VADODARA : મ્યુનિ.કમિશનર સામે ઉગ્ર રજૂઆત કરનારા કોર્પોરેટરને શો કોઝ નોટિસથી ખળભળાટ

બે દિવસ પહેલા વડોદરા કોર્પોરેશનની સામાન્ય સભામાં મહા નાળાની સફાઇના મુદ્દાની રજૂઆતને લઇને કોપોરેટર આશિષ જોશી અને મ્યુનિ.કમિશનર દિલીપ રાણા વચ્ચે સભામાં જ તડાફડી થઇ હતી જેના પગલે વાચતાવરણ તંગ બની ગયું હતું અને મેયરને ચાલુ સામાન્ય સભા અધવચ્ચે જ અટકાવી દઇને સભાને મુલતવી કરવી પડી હતી આમ છતાં કોર્પોરેટર અને મ્યુનિ.કમિશનર વચ્ચે ઉગ્ર દલીલો થઇ હતી. હવે આ મામલે શહેર ભાજપ દ્વારા કોર્પોરેટર આશિષ જોશીને શો કોઝ નોટિસ આપવામાં આવી છે. 

મળેલી જાણકારી મુજબ શહેર ભાજપે કોર્પોરેટર આશિષ જોશીને શો કોઝ નોટીસ આપી છે. ભાજપના સુત્રોએ કહ્યું કે કોર્પોરેટર આશિષ જોશી વારંવાર ગેરશિસ્તભર્યું વલણ અપનાવે છે.2 દિવસ પહેલા કોર્પોરેશનની સામાન્ય સભામાં મ્યુનિ.કમિશનર સાથે ઉગ્ર બોલાચાલી થઇ છે તેને લઇને ગેરવર્તન દેખાયું છે અને આગામી 3 દિવસમાં નોટિસ આપીને ખુલાસો કરવા લેખીતમાં જણાવ્યું છે. ભાજપના સુત્રોએ કહ્યું કે ભાજપ શિસ્તબદ્ધ પાર્ટી તરીકે જાણીતી છે . કોર્પોરેટરની રજૂઆત હોય અને પ્રજાની લાગણી હોય તો સ્વભાવિક છે કે રજૂઆતો દરમિયાન બોલાચાલી થાય પણ સામેવાળાની ગરિમા જાળવી માન જાળવવું જોઇએ. કોર્પોરેટરોએ ચોક્કસ પોતાની રજૂઆત કરવી જોઇએ પણ સામેના અધિકારીની માન મર્યાદા જાળવી શોભનીય રીતે રજૂઆત કરવી જોઇએ.

બીજી તરફ આ બનાવ બાદ મ્યુ. કમિશનર સાથે ગેરવર્તણૂક મુદ્દે કાઉન્સિલર સભામાં માફી માગે તેવી મુખ્ય અધિકારીઓએ મેયરને રજૂઆત કરી છે. જ્યારે આગામી દિવસોમાં વિરોધ પ્રદર્શન કરવાનું નક્કી કરાયું છે.

ઉલ્લેખનિય છે કે પાલિકાની સભામાં ડભોઇ રોડના મહાનગરના નાળાની સફાઈ મુદ્દે મ્યુ. કમિશનર અને કાઉન્સિલર આશિષ જોષી વચ્ચે ઉગ્ર બોલાચાલી થઈ હતી. આશિષ જોષીના જણાવ્યા મુજબ 30 વર્ષથી નાળાની સફાઈ થઈ નથી.રૂપારેલ કાંસમાં ખોડિયાર નગર, આજવા રોડ, વાઘોડિયા રોડ તથા કોઠી વિસ્તારથી પાણી આવે છે. ગાજરાવાડી એસટીપીમાંથી પણ પાણી છોડાય છે. નાળું સાફ નહીં થયું હોવાથી પાણી ઊભરાય છે. જોકે સભામાં ઉગ્ર રજૂઆત થતાં મેયર સહિતના પદાધિકારીઓ સ્થળે દોડી ગયા હતા. જ્યારે મંગળવારે સવારે પોકલેન મશીનથી નાળાની સફાઈ શરૂ કરાઈ હતી. પાણી ઉલેચવા પંપ પણ મૂકાયો હતો. સાંજ સુધીમાં 3 ટ્રેક્ટર જેટલો કચરો નીકળ્યો હોવાનું જાણવા મળ્યું છે.