Vadodara : સત્તાના મદમાં મતદારો પર દાદાગીરી!, Video Viral

વડોદરાના પોર ગામે એક ચોંકાવનારી ઘટના સામે આવી છે, જ્યાં તાલુકા પંચાયતના પ્રમુખ અંકિતા પરમારના પતિ રોનક પરમારની દાદાગીરી કેમેરામાં કેદ થઈ ગઈ છે. જે લોકોના મત મેળવીને તેમણે સત્તા હાંસલ કરી, તે જ મતદારો સાથે મારામારી કરતા રોનક પરમારનો વિડીયો વાયરલ થતાં ખળભળાટ મચી ગયો છે.

ઘટનાની વિગત એવી છે કે પોર ગામમાં ડ્રેનેજ લાઇન નાખ્યા બાદ પેવર બ્લોક નાખવાની કામગીરી ચાલી રહી હતી. આ કામગીરી દરમિયાન સ્થાનિક લોકોએ વિરોધ નોંધાવ્યો હતો, જેના કારણે તંગદિલી સર્જાઈ હતી. ચર્ચા એવી પણ છે કે પેવર બ્લોક નાખવાના કામમાં વેઠ ઉતારવામાં આવી રહી હતી, જેના કારણે લોકો રોષે ભરાયા હતા.

આ દરમિયાન, તાલુકા પંચાયત પ્રમુખ અંકિતા પરમારની હાજરીમાં તેમના પતિ રોનક પરમાર ગુસ્સે ભરાયા હતા અને સ્થાનિક લોકો સાથે મારામારી પર ઉતરી આવ્યા હતા. તેમની આ દાદાગીરીની સમગ્ર ઘટનાનો લાઈવ વિડીયો સામે આવતા લોકો સ્તબ્ધ થઈ ગયા છે. સત્તાના મદમાં ચૂંટાયેલા પ્રતિનિધિના પતિ દ્વારા મતદારો સાથે કરવામાં આવેલો આ વર્તાવ ભારે નિંદનીય છે અને લોકોમાં આ ઘટનાને લઈને ભારે રોષ જોવા મળી રહ્યો છે. આ ઘટનાએ સ્થાનિક રાજકારણમાં ગરમાવો લાવી દીધો છે.