જયપુરમાં ઓવરટેકથી કાર-ટ્રકનો અકસ્માત, 4ના મોત!

રાજસ્થાનના જમવારામગઢ વિસ્તારમાં મનોહરપુર-દૌસા નેશનલ હાઇવે પર આજે એક દર્દનાક માર્ગ અકસ્માત થયો હતો. રતનપુરા નજીક એક ટ્રક અને ઇકો કાર વચ્ચે થયેલી સામસામેની ટક્કરમાં ચાર લોકોના ઘટનાસ્થળે જ મોત નીપજ્યા હતા, જ્યારે કારમાં સવાર અન્ય ચાર લોકો ગંભીર રીતે ઘાયલ થયા હતા.

હાડ ધ્રુજાવી દેનારી આ ઘટનાની જાણ થતાં જ રાયસર અને મનોહરપુર પોલીસ સ્ટેશનનો સ્ટાફ તાત્કાલિક ઘટનાસ્થળે પહોંચ્યો અને બચાવ કાર્ય શરૂ કર્યું. હાજર વ્યક્તિઓના જણાવ્યા અનુસાર, ઇકો કાર દૌસા તરફથી મનોહરપુર તરફ જઈ રહી હતી.

સંતુલન ગુમાવતા કારના ફુરચેફુરચા

પ્રાથમિક તપાસમાં પોલીસને જાણવા મળ્યું કે કાર ચાલકે ઓવરટેક કરવાનો પ્રયાસ કર્યો હતો, આ દરમિયાન કારનું સંતુલન ખોરવાઈ ગયું અને તે સામેથી આવતા ટ્રક સાથે જોરદાર રીતે અથડાઈ. ટક્કર એટલી ભયંકર હતી કે કારનો આગળનો ભાગ સંપૂર્ણપણે તૂટી ગયો હતો.

અકસ્માતમાં ફસાયેલા મુસાફરોને બહાર કાઢવા માટે પોલીસ અને સ્થાનિક ગ્રામજનોને કારની બોડીને કાપવી પડી હતી. આ દુર્ઘટનાને કારણે હાઇવે પર બંને બાજુએ વાહનોની લાંબી કતારો લાગી ગઈ હતી. પોલીસે ક્રેન બોલાવીને ક્ષતિગ્રસ્ત વાહનોને દૂર કર્યા અને ધીમે ધીમે હાઇવેનો રસ્તો ખુલ્લો કરાવ્યો.

ઘાયલોને ટ્રોમા યુનિટમાં ખસેડાયા

ઘટનાસ્થળેથી મળી આવેલા ચારેય મૃતદેહો અને ઘાયલોને એમ્બ્યુલન્સ મારફતે તાત્કાલિક નિમ્ફ્સ હોસ્પિટલ ખાતે પહોંચાડવામાં આવ્યા. હોસ્પિટલ પ્રશાસનના જણાવ્યા મુજબ, ઘાયલોની હાલત ગંભીર છે અને તેમને વિશેષ સારવાર માટે ટ્રોમા યુનિટમાં ખસેડવામાં આવ્યા છે.

પોલીસે જણાવ્યું કે પ્રાથમિક તપાસમાં ઓવરટેક દરમિયાન કાર ચાલકે નિયંત્રણ ગુમાવ્યું હોવાની વાત સામે આવી છે. જોકે, પોલીસ સમગ્ર મામલે તપાસ કરી રહી છે અને મૃતકોની ઓળખ કરવાની પ્રક્રિયા શરૂ કરી દેવામાં આવી છે.