ચંદ્રાબાબુ નાયડુએ RSS ચીફ મોહન ભાગવતના સૂરમાં

આંધ્રપ્રદેશના મુખ્યમંત્રી એન. ચંદ્રાબાબુ નાયડુએ RSS સરસંઘચાલક મોહન ભાગવતની વાતને સમર્થન આપતા કહ્યું કે દેશના દરેક દંપતીને ત્રણ બાળકો હોવા જોઈએ. આનાથી ભારતની વસ્તી વધશે અને 2047 તથા તે પછીના સદીઓમાં ભારત વૈશ્વિક સ્તરે અગ્રણી દેશ બની રહેશે. આ વાત તેમણે તિરુપતિમાં રાષ્ટ્રીય સંસ્કૃત યુનિવર્સિટી ખાતે આયોજિત 'ભારતીય વિજ્ઞાન સંમેલન 2025'ના ઉદ્ઘાટન સત્રમાં કહી.

આ સાતમા સંસ્કરણના સંમેલનમાં (26થી 29 ડિસેમ્બર) RSS ચીફ મોહન ભાગવત પણ હાજર હતા. ચંદ્રાબાબુએ કહ્યું, "આજે વિદેશમાં 4-5 કરોડ ભારતીયો રહે છે અને તેમની પ્રતિ વ્યક્તિ આવક સૌથી વધુ હોય છે. જેમ મોહન ભાગવતજી હંમેશા કહે છે, દરેક દંપતીને ત્રણ બાળકો હોવા જોઈએ. આ ખૂબ જરૂરી છે. જો વસ્તી પર ધ્યાન આપીએ તો 2047 અને તે પછીના સમયમાં માત્ર ભારત જ વિશ્વ પર પ્રભુત્વ જમાવશે."

ભારતીય સંસ્કૃતિ અને વારસા પર ભાર

નાયડુએ યુવાનોને પશ્ચિમી સુપરહીરોની વાતો છોડી ભારતીય મહાકાવ્યોમાંથી શીખવા અપીલ કરી. તેમણે કહ્યું, "સુપરમેન કરતા હનુમાનજી વધુ બળવાન છે, આયર્નમેન અથવા બેટમેન કરતા અર્જુન વધુ મહાન યોદ્ધા છે. રામાયણ-મહાભારતની વાર્તાઓ અવતાર જેવી ફિલ્મો કરતા વધુ રોચક છે."

તેમણે વધુમાં કહ્યું કે ભગવાન રામ મર્યાદાના પ્રતીક છે અને રામરાજ્ય આદર્શ શાસનનું પ્રતિનિધિત્વ કરે છે. માતા-પિતા અને શિક્ષકોએ બાળકોને ભારતીય સાંસ્કૃતિક વારસા, કૃષ્ણ, શિવ જેવા ભગવાનોની મહાનતા અને બકાસુર-કંસ જેવા પાત્રોની વાર્તાઓ ભણાવવી જોઈએ.

ભારતનું ભવિષ્ય અને વિજ્ઞાન

ચંદ્રાબાબુએ ભારતને વિજ્ઞાન અને જ્ઞાનનો સુપરપાવર ગણાવ્યો. તેમણે હડપ્પા સભ્યતાના શહેરી આયોજન, યોગ અને આયુર્વેદનો ઉલ્લેખ કરી કહ્યું કે ભારતનું વૈજ્ઞાનિક વારસો હજારો વર્ષ જૂનો છે. તેમણે ક્વોન્ટમ કમ્પ્યુટિંગ પર પણ ભાર મૂક્યો અને અમરાવતીમાં ક્વોન્ટમ કમ્પ્યુટરની શરૂઆતની વાત કરી.

આ સંમેલનમાં કેન્દ્રીય મંત્રી જિતેંદ્ર સિંહ અને અન્ય મહાનુભાવો પણ હાજર હતા. નાયડુના આ નિવેદનથી વસ્તી અને સાંસ્કૃતિક મૂલ્યો પર ચર્ચા તેજ થઈ છે, કારણ કે ભારતનો ફર્ટિલિટી રેટ હાલ 2.0ની આસપાસ છે અને વૃદ્ધ વસ્તી વધી રહી છે.