છત્તીસગઢમાં આતંકનો અંત? 17 નક્સલીઓએ શસ્ત્રો તજ્યાં...

છત્તીસગઢના બીજાપુર જિલ્લામાં ગુરુવારે 17 નક્સલીઓએ પોલીસ અને સેન્ટ્રલ રિઝર્વ પોલીસ ફોર્સ (CRPF) સમક્ષ આત્મસમર્પણ કર્યું. તેમાંથી 9 નક્સલીઓ પર કુલ 24 લાખ રૂપિયાનું ઇનામ જાહેર કરાયું હતું.

સુરક્ષા દળો અને વહીવટીતંત્ર દ્વારા ચલાવવામાં આવતી "નિયા નેલ્લાનાર" (તમારું સારું ગામ) યોજનાથી નક્સલીઓ પ્રભાવિત થયા હતા. આ યોજના અંતર્ગત દૂરના વિસ્તારોમાં મૂળભૂત સુવિધાઓ અને વિકાસ કાર્યો હાથ ધરવામાં આવી રહ્યા છે.

આત્મસમર્પણ કરનારા નક્સલીઓ...

આત્મસમર્પણ કરનારાઓમાં સૌથી મોટું નામ 36 વર્ષીય દિનેશ મોદીયમ હતું, જે માઓવાદી સંગઠનમાં વિભાગીય સમિતિના સભ્ય હતા. તે બીજાપુરમાં 26 કેસોમાં વોન્ટેડ હતો અને તેના માથા પર ₹8 લાખનું ઇનામ જાહેર હતું.

પત્ની જ્યોતિ તાતી ઉર્ફે કાલા મોદીમ (32) અને દુલા કરમ (32), બંને વિસ્તાર સમિતિના સભ્યો હતા. આ બંને નક્સલીઓ પર ₹5-5 લાખનું ઇનામ જાહેર હતું.

"નિયા નેલ્લાનાર" યોજનાથી પ્રભાવિત નક્સલવાદીઓ...

આ ઓપરેશનમાં ડિસ્ટ્રિક્ટ રિઝર્વ ગાર્ડ, બસ્તર ફાઇટર્સ, સ્પેશિયલ ટાસ્ક ફોર્સ, CRPF અને કોબ્રા બટાલિયને મહત્વપૂર્ણ ભૂમિકા ભજવી હતી. આત્મસમર્પણ કરનારા નક્સલીઓને સરકારની પુનર્વસન નીતિ હેઠળ ₹25,000 ની નાણાકીય સહાય આપવામાં આવી. આ નક્સલીઓને મુખ્ય પ્રવાહમાં સમાવવાની પ્રક્રિયા શરૂ કરવામાં આવશે. 

આ વર્ષે અત્યાર સુધીમાં બીજાપુરમાં 65 નક્સલીઓએ આત્મસમર્પણ કર્યું છે, જ્યારે ગયા વર્ષે બસ્તર ક્ષેત્રમાં કુલ 792 નક્સલીઓએ આત્મસમર્પણ કર્યું હતું.