પીગળેલા લોખંડના લેડલમાં બ્લાસ્ટ, 7 દાઝ્યા, 3 ગંભીર

છત્તીસગઢના દુર્ગ જિલ્લામાં આવેલી ફેક્ટરીઓમાં અકસ્માતોની હારમાળા અટકવાનું નામ નથી લઈ રહી. શુક્રવારે સાંજે રસમડા ઔદ્યોગિક વિસ્તારમાં આવેલી જય બાલાજી ઇન્ડસ્ટ્રીઝમાં એક હૃદયદ્રાવક અકસ્માત સર્જાયો હતો. ફેક્ટરીમાં કામકાજ દરમિયાન પીગળેલા લોખંડથી ભરેલા લેડલમાં અચાનક જોરદાર વિસ્ફોટ થયો હતો, જેના કારણે ગરમ અને પીગળેલું લોખંડ આસપાસ કામ કરી રહેલા મજૂરો પર પડ્યું હતું. આ ભયાનક દુર્ઘટનામાં કુલ 7 મજૂરો ખરાબ રીતે દાઝી ગયા હતા. ઘટનાને પગલે ફેક્ટરી પરિસરમાં ભારે અફરાતફરી મચી ગઈ હતી અને મેનેજમેન્ટે તાત્કાલિક તમામ ઈજાગ્રસ્તોને ભિલાઈની સેક્ટર 9 હોસ્પિટલમાં ખસેડ્યા હતા, જ્યાં બર્ન યુનિટમાં તેમની સારવાર ચાલી રહી છે.

મજૂરોની ઉંમર માત્ર 18થી 22 વર્ષની

આ અકસ્માતમાં ઇજાગ્રસ્ત થયેલા મજૂરોની ઓળખ અશ્વિની કુમાર, ઉદય, અનૂપ, હરેરામ શર્મા, અશોક યાદવ અને મોનુ તરીકે થઈ છે. મળતી માહિતી મુજબ, આ તમામ મજૂરોની ઉંમર માત્ર 18થી 22 વર્ષની વચ્ચે છે અને તેઓ ઉત્તર પ્રદેશ તથા બિહારથી અહીં મજૂરી કામ માટે આવ્યા હતા. આ મજૂરોમાંથી 3ની હાલત અત્યંત ગંભીર હોવાનું તબીબો જણાવી રહ્યા છે. આ આખી ઘટનામાં કંપની મેનેજમેન્ટનું અત્યંત બેજવાબદાર વલણ પણ સામે આવ્યું છે. નવાઈની વાત એ છે કે, મેનેજમેન્ટના જવાબદાર અધિકારીઓને મોડી રાત સુધી એ પણ ખબર ન હતી કે, અકસ્માતમાં ખરેખર કેટલા લોકો દાઝ્યા છે. એટલું જ નહિ, મેનેજમેન્ટ અત્યારથી જ મજૂરોને વળતર આપવાની બાબતમાં આનાકાની કરી રહ્યું હોવાના આક્ષેપો થઈ રહ્યા છે.

દુર્ઘટનામાં 6 લોકોના મોત થયા

ફેક્ટરી યુનિયનોએ મેનેજમેન્ટ પર સુરક્ષાના નિયમોની ઘોર અવગણના અને બેદરકારીનો ગંભીર આરોપ લગાવ્યો છે. એવું પણ જાણવા મળ્યું છે કે, આ કંપનીમાં મજૂરોનું લાંબા સમયથી શોષણ થઈ રહ્યું હતું. મજૂરોના પગારમાંથી PF અને ESIC પેટે કરોડો રૂપિયા કાપવામાં આવ્યા હોવા છતાં, કંપનીએ આ રકમ સંબંધિત સરકારી કચેરીઓમાં જમા કરાવી નથી. અગાઉ ભિલાઈ સ્ટીલ પ્લાન્ટમાં પણ ગેસ લીકેજની દુર્ઘટનામાં 6 લોકોના મોત થયા હતા અને અનેક લોકો ઝપેટમાં આવ્યા હતા, તેમ છતાં જિલ્લા વહીવટી તંત્ર અને ઇન્ડસ્ટ્રીયલ સેફ્ટી વિભાગ કોઈ કડક પગલાં લેતું નથી.