈ રહ્યું નથી. હવે ચીને અમેરિકા પર ટેરિફ લાદવાની જાહેરાત કરીને બદલો લીધો છે. ચીનના વાણિજ્ય મંત્રાલયે મંગળવારે જાહેરાત કરી હતી કે તે અમેરિકા સામે અનેક ઉત્પાદનો પર બદલો લેવા માટે ટેરિફ લાદી રહ્યું છે. તેણે અમેરિકન સર્ચ એન્જિન 'ગુગલ' ની તપાસ સહિત અન્ય વેપાર સંબંધિત પગલાંની પણ જાહેરાત કરી છે. સરકારે કહ્યું કે, તે કોલસા અને લિક્વિફાઇડ નેચરલ ગેસ (LNG) ઉત્પાદનો પર 15 ટકા ડ્યુટી લાદશે. ઉપરાંત, ક્રૂડ ઓઇલ, કૃષિ મશીનરી અને મોટી કારો પર 10 ટકા ડ્યુટી લાદવામાં આવશે. નિવેદનમાં કહેવામાં આવ્યું છે કે અમેરિકાનો એકપક્ષીય ટેરિફ વધારો વિશ્વ વેપાર સંગઠનના નિયમોનું ગંભીર ઉલ્લંઘન છે. આનાથી તેની પોતાની સમસ્યાઓ ઉકેલવામાં મદદ મળશે નહીં, પરંતુ ચીન અને અમેરિકા વચ્ચેના સામાન્ય આર્થિક અને વેપાર સહયોગને નુકસાન થશે.

અમેરિકાએ 10 ટકા ડ્યુટી લગાવી હતી...

અમેરિકાના રાષ્ટ્રપતિ ડોનાલ્ડ ટ્રમ્પ દ્વારા ચીન પર લાદવામાં આવેલા 10 ટકા ટેરિફ મંગળવારથી અમલમાં આવ્યો છે. જોકે, ટ્રમ્પ આગામી થોડા દિવસોમાં ચીનના રાષ્ટ્રપતિ શી જિનપિંગ સાથે વાતચીત કરવાની યોજના ધરાવે છે. અમેરિકાના રાષ્ટ્રપતિ ડોનાલ્ડ ટ્રમ્પે શનિવારે મેક્સિકો, કેનેડા અને ચીનથી આયાત થતી વસ્તુઓ પર કડક ટેરિફ લાદવાના આદેશ પર હસ્તાક્ષર કર્યા. તેમણે દાવો કર્યો હતો કે, "અમેરિકનોના રક્ષણ માટે" ટેરિફ જરૂરી હતા. જોકે, કેનેડાના PM જસ્ટિન ટ્રુડો અને મેક્સીકન રાષ્ટ્રપતિ ક્લાઉડિયા શેનબૌમ સાથે અલગ-અલગ વાટાઘાટોમાં, ટ્રમ્પે ઓછામાં ઓછા એક મહિના માટે બંને દેશો પર ટેરિફનો અમલ રોકવા સંમતિ આપી હતી. 

ચીન ગુગલની તપાસ કરી રહ્યું છે...

દરમિયાન, ચીનના સ્ટેટ એડમિનિસ્ટ્રેશન ફોર માર્કેટ રેગ્યુલેશને મંગળવારે જણાવ્યું હતું કે તે ગૂગલ પર એન્ટિટ્રસ્ટ કાયદાઓનું ઉલ્લંઘન કરવાની શંકાના આધારે તપાસ કરી રહ્યું છે. જોકે કોઈ ટેરિફનો ખાસ ઉલ્લેખ કરવામાં આવ્યો ન હતો, ટ્રમ્પ દ્વારા 10 ટકા ટેરિફ લાદ્યાના થોડી મિનિટો પછી જ આ જાહેરાત કરવામાં આવી.