સરકારના સતત પ્રયાસો છતાં પાકિસ્તાનની જેલોમાં બંધ ભારતીય માછીમારોની સંખ્યા ચિંતાનો વિષય છે. આ મામલો સંસદના ઉપલા ગૃહ રાજ્યસભામાં પૂછવામાં આવ્યો હતો, જ્યાં વિદેશ રાજ્યમંત્રી શ્રી કીર્તિ વર્ધન સિંહે કબૂલાત કરી હતી કે હાલમાં પાકિસ્તાનની જેલમાં ૧૨૩ માછીમારો ગુજરાતના છે.
સંસદ સભ્ય શ્રી પરિમલ નથવાણી દ્વારા ઉઠાવાયેલા પ્રશ્નના જવાબમાં મંત્રીએ માહિતી આપી કે ૨૦૧૪થી અત્યાર સુધીમાં કુલ ૨૬૬૧ ભારતીય માછીમારોને પાકિસ્તાનમાંથી મુક્ત કરીને સ્વદેશ પરત લાવવામાં આવ્યા છે. કેલેન્ડર વર્ષ ૨૦૨૫માં અત્યાર સુધીમાં ગુજરાતના ૧૮ માછીમારોને મુક્ત કરાયા છે.
123 ગુજરાતી માછીમારોની ચિંતા:
મંત્રીએ જણાવ્યું હતું કે ૦૧ જાન્યુઆરી, ૨૦૨૫ના રોજ બંને દેશો વચ્ચે માછીમારોની યાદીની આપ-લે થઈ હતી, જેમાં પાકિસ્તાને ૨૧૭ ભારતીય માછીમારોની કસ્ટડી સ્વીકારી હતી. માર્ચ ૨૦૨૫ સુધીમાં, ૨૨ માછીમારોને મુક્ત કરવામાં આવ્યા છે, જેથી હાલમાં પાકિસ્તાનની જેલમાં ૧૯૪ ભારતીય માછીમારો કેદ છે. આ બાકી રહેલા ૧૯૪ માછીમારોમાંથી ૧૨૩ માછીમારો ગુજરાતના છે.
સુરક્ષા અને મુક્તિ માટે સરકારના પ્રયાસો:
કેન્દ્ર સરકારે સ્પષ્ટ કર્યું છે કે ભારતીય માછીમારોની સલામતી, સુરક્ષા અને કલ્યાણને ઉચ્ચ પ્રાથમિકતા આપવામાં આવે છે. માછીમારોની ધરપકડની જાણ થતા જ ઇસ્લામાબાદમાં આવેલું ભારતીય ઉચ્ચ આયોગ તાત્કાલિક પાકિસ્તાન સરકાર પાસે કોન્સ્યુલર એક્સેસ મેળવે છે.
ભારત સરકાર આ મુદ્દાને સતત પાકિસ્તાન સમક્ષ માનવતાવાદી અને આજીવિકાના ધોરણે ઉઠાવતી રહે છે. માછીમારોને વહેલી મુક્તિ અને સ્વદેશ પરત મોકલવા માટે કાનૂની સહાય સહિતની તમામ શક્ય મદદ પૂરી પાડવામાં આવે છે.

ક્યારે મળશે 105 માછીમારોને છુટકારો

રાજ્યસભામાં કેન્દ્રની કબૂલાત: પરિમલ નથવાણીએ કર્યો સવાલ, જવાબમાં થયો ચોકાવનારો ખુલાશો

December 4, 2025 | 20:51 IST