રાજકોટમાં મોતીયાના ઓપરેશન માટે આવેલા દર્દીને ભાજપના સદસ્ય બનાવી દીધા

 

રાજકોટની રણછોડદાસજી બાપુ ચેરિટેબલ હોસ્પિટલમાં મોડી રાત્રે દર્દીઓને ઉંઘમાંથી ઉઠાડી મોબાઈલ ઉપર ઓટીપી માગીને ભાજપના સદસ્યો બનાવાયાનો ખુલાસો થયો છે. મોતીયાના ઓપરેશન માટે આવેલા જૂનાગઢના દર્દીએ સમગ્ર ઘટનાનો વીડિયો બનાવી વાયરલ કરતાં સમગ્ર બાબતનો પર્દાફાશ થયો છે. ચોર કોટવાળને દંડે તેમ શહેર ભાજપ પ્રમુખે સમગ્ર ઘટનાને પક્ષને બદનામ કરવાનું કાવતરૂ ગણાવી હતી.

જૂનાગઢના ખલીલપુર રોડ પર રહેતા કમલેશભાઇ ઠુમર મોતિયાનું ઓપરેશન કરાવવા રાજકોટની રણછોડદાસજી બાપુ ચેરિટેબલ હોસ્પિટલમાં આવ્યા હતા. મોડી રાત્રે હોસ્પિટલમાં એક યુવકે આવીને દર્દીઓને ઊંઘમાંથી ઉઠાડી ઓટીપી માગ્યો હતો. ત્યારબાદ ઓટીપીના આધારે ભાજપના સભ્યો બનાવી દીધા હતા. કમલેશભાઇએ આખી ઘટનાનો વીડિયો બનાવી વાયરલ કરતાં સમગ્ર બાબતનો ભંડાફોડ થયો હતો.

કમલેશભાઈ ઠુમરે જણાવ્યુ કે, મને આંખોમાં ઝાંખપ આવતા તપાસ કરાવી હતી. મોતિયો આવી ગયો હોવાનું જણાતાં હું રવિવારે બસમાં મોતિયાના ઓપરેશન માટે રાજકોટની રણછોડદાસજી બાપુ ચેરિટેબલ હોસ્પિટલમાં આવ્યો હતો. બપોરે 4 વાગ્યે હોસ્પિટલમાં પહોંચ્યો હતો. ત્યારબાદ મને આંખમાં ટીપાં નાખી સારવાર કરીને સાંજનું જમવાનું આપી જનરલ વોર્ડમાં આરામ કરવા મોકલી દેવાયો હતો. વોર્ડમાં અંદાજે 300 થી 350 લોકો હતા. રાત્રે 11 વાગ્યાના સુમારે એક યુવાને આવીને વારાફરતી ઉઠાડવા લાગ્યો હતો. અમને લાગ્યું કે હોસ્પિટલનો સ્ટાફ હશે જે ટીપાં નાખવા કે સારવાર માટે આવ્યો હશે.

પરંતુ એ યુવાને દર્દીઓના મોબાઇલ નંબર માગવાનું શરૂ કર્યું હતું. મારી પાસે પણ નંબર માગી મને ભાજપનો સભ્ય બનાવી દીધો હતો. મોબાઈલમાં મેસેજ આવતા મને ખબર પડી કે હું ભાજપનો સભ્ય બની ગયો છું. એ યુવક સામેની બાજુમાં અન્ય દર્દીઓને ઉઠાડી તેમના મોબાઈલ નંબર પૂછી સભ્ય બનાવી રહ્યો હતો ત્યારે મેં તેનો વીડિયો બનાવી લીધો હતો. જે કોઇને ફોનમાં ખબર ન પડે તો જાતે ફોન લઇ ઓટીપીના આધારે ભાજપનો સભ્ય બનાવતો હતો. આ યુવાને વોર્ડના 200થી 250 લોકોને ભાજપના સદસ્ય બનાવ્યા હતા.

રાજકોટ શહેર ભાજપ પ્રમુખ મુકેશ દોશીએ ચોર કોટવાળને દંડે તેમ દર્દીઓને ભાજપના સદસ્ય બનાવવાની બાબતને શરમાવાના બદલે લૂલો બચાવ કરવાનો પ્રયાસ કર્યો હતો. સમગ્ર ઘટનાનો વીડિયો વાયરલ થયો હોવા છતાં સમગ્ર બાબતને ભાજપને બદનામ કરવાનું ષડયંત્ર ગણાવ્યુ હતુ.

વિસનગરની સિવિલ હોસ્પિટલ અને સુરેન્દ્રનગરની શાળાનો પણ વિવાદ થયો હતો

વિસનગરની સિવિલ હોસ્પિટલમાં પત્નીની સારવાર કરાવવા ગયેલા એક વ્યક્તિ પાસે મોબાઈલ ઉપર ઓટીપી માગી ભાજપનો સદસ્ય બનાવી દીધાની ઘટના બની હતી. ત્યારબાદ તે વ્યક્તિએ માધ્યમોને જણાવતા વિવાદ વકર્યો હતો. ત્યારબાદ ભાજપના નેતાઓએ સમગ્ર પ્રકરણ ઉપર ઢાંકપિછોડો કરવાનો પ્રયાસ કર્યો હતો. સુરેન્દ્રનગર જિલ્લાની એક માધ્યમિક શાળાના બાળકોને પણ ભાજપના સભ્ય બનાવી દીધાનો આમ આદમી પાર્ટીના સ્થાનિક નેતાએ પર્દાફાશ કર્યો હતો.