કોચીથી દિલ્હી આવી રહેલી ઇન્ડિગોની ફ્લાઇટમાં બોમ્બ હોવાની ધમકી, નાગપુરમાં ઇમરજન્સી લેન્ડિંગ કરાવાયું

મંગળવારે કોચીથી દિલ્હી જતી ફ્લાઇટને બોમ્બની ધમકી મળ્યા બાદ નાગપુરના ડૉ. બાબાસાહેબ આંબેડકર આંતરરાષ્ટ્રીય એરપોર્ટ પર ઇમરજન્સી લેન્ડિંગ કરાવવી પડી હતી. પ્રારંભિક માહિતી અનુસાર, એરલાઇન અધિકારીઓને વિમાનમાં બોમ્બની ધમકી મળી હતી. માનક પ્રોટોકોલનું પાલન કરીને, ફ્લાઇટને સુરક્ષિત રીતે ડાયવર્ટ કરવામાં આવી હતી અને નાગપુર એરપોર્ટ પર લેન્ડ કરવામાં આવી હતી.

'હજુ સુધી કંઈ શંકાસ્પદ મળ્યું નથી' નાગપુરના ડીસીપી લોહિત મટાણીએ જણાવ્યું હતું કે, "બોમ્બની ધમકી મળ્યા બાદ મસ્કત-કોચી-દિલ્હીથી આવતી ઇન્ડિગો ફ્લાઇટ 6E 2706 ને નાગપુર એરપોર્ટ પર ઇમરજન્સી લેન્ડિંગ કરાવવી પડી હતી. બધા મુસાફરોને નીચે ઉતારી દેવામાં આવ્યા છે અને તપાસ ચાલી રહી છે, હજુ સુધી કંઈ શંકાસ્પદ મળ્યું નથી."

બોમ્બ ડિટેક્શન અને ડિસ્પોઝલ સ્ક્વોડ (BDDS) તાત્કાલિક ઘટનાસ્થળે પહોંચી ગયું હતું અને વિગતવાર શોધખોળ શરૂ કરી હતી. બધા મુસાફરોને સુરક્ષિત રીતે બહાર કાઢવામાં આવ્યા હતા અને વિમાનને સંપૂર્ણ તપાસ માટે અલગ જગ્યાએ લઈ જવામાં આવ્યું હતું. એરપોર્ટ સુરક્ષા, સેન્ટ્રલ ઇન્ડસ્ટ્રિયલ સિક્યુરિટી ફોર્સ (CISF) અને સ્થાનિક પોલીસ હાલમાં હાઇ એલર્ટ પર છે અને ધમકીના સ્ત્રોતની તપાસ કરી રહી છે.