ગુજરાતના વાતાવરણમાં ફરી એકવાર મોટો પલટો જોવા મળ્યો છે. વેસ્ટર્ન ડિસ્ટર્બન્સની સક્રિયતાને કારણે રાજ્યના અનેક જિલ્લાઓમાં ધૂળની ડમરીઓ અને ભારે પવન સાથે કમોસમી વરસાદ ખાબક્યો છે. હવામાન વિભાગ દ્વારા આજે અને આવતીકાલે એમ બે દિવસ માટે રાજ્યના વિવિધ ભાગોમાં માવઠાની આગાહી કરવામાં આવી છે, જેનાથી જનજીવન પ્રભાવિત થયું છે.
ભારે પવન અને ધૂળની આંધીથી જનજીવન અસ્તવ્યસ્ત :&nbsp;
આજ સવારથી જ અમદાવાદ સહિત ઉત્તર ગુજરાત અને સૌરાષ્ટ્ર-કચ્છમાં વાતાવરણના મિજાજમાં પલટો આવ્યો હતો. પવનની ગતિ એટલી તેજ હતી કે અનેક સ્થળોએ હોર્ડિંગ્સ અને મકાનોના છાપરા ઉડવાની ઘટનાઓ બની હતી. અમદાવાદમાં વહેલી સવારે ધૂળની ડમરીઓને કારણે વિઝિબિલિટીમાં ઘટાડો થતા વાહન ચાલકો મુશ્કેલીમાં મુકાયા હતા. સલામતીના ભાગરૂપે અનેક વિસ્તારોમાં વીજ પુરવઠો ખોરવી દેવામાં આવતા અંધારપટ્ટ છવાઈ ગયો હતો.
કચ્છ અને ઉત્તર ગુજરાતમાં વરસાદી માહોલ :&nbsp;
કચ્છના ભુજ, નખત્રાણા, માંડવી અને ભચાઉ સહિતના વિસ્તારોમાં ગાજવીજ સાથે વરસાદી ઝાપટાં પડ્યા હતા. પાટણ અને મહેસાણામાં પણ મિની વાવાઝોડા જેવી સ્થિતિ સર્જાઈ હતી. બનાસકાંઠાના ધાનેરા અને દાંતીવાડા પંથકમાં વરસાદ પડતા ખેતીના પાકને મોટું નુકસાન થવાની ભીતિ સેવાઈ રહી છે. સુરેન્દ્રનગર જિલ્લામાં પણ સવારથી જ મેઘરાજાની એન્ટ્રી થતા વાતાવરણમાં ઠંડક પ્રસરી છે પરંતુ સાથે જ અફરાતફરીનો માહોલ જોવા મળ્યો છે.
ખેડૂતોની ચિંતામાં વધારો: રવિ પાક અને બાગાયતી ખેતીને ફટકો
કમોસમી વરસાદ અને તેજ પવનને કારણે સૌથી વધુ નુકસાન ખેતી ક્ષેત્રે થવાની શક્યતા છે. હાલમાં શિયાળુ પાક જેવા કે ઘઉં અને બટાકાની કાપણીનો સમય છે, ત્યારે જ વરસાદ પડતા ખેડૂતોના મોં સુધી આવેલો કોળિયો છીનવાઈ જવાની ભીતિ છે. આ ઉપરાંત, બાગાયતી ખેતીમાં ખાસ કરીને કેરી પકવતા ખેડૂતો ભારે મુશ્કેલીમાં છે. તેજ પવનને કારણે આંબા પરથી કાચી કેરીઓ ખરી પડી છે, જે આર્થિક રીતે મોટો ફટકો સાબિત થઈ શકે છે.
હવામાન વિભાગના જણાવ્યા અનુસાર, ૨૦ માર્ચ સુધી બનાસકાંઠા, સાબરકાંઠા, અરવલ્લી, દાહોદ અને મહીસાગર સહિતના વિસ્તારોમાં વરસાદી માહોલ જળવાઈ રહેશે.&nbsp;

ગુજરાત કમોસમી વરસાદ આગાહી

વેસ્ટર્ન ડિસ્ટર્બન્સને લીધે બનાસકાંઠા, કચ્છ અને અમદાવાદ સહિતના વિસ્તારોમાં માવઠું

March 19, 2026 | 12:15 IST