19 નવેમ્બરના બપોરે બેંગલુરુના જયનગર નજીક એક મોટી લૂંટની ઘટના બની હતી, જેમાં CMSની કેશ વાનમાંથી 7.11 કરોડની રકમની ચોરી કરવામાં આવી હતી. આ ઘટનામાં આરોપીઓએ RBI અધિકારીઓ તરીકેનો ડોળ કરીને કેશ વાનને આંતરી હતી. તેઓએ વાહનને ડાયરી સર્કલ ફ્લાયઓવર તરફ વાળ્યું અને બંદૂકની અણીએ ડ્રાઇવરને ધમકાવીને રોકડની લૂંટ કરી હતી.
ગુનેગારોએ વાહનોને બદલી નાખ્યા
કર્ણાટકના ગૃહ મંત્રી જી. પરમેશ્વરાએ 20 નવેમ્બરના રોજ બેંગલુરુમાં પત્રકારોને સંબોધતા આ લૂંટ અંગે એક મોટો ખુલાસો કર્યો હતો. તેમણે જણાવ્યું કે, 7.11 કરોડની લૂંટમાં સામેલ ગુનેગારોએ ઘટના પછી તરત જ વાહનો બદલી નાખ્યા હતા અને તપાસને ગેરમાર્ગે દોરવા માટે નકલી નંબર પ્લેટનો ઉપયોગ કર્યો હતો, જેના કારણે તપાસ વધુ જટિલ બની છે. ડૉ. પરમેશ્વરાએ જોકે વિશ્વાસ વ્યક્ત કર્યો કે, પોલીસ પાસે મજબૂત કડીઓ છે અને આરોપીઓની ધરપકડ જલ્દી જ કરવામાં આવશે.
નકલી નંબર પ્લેટ અને ગેટવે કારનો ઉપયોગ
ગૃહ મંત્રીએ વધુમાં જણાવ્યું કે, આરોપીઓ ભાગી છૂટવા માટે ક્યા વાહનનો ઉપયોગ કર્યો તે હજુ સ્પષ્ટ થયું નથી. જોકે, એ વાતની પુષ્ટિ થઈ છે કે, તેઓએ વાહનો બદલીને પૈસા ટ્રાન્સફર કર્યા હતા. પોલીસ એ જાણવા માટે તપાસ કરી રહી છે કે, શું આ વાહન કર્ણાટક રાજ્યની બહાર ગયું છે. ડૉ. પરમેશ્વરાએ એક ચોંકાવનારો ખુલાસો પણ કર્યો કે, લૂંટમાં ઉપયોગમાં લેવાયેલા એક વાહન પર એક મારુતિ સુઝુકી સ્વિફ્ટનો રજિસ્ટ્રેશન નંબર હતો, જેનો માલિક આ કેસ સાથે સંબંધિત નથી. આનાથી સ્પષ્ટ થાય છે કે, આયોજનબદ્ધ રીતે નકલી નંબર પ્લેટનો ઉપયોગ કરવામાં આવ્યો હતો. એવું પણ જાણવા મળ્યું છે કે, આ ગેંગે ગેટવે કાર તરીકે ઓછામાં ઓછા 2 વાહનોનો ઉપયોગ કર્યો હતો.
CCTV ફૂટેજ દ્વારા ટ્રેકિંગ
ડૉ. પરમેશ્વરાએ ઉમેર્યું કે, પોલીસ અધિકારીઓ ગેંગની હિલચાલને ટ્રેક કરવા માટે બેંગલુરુ અને આસપાસના જિલ્લાઓમાં લગાવેલા CCTV કેમેરાના ફૂટેજની તપાસ કરી રહ્યા છે. આ જટિલ કેસને ઉકેલવા અને આરોપીઓને ઝડપી લેવા માટે પોલીસ સઘન કાર્યવાહી કરી રહી છે.

બેંગલુરુ ATM કેશ વાનમાં લૂંટ

કર્ણાટકના ગૃહ મંત્રી એ જણાવ્યું છે કે,  કેશ વાનની લૂંટ પછી તરત જ વાહન બદલી નાખ્યા

November 20, 2025 | 20:39 IST