ભાજપ નેતા સહિત 3 લોકોને કારમાં જીવતા સળગાવ્યા

Chhattisgarh Koriya Sand Mining Dispute: છત્તીસગઢના કોરિયા જિલ્લામાં રેતી ખનન (સેન્ડ માઇનિંગ) વ્યવસાયની જૂની અદાવતમાં એક અત્યંત લોહીયાળ અને ભયાનક ખેલ ખેલાયો છે. રેત ખનન માફિયાઓના બે જૂથો વચ્ચે મોડી રાત્રે થયેલી હિંસક અથડામણમાં ભારતીય જનતા પાર્ટી (BJP) ના વરિષ્ઠ નેતા ભરત સિંહ સહિત ત્રણ લોકોને ફોર્ચ્યુનર કારની અંદર જીવતા સળગાવીને મોતને ઘાટ ઉતારી દેવામાં આવ્યા છે. આ ઘાતકી હુમલામાં અન્ય બે લોકો ગંભીર રીતે ઘાયલ થયા છે, જેમને ગંભીર હાલતમાં હોસ્પિટલમાં દાખલ કરવામાં આવ્યા છે. પોલીસે આ મામલે હત્યા અને રમખાણ સહિતની કલમો હેઠળ FIR નોંધીને અત્યાર સુધીમાં 4 મુખ્ય આરોપીઓની ધરપકડ કરી લીધી છે. આ ઘટનાને પગલે સમગ્ર રાજ્યના રાજકારણમાં ભારે ગરમાવો આવી ગયો છે.

સમાધાનના બહાને બોલાવી ટીપર ટ્રકથી ફોર્ચ્યુનરને ઉડાવી
છત્તીસગઢ પોલીસના વરિષ્ઠ અધિકારીઓએ ઘટના અંગે સત્તાવાર માહિતી આપતા જણાવ્યું કે, કોરિયા જિલ્લાની સોનહત તહસીલ હેઠળ આવતા કટગોડી ગામમાં મંગળવારે રાત્રે ખનન વહીવટને લઈ વિવાદ વકર્યો હતો. પ્રાથમિક તપાસ મુજબ, પીડિત પક્ષના કેટલાક લોકો ટોયોટા ફોર્ચ્યુનર SUV અને સ્કોડા સેડાન કારમાં સવાર થઈને જઈ રહ્યા હતા. તે દરમિયાન વિરોધી જૂથના હુમલાખોરોએ પૂર્વયોજિત કાવતરાના ભાગરૂપે એક ભારે ભરખમ ટીપર ટ્રક વડે ફોર્ચ્યુનર કારને એક પછી એક એમ અનેક વખત જોરદાર ટક્કર મારી હતી. ટ્રકની ભયાનક ટક્કરના કારણે ફોર્ચ્યુનર કાર સંપૂર્ણપણે ક્ષતિગ્રસ્ત થઈ ગઈ હતી અને તેના તમામ દરવાજા જામ થઈ ગયા હતા. દરવાજા લોક થઈ જવાના કારણે કારની અંદર બેઠેલા લોકો બહાર નીકળી શક્યા નહોતા અને જોતજોતામાં આખી કાર ભડભડ સળગવા લાગી હતી.

બારી તોડી બહાર નીકળવાનો પ્રયાસ કરનારા પર પણ હુમલો
પ્રત્યક્ષદર્શીઓએ પોલીસ સમક્ષ આપેલા નિવેદનમાં ચોંકાવનારો દાવો કર્યો છે કે, જ્યારે સળગતી કારની અંદરથી લોકો કાચ અને બારીઓ તોડીને જીવ બચાવવા બહાર નીકળવાનો પ્રયાસ કરી રહ્યા હતા, ત્યારે બહાર હથિયારો સાથે ઉભેલા હુમલાખોરો તેમના પર પણ નિર્દયતાથી તૂટી પડ્યા હતા. કાળઝાળ આગની લપેટમાં આવી જવાથી કારમાં સવાર ભાજપ નેતા ભરત સિંહ (60) નું ઘટનાસ્થળે જ જીવતા સળગી જવાથી કરુણ મોત નીપજ્યું હતું. આ ઉપરાંત, હુમલાખોરોએ પાછળ આવી રહેલી સ્કોડા કારને પણ નિશાન બનાવી હતી. સ્કોડામાં સવાર વીરેન્દ્ર પ્રતાપ સિંહ (32) પર તીક્ષ્ણ હથિયારો વડે ઘાતકી હુમલો કરાયો હતો, જેમણે અંબિકાપુર હોસ્પિટલમાં સારવાર દરમિયાન દમ તોડ્યો હતો. જ્યારે ફોર્ચ્યુનરમાં સવાર અન્ય એક વ્યક્તિ નાગેન્દ્ર સિંહ (53) અંદાજે 80 ટકા જેટલા ગંભીર રીતે દાઝી ગયા હતા, જેમનું વધુ સારવાર અર્થે રાયપુર લઈ જતી વખતે રસ્તામાં જ મોત નીપજ્યું હતું. હાલ અન્ય બે ઘાયલો રાયપુરની હોસ્પિટલમાં જીવન-મરણ વચ્ચે ઝોલા ખાઈ રહ્યા છે.

