રાજસ્થાનમાં નાગૌરમાંથી 10 હજાર કિલો વિસ્ફોટકો જપ્ત

રાજસ્થાન પોલીસે નાગૌર જિલ્લામાં ગેરકાયદે ખાણકામમાં સામેલ એક વ્યક્તિની ધરપકડ કરી આશરે 10,000 કિલોગ્રામ વિસ્ફોટકો જપ્ત કરીને સફળતા મેળવી છે. પોલીસની કાર્યવાહીથી મોટા દાણચોરી નેટવર્કનો પર્દાફાશ થયો છે. પોલીસે સમગ્ર નેટવર્કને તોડી પાડવા માટે તપાસ હાથ ધરી છે.

ગેરકાયદે ખાણકામ પ્રવૃત્તિઓ પર મોટી કાર્યવાહીમાં રાજસ્થાન પોલીસે નાગૌર જિલ્લામાં એક સૂમસામ ફાર્મ હાઉસમાંથી એક શખ્સની ધરપકડ કરી 10,000 કિલોગ્રામ વિસ્ફોટકો જપ્ત કર્યા છે. અધિકારીઓના જણાવ્યા અનુસાર આ વિસ્તારમાં કાર્યરત મોટા પાયે દાણચોરી નેટવર્કનો પર્દાફાશ કર્યો છે.

જિલ્લાની વિશેષ ટીમ અને સ્થાનિક પોલીસ દ્વારા સંયુક્ત કાર્યવાહી બાદ આરોપીનું સુલેમાનખાન હોવાનું જણાયુ છે. આરોપીને કસ્ટડીમાં લઈ થૌલા પોલીસ સ્ટેશન વિસ્તારના હરસૌર ગામના એક ફાર્મ હાઉસમાંથી મુદ્દામાલ જપ્ત કરવામાં આવ્યો હતો.

દરોડા દરમિયાન પોલીસે આશરે 9,550 કિલોગ્રામ વજનની 187 બેગ એમોનિયમ નાઈટ્રેટ તેમજ ડેટોનેટર, ડેટોનેટર વાયર અને અન્ય વિસ્ફોટક ઘટકો જપ્ત કર્યા હતા અધિકારીઓએ જણાવ્યું હતું કે, વિસ્ફોટક સામગ્રી ગામની બહાર સ્થિત એક ફાર્મહાઉસના ચાર અલગ અલગ રૂમમાં છુપાવવામાં આવી હતી.

નાગૌરના પોલીસ અધિક્ષક મૃદુલ કછવાએ જણાવ્યું હતું કે, પ્રાથમિક પૂછપરછમાં જાણવા મળ્યું છે કે આરોપી ગેરકાયદેસર ખાણકામ પ્રવૃત્તિઓમાં સામેલ લોકોને આ સામગ્રી સપ્લાય કરતો હતો. "પ્રારંભિક પૂછપરછ દરમિયાન, તેણે સ્વીકાર્યું કે ગેરકાયદેસર ખાણકામમાં રોકાયેલા લોકોને વિસ્ફોટક સામગ્રી વેચવામાં આવી રહી હતી," અધિકારીએ જણાવ્યું હતું. પોલીસનું માનવું છે કે જપ્ત કરાયેલો મુદ્દામાલ ગેરકાયદે બજારમાં કરોડો રૂપિયાનો છે.

તપાસકર્તાઓને જાણવા મળ્યું કે, સુલેમાનનો ગુનાહિત ઇતિહાસ છે. તેની સામે ત્રણ કેસ નોંધાયા છે. તેમાંથી બે કેસ હાલમાં ટ્રાયલ હેઠળ છે. જ્યારે એકમાં તેને નિર્દોષ જાહેર કરવામાં આવ્યો છે.

તેમની સામે વિસ્ફોટક સામગ્રી અધિનિયમ, 1884, વિસ્ફોટક પદાર્થો અધિનિયમ, 1908 અને ભારતીય દંડ સંહિતાની સંબંધિત કલમો હેઠળ કેસ નોંધવામાં આવ્યો છે. વધુ તપાસ કરવામાં આવી રહી છે. કછવાએ કહ્યું, "જો અન્ય રાજ્યોમાં કાર્યરત નેટવર્ક્સ સાથે કોઈ લિંક બહાર આવશે તો કેન્દ્રીય એજન્સીઓ તેમાં સામેલ થશે."

જિલ્લાની વિશેષ ટીમ અને થાવલા પોલીસ દ્વારા સંકલિત કાર્યવાહી બાદ ધરપકડ કરવામાં આવી હતી, જેમને આ વિસ્તારમાં ગેરકાયદેસર વિસ્ફોટકોના સંગ્રહ વિશે માહિતી મળી હતી. પોલીસે જણાવ્યું હતું કે ટેકનિકલ દેખરેખ અને સ્થાનિક ગુપ્ત માહિતીએ સામગ્રીની હિલચાલ અને સંગ્રહને ટ્રેક કરવામાં મદદ કરી હતી, જેના કારણે આ સફળ કામગીરી શક્ય બની હતી.

અધિકારીઓએ વિસ્ફોટકોની સપ્લાય ચેઇનની તપાસ શરૂ કરી છે, જેમાં તેમના સ્ત્રોત અને સંભવિત ખરીદદારોને શોધવાનો સમાવેશ થાય છે. તેઓ એ પણ ચકાસી રહ્યા છે કે આ માલ મોટા પાયે ગેરકાયદેસર ખાણકામ અથવા અન્ય ગેરકાયદેસર પ્રવૃત્તિઓમાં ઉપયોગ માટે હતો કે કેમ.

"તપાસનો હેતુ આ વિસ્ફોટકોની ખરીદી, સંગ્રહ અને વિતરણમાં સામેલ તમામ લોકોની ઓળખ કરવાનો છે," એક વરિષ્ઠ અધિકારીએ જણાવ્યું. આરોપીને કોર્ટમાં રજૂ કરવામાં આવ્યો હતો અને પોલીસ કસ્ટડીમાં લેવામાં આવ્યો હતો, જ્યારે આગામી દિવસોમાં વધુ દરોડા અને પૂછપરછની અપેક્ષા છે.