પેસેન્જર ટ્રેન-માલગાડી વચ્ચે ટક્કરમાં અનેકના મોત

છત્તીસગઢના બિલાસપુર જિલ્લામાં મંગળવારે સાંજે લગભગ 4 વાગ્યે એક મોટો રેલ અકસ્માત થયો હતો. કોરબા પેસેન્જર ટ્રેન એક જ ટ્રેક પર સામેથી આવી રહેલી માલગાડી સાથે અથડાઈ હતી. આ અકસ્માત એટલો ભયંકર હતો કે મુસાફરો ભયભીત થઈ ગયા હતા અને ઘટનાસ્થળે હાજર અધિકારીઓમાં મૃત્યુઆંક અંગે વિસંગતતા જોવા મળી રહી હતી. જોકે, પ્રાથમિક અહેવાલો મુજબ, આ દુર્ઘટનામાં 5થી વધુ લોકોના મોત થયા છે અને 12થી વધુ લોકો ઈજાગ્રસ્ત થયા છે. કલેક્ટર સંજય અગ્રવાલે 4 મુસાફરોના મૃત્યુની પુષ્ટિ કરી છે, જ્યારે SP રજનીશ સિંહે એકનું મોત થયાનું જણાવ્યું છે. દક્ષિણ પૂર્વ મધ્ય રેલવે એ જણાવ્યું છે કે, ટક્કરના કારણે ઓવરહેડ વાયર અને સિગ્નલ સિસ્ટમને ભારે નુકસાન પહોંચ્યું છે.

ત્વરિત બચાવ કામગીરી અને સ્થળ પર અધિકારી

અકસ્માતની માહિતી મળતાં જ રેલવે અને સ્થાનિક વહીવટીતંત્રની ટીમ તાત્કાલિક ઘટનાસ્થળે દોડી ગઈ હતી અને બચાવ કામગીરી શરૂ કરી હતી. SP રજનીશ સિંહ અને કલેક્ટર સંજય અગ્રવાલ પણ સ્થળ પર પહોંચી ગયા હતા. બચાવ ટીમે ઘણા મુસાફરોને બચાવ્યા છે, જ્યારે ગંભીર રીતે ઈજાગ્રસ્ત થયેલા લોકોને ટ્રેનની અંદર જ સારવાર આપવામાં આવી રહી છે અથવા નજીકની હોસ્પિટલોમાં મોકલવામાં આવ્યા છે. એક બાળકને પણ સુરક્ષિત રીતે બહાર કાઢવામાં આવ્યું હતું. રેલવે વહીવટીતંત્રે તાત્કાલિક તબીબી એકમો અને વિભાગીય અધિકારીઓને ઘટનાસ્થળે મોકલ્યા હતા જેથી તાત્કાલિક સહાય અને સંકલન સુનિશ્ચિત કરી શકાય.

અનેક ટ્રેનો રદ્દ અથવા ડાયવર્ટ

ભયંકર ટક્કરના કારણે સમગ્ર રેલવે રૂટ પર ટ્રેનનું સંચાલન તાત્કાલિક ધોરણે અટકાવી દેવામાં આવ્યું છે. ઓવરહેડ વાયર અને સિગ્નલ સિસ્ટમને થયેલા ગંભીર નુકસાનને કારણે ઘણી એક્સપ્રેસ અને પેસેન્જર ટ્રેનો રદ્દ કરવામાં આવી છે અથવા અન્ય રૂટ પર ડાયવર્ટ કરવામાં આવી છે. રેલવે દ્વારા જણાવાયું છે કે, આ અકસ્માતના કારણોની તપાસ માટે એક ટીમ બનાવવામાં આવી છે અને ટેકનિકલ નિષ્ણાતો ઘટનાસ્થળે હાજર છે. રેલવે પ્રશાસને મુસાફરોને અપીલ કરી છે કે, તેઓ અફવાઓ પર વિશ્વાસ ન કરે અને ફક્ત સત્તાવાર માહિતી પર જ ભરોસો રાખે. આ સ્થિતિ સામાન્ય કરવા માટે સતત પ્રયાસો ચાલુ છે.

ઈમરજન્સી હેલ્પલાઈન નંબરો

રેલ્વે વહીવટીતંત્રએ મુસાફરો અને તેમના પરિવારો માટે જરૂરી માહિતી મેળવવા માટે ઇમરજન્સી હેલ્પલાઈન નંબરો જાહેર કર્યા છે:

બિલાસપુર: 7777857335, 7869953330

ચંપા: 8085956528

રાયગઢ: 9752485600

પેન્દ્ર રોડ: 8294730162

કોરબા: 7869953330