Vadodara : હરણી બોટકાંડના આરોપીઓને કોર્ટનો મોટો ફટકો! ડિસ્ચાર્જ અરજી નામંજૂર

વડોદરાના ચકચારી હરણી બોટકાંડ મામલે આરોપીઓને વડોદરા કોર્ટે મોટો ઝટકો આપ્યો છે. આ દુર્ઘટનાના 20 આરોપીઓમાંથી 15 આરોપીઓએ કોર્ટમાં ડિસ્ચાર્જ અરજી મૂકી હતી, જેને નામદાર કોર્ટે ફગાવી દીધી છે. આરોપીઓએ પોતાની અરજીમાં દાવો કર્યો હતો કે આ દુર્ઘટનામાં તેમની કોઈ ભૂમિકા નથી અને તેઓ નિર્દોષ છે. કેસ શરૂ થાય તે પહેલાં જ તેઓને ડિસ્ચાર્જ કરવાની માંગણી તેમણે કોર્ટ સમક્ષ કરી હતી.

જો કે, નામદાર કોર્ટે આરોપીઓની આ દલીલોને માન્ય રાખી નથી. સરકારી વકીલ અનિલ દેસાઈએ જણાવ્યું હતું કે કોર્ટે સ્પષ્ટપણે કહ્યું છે કે જો આરોપીઓ લેક ઝોનની ભાગીદારીમાં નફાના ભાગીદાર હતા, તો તેઓ જવાબદારીમાં પણ સરખા ભાગીદાર ગણાશે. આથી કોર્ટે તમામ 15 આરોપીઓની ડિસ્ચાર્જ અરજી નામંજૂર કરી દીધી છે અને તેઓને ડિસ્ચાર્જ આપવાનો ઇન્કાર કર્યો છે.

ઉલ્લેખનીય છે કે, વડોદરાના હરણી તળાવમાં 18 જાન્યુઆરી, 2024 ના રોજ એક દુઃખદ ઘટના બની હતી, જેમાં એક બોટ પલટી જતાં 12 બાળકો અને 2 શિક્ષકો સહિત 14 લોકોનાં મૃત્યુ થયા હતા. આ ઘટના ત્યારે બની જ્યારે ન્યૂ સનરાઈઝ સ્કૂલના વિદ્યાર્થીઓ અને શિક્ષકો પિકનિક માટે તળાવમાં બોટિંગ કરી રહ્યા હતા.

ડિસ્ચાર્જ અરજી કરનાર આરોપીઓના નામ આ પ્રમાણે છે

ગોપાલ દાસ પ્રાણલાલ શાહ, બીનીત હિતેશ કોટીયા, નિલેશભાઈ કાંતિલાલ શાહ, અલ્પેશ હસમુખ ભટ્ટ, દીપેન હિતેન્દ્ર શાહ, ધર્મિલ ગીરીશભાઈ શાહ, શાંતિલાલ ઈશ્વરભાઈ સોલંકી, વેદપ્રકાશ રામપથ યાદવ, રશ્મિકાન્ત ચીમન ભાઈ પ્રજાપતિ, ભીમસિંહ યાદવ, જતીનકુમાર હીરાલાલ દોશી, તેજલબેન આશિષભાઈ દોશી, નેહા બેન દીપેન દોશી, વૈશાખી બેન પરેશ ભાઈ શાહ, અને નૂતનબેન પરેશ શાહ.

સરકારી વકીલ અનિલ દેસાઈએ આ નિર્ણયને પીડિતો માટે ન્યાયની દિશામાં એક મહત્વપૂર્ણ પગલું ગણાવ્યું છે. હવે આ કેસની આગળની કાર્યવાહી પર સૌની નજર રહેશે.