વેકેશન થયું પૂરું! ગુજરાતમાં આજથી શાળાઓમાં બાળકોનો કલરવ 

અમદાવાદ: શાળા-કોલેજ અને યુનિ.ઓમાં 21 દિવસનું દિવાળી વેકેશન પૂર્ણ થઈ ગયું છે અને ગુજરાત શિક્ષણ બોર્ડ હેઠળની રાજ્યની તમામ સરકારી, ગ્રાન્ટેડ અને ખાનગી સહિતની ધોરણ 1થી 12ની શાળા તેમજ રાજ્યની સરકારી યુનિવર્સીટીઓના ભવનો તેમજ કોલેજો આજથી રાબેતા મુજબ શરૂ થઈ ચુક્યા છે.   આજથી બીજા સેમેસ્ટરની શરૂઆત થઇ ચુકી છે. જયારે ગુજરાત શિક્ષણ બોર્ડ દ્વારા 5મી જુલાઇ 2024એ વર્ષ 2024-25નું શૈક્ષણિક કેલેન્ડર જાહેર કર્યું હતું. જેમાં શિક્ષણના દિવસો, પરીક્ષાની તારીખ અને વેકેશનની તારીખના દિવસો પણ જાહેર કરી દેવામાં આવ્યા હતા. એકેડેમિક કેલેન્ડર પ્રમાણે 18મી નવેમ્બરથી શરૂ થનારા બીજા શૈક્ષણિક સત્રમાં કુલ 135 દિવસ શિક્ષણ કાર્ય કરવામાં આવશે.   મહત્વની વાત એ છે કે, બોર્ડની પરીક્ષા વહેલા યોજાવાની હોવાથી સ્કૂલમાં બીજી પરીક્ષા પણ એક સપ્તાહ વહેલા યોજાશે. વેકેશન પૂર્ણ થતાં વિદ્યાર્થીઓ ઉત્સાહભેર સ્કૂલોમાં ફરીથી આવ્યા છે.મિત્રો અને શિક્ષકોને મળ્યા બાદ વિદ્યાર્થીઓ ખુશ જોવા મળ્યા હતા.   ગુજરાત માધ્યમિક અને ઉચ્ચતર માધ્યમિક શિક્ષણ બોર્ડ 2025 માં ધોરણ 10 અને ધોરણ 12 ની બોર્ડની પરીક્ષા 27 ફેબ્રુઆરી 2025થી 13 માર્ચ 2025 સુધી ચાલશે. GSHSEB દ્વારા જાહેર કરાયેલા વાર્ષિક કેલેન્ડર અંતર્ગત ઉનાળુ વેકેશન 35 દિવસનું રહેશે.