રામ મંદિર બાદ હવે બદ્રીનાથ ધામ ચર્ચામાં

Badrinath Dham : દેશભરમાં અયોધ્યાના રામ મંદિરને લઈને વિવિધ મુદ્દાઓ વચ્ચે હવે ઉત્તરાખંડના વિશ્વવિખ્યાત બદ્રીનાથ ધામમાં દાનની રકમને લઈને વિવાદ સામે આવ્યો છે.સોશિયલ મીડિયા અને રાજકીય મંચો પર આ મુદ્દો ઝડપથી ચર્ચાનો વિષય બન્યો છે.કેટલાક લોકો દ્વારા મંદિર સમિતિ પર ભક્તોના દાનના યોગ્ય હિસાબ અંગે પ્રશ્નો ઉઠાવવામાં આવ્યા છે.આ વિવાદે માત્ર ઉત્તરાખંડ જ નહીં પરંતુ સમગ્ર દેશના ધાર્મિક વર્તુળોમાં ચર્ચા જગાવી છે. લાખો શ્રદ્ધાળુઓ દર વર્ષે બદ્રીનાથ ધામમાં દર્શન કરવા પહોંચે છે અને કરોડો રૂપિયાનું દાન અર્પણ કરે છે. આવી સ્થિતિમાં દાનના ઉપયોગ અને પારદર્શિતાને લઈને ઉઠેલા સવાલો મહત્વના બની ગયા છે.

શું છે સમગ્ર વિવાદ?
ભૈરવ સેનાના પ્રમુખ સંદીપ ખત્રીએ મંદિર સમિતિના મુખ્ય કાર્યકારી અધિકારી સોહન સિંહ રાગઢને પત્ર લખીને પ્રસાદ અંગેની કથિત અનિયમિતતાની તપાસની માંગ કરી છે. પત્રમાં પ્રસાદની ચોરીમાં સંડોવાયેલા અધિકારીઓ અને કર્મચારીઓ તેમજ મંદિર સમિતિના અધ્યક્ષના અંગત સહાયક સામે યોગ્ય કાર્યવાહી કરવાની માંગ કરવામાં આવી છે.ભૈરવ સેનાના પત્ર બાદ, સીઈઓએ સમિતિના અધ્યક્ષ હેમંત દ્વિવેદીના અંગત સહાયક સહિત અનેક કર્મચારીઓને નોટિસ ફટકારી હતી. તેમણે જણાવ્યું હતું કે મંદિર પરિસરના સીસીટીવી ફૂટેજમાં ચેરમેનના અંગત સહાયક મંદિરના કેટલાક કર્મચારીઓ સાથે પૈસા ગણતા જોવા મળે છે.

તપાસ માટે સમિતિની રચના કરવામાં આવી
હેમંત દ્વિવેદીએ જાહેરાત કરી હતી કે સમગ્ર મામલાની નિષ્પક્ષ અને પારદર્શક તપાસ કરવા માટે એક તપાસ સમિતિની રચના કરવામાં આવી છે. આરોપોમાં ફસાયેલા કર્મચારીઓ પાસેથી ખુલાસો માંગવામાં આવ્યો છે. તેમણે ભારપૂર્વક જણાવ્યું હતું કે જો કોઈ ગેરરીતિ સાબિત થશે તો કોઈને પણ બક્ષવામાં આવશે નહીં અને કડક કાર્યવાહી કરવામાં આવશે.