રેતી ખનન અને પથ્થર ક્વોરી વ્યવસાયની વર્ષો જૂની કૌટુંબિક અદાવત
પોલીસના જણાવ્યા અનુસાર, આ ભયાનક હિંસા પાછળ રેતી ખનન અને ક્રશર વ્યવસાયને લઈને ભરત સિંહ અને મનોજ ત્રિપાઠીના પરિવારો વચ્ચે લાંબા સમયથી ચાલી આવતી કટ્ટર અદાવત જવાબદાર છે. આ બંને પરિવારો મૂળભૂત રીતે કટગોડી ગામને અડીને આવેલા નગોઈ ગામના વતની છે. ભરત સિંહનો પરિવાર હાલ બૈકુંઠપુરમાં સ્થાયી થયો હતો, પરંતુ કટગોડી વિસ્તારમાં તેમનો રેતી ખનન અને પથ્થર તોડવાનો મોટો વ્યવસાય ધમધમતો હતો. મંગળવારે મોડી રાત્રે બંને જૂથો વચ્ચે ફોન પર ઉગ્ર બોલાચાલી થઈ હતી અને ત્યારબાદ સમાધાનના બહાને ભરત સિંહ પોતાના સાથીઓ સાથે કટગોડી ખાતે વિરોધી જૂથને મળવા ગયા હતા, જ્યાં ઘાત લગાવીને બેઠેલા 25 થી 30 લોકોના ટોળાએ તેમના પર હુમલો કરી દીધો હતો.

પેટ્રોલ છાંટ્યું કે શોર્ટ સર્કિટ? ફોરેન્સિક તપાસ અને CBI તપાસની માંગ
સ્થાનિક લોકો અને ક્ષત્રિય સમુદાયના અગ્રણીઓનો આરોપ છે કે હુમલાખોરો અગાઉથી જ પેટ્રોલ લઈને આવ્યા હતા અને તેમણે ફોર્ચ્યુનર પર પેટ્રોલ છાંટીને તેને સળગાવી દીધી હતી. જો કે, પોલીસ હજુ આ બાબતની સત્તાવાર પુષ્ટિ કરી રહી નથી, કારણ કે ટક્કર દરમિયાન વાહન એક વીજળીના થાંભલા સાથે પણ જોરદાર અથડાયું હતું. હાલ સ્ટેટ ફોરેન્સિક લેબોરેટરી (FSL) ના નિષ્ણાતો ઘટનાસ્થળેથી પુરાવા એકત્રિત કરી તપાસ કરી રહ્યા છે કે આગ શોર્ટ સર્કિટથી લાગી હતી કે જાણીજોઈને લગાડવામાં આવી હતી. બીજી તરફ, આ જઘન્ય હત્યાકાંડને પગલે ક્ષત્રિય સમાજમાં ભારે રોષ ફાટી નીકળ્યો છે. સમાજના પ્રતિનિધિ મંડળે મુખ્યમંત્રી વિષ્ણુ દેવ સાયને મળીને એક આવેદનપત્ર સોંપ્યું છે અને આ સમગ્ર મામલાની CBI દ્વારા નિષ્પક્ષ તપાસ કરાવવાની માંગ કરી છે.

ગુનેગારોને બક્ષવામાં નહીં આવે: મુખ્યમંત્રી
આ ઘટના અંગે છત્તીસગઢના મુખ્યમંત્રી વિષ્ણુ દેવ સાયે કડક વલણ અપનાવતા પત્રકારોને જણાવ્યું કે, "કાયદો અને વ્યવસ્થા હાથમાં લેનાર કોઈપણ વ્યક્તિને સાંખી લેવામાં આવશે નહીં. પોલીસ આ મામલે ખૂબ જ ગંભીરતાથી તપાસ કરી રહી છે અને મુખ્ય ચાર આરોપીઓની ધરપકડ થઈ ચૂકી છે. આ ઘટનામાં સામેલ તમામ દોષિતો સામે એવી કડક કાર્યવાહી કરવામાં આવશે જે દાખલારૂપ બનશે."

'આ ભાજપની આંતરિક ગેંગવોર': કોંગ્રેસનો પલટવાર
બીજી તરફ, વિપક્ષ કોંગ્રેસે આ ઘટનાને લઈને શાસક પક્ષ ભાજપ પર આકરા પ્રહારો કર્યા છે. છત્તીસગઢ પ્રદેશ કોંગ્રેસ સમિતિના અધ્યક્ષ દીપક બૈજે આક્ષેપ કર્યો છે કે, "રાજ્યમાં રેતી માફિયાઓ સરકારી પ્રોત્સાહન અને ભાજપ નેતાઓના સંરક્ષણ હેઠળ બેફામ બન્યા છે. આ ઘટનામાં પીડિત અને આરોપી બંને શાસક પક્ષ ભાજપ સાથે પ્રત્યક્ષ કે પરોક્ષ રીતે જોડાયેલા છે. ભાજપના નેતાઓ ગેરકાયદેસર કમાણી અને ખનન પર વર્ચસ્વ જમાવવા માટે હવે એકબીજાના લોહીના તરસ્યા બન્યા છે અને આ ગેંગવોર તેનો જીવતો જાગતો પુરાવો છે." હાલમાં સમગ્ર વિસ્તારમાં વધારાનો પોલીસ કાફલો તૈનાત કરી દેવામાં આવ્યો છે અને પરિસ્થિતિ પર ચાંપતી નજર રાખવામાં આવી રહી છે.