રાજધાની એક્સપ્રેસ સાથે અથડાતાં 7 હાથીઓના મોત

અસમમાં શનિવારે વહેલી સવારે એક અત્યંત દુ:ખદ ઘટના બની છે, જેમાં રાજધાની એક્સપ્રેસની અડફેટે આવવાથી 7 જંગલી હાથીઓના મોત થયા છે અને એક હાથી ગંભીર રીતે ઈજાગ્રસ્ત થયો છે. આ અકસ્માત નાગાંવ જિલ્લાના કામપુર વિસ્તારમાં થયો હતો, જ્યારે DN-સાઈરાંગ-નવી દિલ્હી રાજધાની એક્સપ્રેસ હાથીઓના એક ઝુંડ સાથે અથડાઈ હતી. આ ટક્કરને કારણે ટ્રેનનું એન્જિન અને 5 કોચ પાટા પરથી ઉતરી ગયા હતા, જેનાથી રેલવે વ્યવહાર ખોરવાઈ ગયો હતો.

વિભાગીય મુખ્યાલયના અધિકારીઓને ઘટનાસ્થળે મોકલ્યા

નોર્થઈસ્ટ ફ્રન્ટિયર રેલવેના અધિકારીઓના જણાવ્યા અનુસાર, આ ઘટના લુમડિંગ ડિવિઝન હેઠળના જમુનામુખ-કામપુર સેક્શનમાં વહેલી સવારે 2:17 વાગ્યે બની હતી. અકસ્માત સ્થળ ગુવાહાટીથી લગભગ 126 કિમી દૂર છે. જોકે, આ અકસ્માતમાં સદનસીબે ટ્રેનમાં સવાર કોઈપણ મુસાફરને ઈજા કે જાનહાનિ થઈ નથી. રેલવે દ્વારા તાત્કાલિક રાહત ટ્રેનો અને વિભાગીય મુખ્યાલયના અધિકારીઓને ઘટનાસ્થળે મોકલી દેવામાં આવ્યા હતા જેથી બચાવ કામગીરી શરૂ કરી શકાય.

ગુવાહાટી રેલવે સ્ટેશન પર હેલ્પલાઈન નંબરો કાર્યરત કર્યા

દુર્ઘટના બાદ પ્રભાવિત કોચના મુસાફરોને અન્ય ડબ્બાઓમાં ખાલી રહેલી બર્થ પર કામચલાઉ ધોરણે બેસાડવામાં આવ્યા હતા. રેલવે પ્રશાસને જણાવ્યું હતું કે, ક્ષતિગ્રસ્ત કોચને અલગ કર્યા પછી, ટ્રેનને ગુવાહાટી માટે રવાના કરવામાં આવી હતી. એકવાર ટ્રેન ગુવાહાટી પહોંચી જાય પછી, મુસાફરોની સુવિધા માટે વધારાના કોચ જોડવામાં આવશે અને ત્યારબાદ ટ્રેન તેની આગળની મુસાફરી ફરી શરૂ કરશે. મુસાફરોની સહાયતા માટે ગુવાહાટી રેલવે સ્ટેશન પર હેલ્પલાઈન નંબરો પણ કાર્યરત કરવામાં આવ્યા છે.

રેલવે ટ્રેકને પુનઃસ્થાપિત કરવાનું કામ

રેલવે અધિકારીઓએ સ્પષ્ટતા કરી છે કે, આ અકસ્માત જે જગ્યાએ થયો હતો તે કોઈ નિર્ધારિત એલિફન્ટ કોરિડોર ન હતો. જ્યારે ટ્રેનના પાઈલટે હાથીઓના ઝુંડને જોયું, ત્યારે તેમણે તાત્કાલિક ઈમરજન્સી બ્રેક લગાવી હતી, પરંતુ ઝડપ વધુ હોવાથી અકસ્માત ટાળી શકાયો ન હતો અને હાથીઓ ટ્રેન સાથે અથડાયા હતા. હાલમાં આ લાઈન પરથી પસાર થતી અન્ય ટ્રેનોને ડાયવર્ટ કરવામાં આવી છે અને રેલવે ટ્રેકને પુનઃસ્થાપિત કરવાનું કામ યુદ્ધના ધોરણે ચાલી રહ્યું છે.

રેલવે અને વન વિભાગ વચ્ચેનું સંકલન સંતોષકારક નથી

નાગાંવના ડિવિઝનલ ફોરેસ્ટ ઓફિસર સુહાસ કદમે જણાવ્યું કે મૃત્યુ પામેલા હાથીઓની વિગતવાર માહિતી મેળવવાની પ્રક્રિયા ચાલુ છે. બીજી તરફ, વન્યજીવ NGO 'આરણ્યક' ના મુખ્ય કાર્યકારી અધિકારી બિભવ તાલુદારે આ ઘટના અંગે ચિંતા વ્યક્ત કરતા કહ્યું કે, આ દુર્ઘટના દર્શાવે છે કે રેલવે અને વન વિભાગ વચ્ચેનું સંકલન હજુ પણ સંતોષકારક નથી. આવી ઘટનાઓ રોકવા માટે જમીની સ્તરે હાથીઓની હિલચાલની માહિતી રેલવે સાથે શેર કરવી ખૂબ જ જરૂરી છે જેથી નિર્દોષ હાથીઓનો જીવ બચાવી શકાય.