VADODARA : મુખ્યમંત્રી સામે 2 મહિલાની રજૂઆત, સીએમએ કહ્યું તમે કોઇ એજન્ડાથી આવ્યા છો

વિશ્વામિત્રી પ્રોજેક્ટની કામગિરીનું નિરીક્ષણ કરવા તથા વડોદરામાં 1156 કરોડના વિકાસના કામોનું લોકાર્પણ અને ખાતમૂહુર્ત કરવા આજે વડોદરા ગયેલા મુખ્યમંત્રી સમક્ષ હરણી બોટકાંડની પીડિત મહિલાઓએ કાર્યક્રમમાં જ ઉભા થઇને રજૂઆતો કરતાં સન્નાટો છવાઇ ગયો હતો. બંને મહિલાઓએ ઉભા થઇને મુખ્યમંત્રી સમક્ષ કહ્યું કે દોઢ વર્ષથી અમે ધક્કા ખાઇ રહ્યા છીએ. 

 

વિકાસના કામોના કાર્યક્રમમાં જ્યારે મુખ્યમંત્રી ભૂપેન્દ્ર પટેલ પોતાનું સંબોધન કરી રહ્યા હતા ત્યારે હોલમાં બેઠેલી 2 મહિલા અચાનક ઉભી થઇ હતી અને રજૂઆતો કરવા માંડી હતી. બંને મહિલાઓએ કહ્યું કે દોઢ વર્ષથી અમે ફક્ત ધક્કા ખાઇ રહ્યા છે, તમને કોઇ મળવા દેતું નથી. જો કે મુખ્યમંત્રીએ તે વખતે બંનેની વાત સાંભળી ન હતી અને કહ્યું કે જો કોઇ ફરિયાદ હોય તો રૂબરૂ આવીને મળજો ત્યારે બંને મહિલાઓએ કહ્યું કે તમને કોઇ મળવા દેતું નથી. મુખ્યમંત્રીએ એમ પણ કહ્યું કે તમે કોઇ એજન્ડા સાથે આવ્યા છો. દર સોમવારે મુખ્યમંત્રી બધાને મળે જ છે. મુખ્યમંત્રીએ બીજી વખત કહ્યું કે તમે કોઇ તેમના પર ધ્યાન ના આપશો, તે એજન્ડા સાથે આવ્યા છે. ત્યારબાદ પોલીસ આ મહિલાઓ પાસે ધસી ગઇ હતી અને બંનેને બેસાડી દીધી હતી. ત્યારબાદ મામલો થાળે પડ્યો હતો.

 

 

 કાર્યક્રમ પૂર્ણ થયા બાદ મુખ્યમંત્રીએ બંને મહિલાને બોલાવી હતી અને બંનેની રજૂઆતો સાંભળી હતી. જો કે સભા હોલમાં બંને મહિલાઓએ જે રીતે ઉભા થઇને રજૂઆતો કરી તે સાંભળતાં જ હોલમાં સન્નાટો પ્રસરી ગયો હતો. પોલીસ અને અધિકારીઓ પણ સ્તબ્ધ થઇ ગયા હતા કે બંને મહિલાઓ હોલમાં આવી કઇ રીતે. સ્પીચ પૂર્ણ થતાં બંને મહિલાઓ ફરી ઉભી થઈ હતી અને રજૂઆતનો પ્રયાસ કરતા પોલીસ બંને મહિલાઓને બળજબરીથી પકડીને બહાર લઈ ગઈ હતી. બાદમાં મુખ્યમંત્રીએ બંને મહિલાઓને મળવા બોલાવી હતી.

આ પણ વાંચો--- SURAT : શિક્ષીકાનો દાવો, પોતાના ગર્ભમાં રહેલું બાળક તેના સગીર પ્રેમીનું..

સમાચાર મેળવવા આજે જ અમારી WAHTSAPP ચેનલ સાથે જોડાવ