પશ્ચિમ બંગાળમાં વધુ એક BLO એ કરી આત્મહત્યા

પશ્ચિમ બંગાળમાં વધુ એક બૂથ લેવલ ઓફિસર BLOનું મૃત્યુ થયું છે, જેની પાછળનું કારણ સ્પેશિયલ ઈન્ટેન્સિવ રિવિઝન (SIR) સંબંધિત કામનું દબાણ હોવાનું પોલીસ માની રહી છે. આ ઘટના શનિવારે બની હતી. આ ઘટના બંગાળના જલપાઈbગુડી જિલ્લાના માલ બજાર વિસ્તારમાં એક મહિલા BLOના કથિત રીતે આ જ કારણસર મૃત્યુ પામવાના 3 દિવસ પછી બની છે.

BLOનું કામ પૂર્ણ નહિ કરે તો તેને વહીવટી દબાણ

આ વખતે નદિયા જિલ્લાના કૃષ્ણનગરના શાસ્થિતાલા વિસ્તારમાં એક મહિલા BLO એ ગળેફાંસો ખાઈને આત્મહત્યા કરી લીધી છે. મૃતકની ઓળખ 51 વર્ષીય રિન્કુ તરફદાર તરીકે કરવામાં આવી છે. પોલીસના જણાવ્યા મુજબ, તેમના રૂમમાંથી એક સુસાઈડ નોટ મળી આવી છે. પોલીસે જણાવ્યું કે, મહિલાએ સુસાઇડ નોટમાં લખ્યું છે કે, જો તે BLOનું કામ પૂર્ણ નહિ કરે તો તેને વહીવટી દબાણનો સામનો કરવો પડશે.

બાંગાલઝી વિસ્તારમાં BLO તરીકે કરી રહ્યા કામ 

પોલીસે જણાવ્યું કે મહિલા BLO એ કથિત રીતે સુસાઇડ નોટમાં લખ્યું છે કે, "હું આ દબાણ સહન કરી શકતી નથી." તેણીએ તેના મૃત્યુ માટે ચૂંટણી પંચને પણ જવાબદાર ઠેરવ્યું છે. પોલીસે જણાવ્યું કે, રિન્કુ તરફદાર નદિયા જિલ્લાના ચાપરા પોલીસ સ્ટેશન વિસ્તારમાં આવેલી સ્વામી વિવેકાનંદ વિદ્યા મંદિરમાં પાર્ટ-ટાઈમ શિક્ષિકા હતા અને તેઓ બાંગાલઝી વિસ્તારમાં BLO તરીકે કામ કરી રહ્યા હતા. 

આ પણ વાંચો: SIR પ્રક્રિયા કે શિક્ષકો હોમવાનું મશીન?

મૃત્યુ માટે તેના પરિવારમાં કોઈ જવાબદાર નહિ

આ સાથે જ, રિન્કુ એ લખ્યું છે કે, તેના મૃત્યુ માટે તેના પરિવારમાં કોઈ જવાબદાર નથી. પોતાના મૃત્યુ માટે ચૂંટણી પંચને દોષ આપતા BLO એ એમ પણ લખ્યું છે કે, "મારા ભાગ્ય માટે ચૂંટણી પંચ જવાબદાર છે. હું કોઈપણ રાજકીય પક્ષને ટેકો આપતી નથી. હું એક સામાન્ય વ્યક્તિ છું. પરંતુ હું આ અમાનવીય કામનું દબાણ સહન કરી શકતી નથી. હું પાર્ટ-ટાઈમ શિક્ષિકા છું. મહેનતની તુલનામાં પગાર ખૂબ ઓછો છે. તેમ છતાં, તેઓએ મને છોડી નથી.

મૃતદેહને પોસ્ટમોર્ટમ માટે મોકલ્યા

કૃષ્ણનગર પોલીસ જિલ્લાના એક વરિષ્ઠ અધિકારીએ જણાવ્યું કે, એક મહિલા BLOનો મૃતદેહ લટકતી હાલતમાં મળી આવ્યો છે. એક સુસાઇડ નોટ મળી આવી છે. તેણીએ SIR કામ સંબંધિત દબાણ સહન ન કરી શકવા બદલ તેના મૃત્યુ માટે ચૂંટણી પંચને દોષી ઠેરવ્યું છે. અકુદરતી મૃત્યુનો કેસ નોંધવામાં આવ્યો છે. મૃતદેહને કબજે કરીને પોસ્ટમોર્ટમ માટે મોકલી દેવામાં આવ્યો છે. બુધવારે, રાજ્યમાં SIR કવાયત દરમિયાન કથિત કામના દબાણના કારણે શાંતિ મુની એક્કા નામની મહિલા BLOનું જલપાઈગુડીના માલ બજાર વિસ્તારમાં "આત્મહત્યા"થી મૃત્યુ થયું હતું. મહિલાના પરિવારે આક્ષેપ કર્યો હતો કે, SIR કામનું દબાણ સહન ન કરી શકવાને કારણે તેણીએ પોતાનો જીવ આપવાનો નિર્ણય લીધો હતો.

અનપ્લાન્ડ ડ્રાઈવ રોકવા માટે પણ કરી વિનંતી

આ ઘટના પછી, મુખ્યમંત્રી મમતા બેનર્જીએ મહિલા BLOના આત્મહત્યા મામલે ભારતીય ચૂંટણી પંચ પર આકરા પ્રહાર કર્યા હતા. CM બેનર્જીએ તેમના સોશિયલ મીડિયા હેન્ડલ્સનો ઉપયોગ કરીને દાવો કર્યો હતો કે, જ્યારથી ચૂંટણી પંચે બંગાળની મતદાર યાદીઓના SIRની શરૂઆત કરી છે, ત્યારથી રાજ્યમાં લગભગ 28 લોકોનાં મોત થયાં છે. પશ્ચિમ બંગાળના મુખ્યમંત્રીએ ECIને રાજ્યમાં જીવન બચાવવા માટે આ "અનપ્લાન્ડ ડ્રાઈવ" રોકવા માટે પણ વિનંતી કરી હતી.

1 લાખના વળતરની કરી જાહેરાત

તે જ દિવસે, હુગલી જિલ્લાના કોન્નાગર વિસ્તારમાં અન્ય એક મહિલા BLO તપતિ બિસ્વાસને SIR સંબંધિત કામની વચ્ચે સેરેબ્રલ એટેક આવ્યો હતો. સેરેબ્રલ એટેક પછીના દિવસે તેમને ચૂંટણી ફરજમાંથી મુક્ત કરવામાં આવ્યા હતા. શુક્રવારે, પશ્ચિમ બંગાળ સરકારે જલપાઈગુડીના મૃતક BLO શાંતિ મુની એક્કાના પરિવાર માટે 2 લાખ અને હુગલીના BLO તપતિ બિસ્વાસ માટે 1 લાખના વળતરની જાહેરાત કરી હતી. તેઓ કૂચબિહાર જિલ્લાના બારાધામ છત્રાગ્રામ વિસ્તારના રહેવાસી હતા. જિલ્લા અધિકારીઓ દ્વારા આ વળતર પરિવારોને સોંપવામાં આવ્યું હતું.