શું વડોદરાવાસીઓ પુનઃ પૂરનો સામનો કરવો પડશે? આજવા ડેમમાં પાણીની સપાટી ભયજનક સપાટી નજીક

વર્ષાઋતુ ગુજરાતમાંથી વિદાય લેતા પહેલા તેની આખરી ઓવર્સમાં રાજ્યમાં અનેક વિસ્તારમાં અત્યંત ભારે વરસી રહ્યો છે. વડોદરા શહેરના અનેક નીચાણવાળા વિસ્તારમાં પાણી ભરાયા છે. આ સમસ્યા ઓછી હોય તેમ, શહેરની વચ્ચેથી પસાર થતી વિશ્વામિત્રી નદીના ઉપરવાસમાં ભારે વરસાદ છે. નદી પરના આજવા ડેમમાં પાણીની સપાટી ભયજનક નજીક પહોંચી ગઇ છે.   આજવામાં પાણીની સપાટી ૨૧૨.૯૪ ફૂટ છે, ભયજનક સપાટી ૨૧૪ ફૂટ છે, જિલ્લા વહિવટી તંત્ર મુજબ અગર પાણીની સપાટીમાં જો એક ફૂટ નો વધારો થશે,તો ડેમમાંથી પાણી છોડવું પડશે. જો કે તંત્રની માહિતી પ્રમાણે ડેમના ઉપરવાસમાં વરસાદ ઘટવાના કારણે આવક ઘટી છે, તેથી પાણી છોડવાની નોબત કદાચ ન પણ આવે.   શહેરના કાલાઘોડા સર્કલ પાસે પાણીની સપાટી ૨૦.૫૩ ફૂટ જેટલી થઇ ગઇ છે. જો આ સપાટીમાં વધારો થાય તો નીચાણવાળા વિસ્તાર જેમ કે, રાવપુરા, દાંડિયા બજાર, વાઘોડિયા રોડ, આજવા રોડ, ગોત્રી અને ગોરવા રોડ સહિત અનેક વિસ્તારમાં ભરાયેલા પાણીનું સ્તર વધશે, જે નાગરિકો માટે ચિંતા વધારશે.   આજવામાંથી પાણી છોડાય તે પહેલા અલ્કાપુરી અંડર બ્રિજમાં પાણી ભરાવાના કારણે વાહન વ્યવહાર માટે બંધ કરવામાં આવ્યો છે.