કોઈપણ કર્મચારી દોષિત સાબિત થશે તો તેના વિરુદ્ધ કડક કાર્યવાહી 
હેમંત દ્વિવેદીએ વધુમાં કહ્યું કે જો તપાસ દરમિયાન કોઈપણ કર્મચારી અથવા અધિકારી દોષિત સાબિત થશે તો તેના વિરુદ્ધ કડક કાનૂની તેમજ વિભાગીય કાર્યવાહી કરવામાં આવશે.કોઈપણ વ્યક્તિને માત્ર પદના આધારે રાહત આપવામાં આવશે નહીં અને તમામ સામે સમાન રીતે કાર્યવાહી થશે.આ દરમિયાન સોશિયલ મીડિયા પર એવો પણ દાવો કરવામાં આવ્યો હતો કે સમિતિના અધ્યક્ષના વ્યક્તિગત સહાયકનું નામ પણ આ મામલે જોડાયેલું છે. જોકે હેમંત દ્વિવેદીએ આ દાવાને નકારી કાઢતાં જણાવ્યું કે તેમનો કોઈ વ્યક્તિગત સચિવ નથી.જે કર્મચારીનું નામ ચર્ચામાં છે તે મંદિર સમિતિનો નિયમિત કર્મચારી છે અને અગાઉ પણ અનેક અધ્યક્ષો સાથે ફરજ બજાવી ચૂક્યો છે. તેમ છતાં તપાસમાં જો તેની સંડોવણી સામે આવશે તો તેની સામે પણ નિયમ મુજબ કાર્યવાહી થશે.

અંગત સચિવની વાસ્તવિકતા શું છે?
દ્વિવેદીએ એ પણ સ્પષ્ટતા કરી હતી કે સોશિયલ મીડિયા પર જે કર્મચારીને તેમના “પર્સનલ સેક્રેટરી” તરીકે ઓળખવામાં આવી રહ્યો છે તે તેમનો અંગત સચિવ નથી. આ વ્યક્તિ શ્રી બદ્રીનાથ-કેદારનાથ મંદિર સમિતિનો નિયમિત સરકારી કર્મચારી છે અને અગાઉ બદ્રીનાથ-કેદારનાથ મંદિર સમિતિના ત્રણ ભૂતપૂર્વ અધ્યક્ષોના અંગત સહાયક તરીકે સેવા આપી ચૂક્યો છે. તેમણે વધુમાં જણાવ્યું હતું કે જો તપાસ દરમિયાન સોશિયલ મીડિયા પર ફરતા આરોપો સાચા જણાશે, તો જવાબદારો સામે કડક કાર્યવાહી કરવામાં આવશે.

CCTV ફુટેજની તપાસ
આ દરમિયાન શ્રી બદ્રીનાથ-કેદારનાથ મંદિર સમિતિના મુખ્ય કાર્યકારી અધિકારી સોહન સિંહ રાંગડે જણાવ્યું કે બીજી જુલાઈની સાંજથી સોશિયલ મિડિયા પર વાયરલ થઈ રહેલા આ મામલાને લઈને મળેલી કથિત ફરિયાદને આધારે આજે બદરીનાથ મંદિર પરિસરના CCTV ફુટેજની તપાસ કરવામાં આવી છે.તેમણે જણાવ્યું હતુ કે ઉપલબ્ધ ફુટેજમાં પૂરતી સ્પષ્ટતા નથી. તેમ છતાં મામલાની ગંભીરતા અને સંવેદનશીલતાને ધ્યાનમાં રાખીને આ ઘટનાની જાણ BKTC અધ્યક્ષને કરવામાં આવી છે. મુખ્ય કાર્યકારી અધિકારીએ જણાવ્યું કે અધ્યક્ષના નિર્દેશ મુજબ સંબંધિત કર્મચારીઓ પાસેથી સ્પષ્ટીકરણ માગવામાં આવી રહ્યું છે. ઉપરાંત સમગ્ર મામલાની નિષ્પક્ષ અને વિગતવાર તપાસ માટે આંતરિક તપાસ સમિતિની રચના કરવાની ભલામણ અધ્યક્ષને મોકલવામાં આવી છે. સમિતિની રચના થયા બાદ તે તમામ તથ્યો, ઉપલબ્ધ પુરાવાઓ અને સંબંધિત પક્ષોના નિવેદનોને આધારે વિગતવાર તપાસ કરીને પોતાનો અહેવાલ રજૂ કરશે.