મિડ-ડે મીલ (મધ્યાહ્ન ભોજન) યોજનાની ગુણવત્તા પર ફરી એકવાર ગંભીર સવાલ ઊભો થયો છે. કર્ણાટકના કોપ્પલ તાલુકામાં આવેલી ઓલ્ડ નિગનપુરા સરકારી સ્કૂલમાં બાળકોને પીરસવામાં આવેલા ગરમ ભોજન, ખાસ કરીને ભાતમાં, જીવાત (Worms) મળી આવતા મોટો હોબાળો મચી ગયો છે. બાળકોએ રાંધેલા જીવાતવાળું ભોજન જોતાં જ ગભરાઈ ગયા હતા અને તાત્કાલિક સ્ટાફ તથા વાલીઓને આ ઘટનાની જાણ કરી હતી.
આ સમગ્ર ઘટનાનો વીડિયો સોશિયલ મીડિયા પર વાયરલ થઈ રહ્યો છે, જેમાં ભોજનમાં પડેલી જીવાત સ્પષ્ટપણે જોઈ શકાય છે. ચોંકી ઉઠેલા વિદ્યાર્થીઓએ તરત જ જીવાતવાળા ભાત ફેંકી દીધા હતા અને ઉચ્ચ અધિકારીઓને આ બાબતે ધ્યાન દોર્યું હતું.
વાલીઓએ બેદરકારીનો આક્ષેપ કર્યો
ઘટના બાદ વાલીઓએ શાળા સ્ટાફ સામે ગંભીર આરોપો લગાવ્યા હતા. તેમનો આક્ષેપ છે કે, જે સ્ટાફ પર ચોખાની ગુણવત્તા તપાસવાની જવાબદારી છે, તે પોતાનું કામ યોગ્ય રીતે કરતો નથી. વાલીઓએ આશંકા વ્યક્ત કરી કે ચોખા લાંબા સમયથી ગોડાઉનના કોઈ ખૂણામાં સંગ્રહાયેલા પડ્યા હશે અને તેને યોગ્ય રીતે સાફ કર્યા વિના જ રસોઈ માટે ઉપયોગમાં લેવામાં આવ્યા. જેના કારણે રાંધેલા ભોજનમાં જીવાત નીકળી હતી અને શક્ય છે કે બાળકોએ અજાણતાં જીવાત સાથેનું ભોજન લીધું પણ હોય.
આ મામલે શાળા વિકાસ સમિતિના અધ્યક્ષ હનુમંતપ્પા હટ્ટીએ સ્વીકાર્યું કે આ બાબત તેમના ધ્યાનમાં આવી છે. તેમણે રસોઈયાઓને સલાહ આપી હતી કે રાંધતા પહેલાં અનાજને સારી રીતે ધોઈ લેવું જોઈએ અને જો તેમાં જીવાત દેખાય તો તરત જ અધિકારીઓને જાણ કરવી જોઈએ. જોકે, તેમણે સાથે જ જણાવ્યું કે ચોખાનો જથ્થો અક્ષરા દાસોહા યોજનાના અધિકારીઓ દ્વારા વહેંચવામાં આવે છે, જે લાંબા સમયથી સ્ટોકમાં પડેલો હોય છે, જેના કારણે બાળકોને આવું ભોજન લેવાની ફરજ પડે છે.
હનુમંતપ્પા હટ્ટીએ આખી પરિસ્થિતિની યોગ્ય તપાસની માંગણી કરી હતી અને જિલ્લા વહીવટી તંત્રને આ બાબતે ગંભીરતાથી પગલાં લેવા માટે અપીલ કરી હતી.

મિડ ડે મિલમાં જીવાતવાળા ભાત

કોપ્પલની સરકારી સ્કૂલમાં બાળકોના ભોજનમાં જીવાત મળતા બાળકોના સ્વાસ્થ્ય સાથે ગંભીર ચેડા..

December 16, 2025 | 20:31 IST