ગુજરાત નેશનલ લૉ યુનિવર્સિટીને બોમ્બથી ઉડાવી દેવાની ધમકી મામલે બે શખ્સો ઝડપાયા

ગાંધીનગર: ગાંધીનગરના રાયસણ સ્થિત ગુજરાત નેશનલ લૉ યુનિવર્સિટીને બોમ્બથી ઉડાવી દેવાની ધમકીભર્યા મેઈલ મામલે  ગાંધીનગર પોલીસે સાયબર એક્સપર્ટની મદદથી રાજસ્થાનના જયપુરથી બે યુવકોને પકડી ગાંધીનગર લાવી પૂછપરછ શરૂ કરી છે.

GNLUને બોમ્બથી ઉડાવી દેવાની બે વખત ધમકી મળી હતી. રાષ્ટ્રીય સ્તરની સંસ્થાને ગંભીર ધમકી આપતી વખતે તાલિબાનનો ઉલ્લેખ કરવામાં આવ્યો હતો. આતંકવાદી સંગઠનોના નિશાના પર આ સંસ્થા હોવાનું મેઈલ પરથી જણાતા સમગ્ર યુનિવર્સિટી કેમ્પસ ખાલી કરાવાયુ હતું. GNLU કેમ્પસની ચકાસણી ઉપરાંત મેઈલ મોકલનારનું પગેરું શોધવા પોલીસે ટેકનિકલ સર્વેલન્સ ચાલુ કરી દીધુ હતું.

પોલીસે તપાસમાં મેઈલને ટ્રેસ કરવા સાયબર એક્સપર્ટને સાથે રાખ્યા હતા. ધમકીનો પ્રથમ મેઈલ મળ્યો હોવાની જાણ થતાં જ પોલીસે ગૂગલનો સંપર્ક કર્યો હતો. આતંકવાદી કૃત્ય હોવાની આશંકા વ્યક્ત કરાતાં ગૂગલ તરફથી આઈપી એડ્રેસ અને મોબાઈલ નંબર શેર થયા હતા. 

મોબાઈલ નંબરના આધારે પોલીસની એક ટીમ તપાસ માટે જયપુર પહોંચી ગઈ હતી. જયપુરમાં પોલીસ શકમંદ સુધી પહોંચે તે પહેલાં બીજો મેઈલ આવ્યો હતો. જેથી ફરી ગૂગલ પાસે મદદ માગવામાં આવી હતી. આ કિસ્સામાં અગાઉ ધમકી આપનારા મેઈલવાળો મોબાઈલ નંબર જ નીકળ્યો હતો. તેથી પોલીસે જયપુરમાં તપાસ કરીને મોબાઈલ નંબરનો ઉપયોગ કરનારનો પત્તો મેળવ્યો હતો. જો કે મોબાઈલ જે યુવકના નામે હતો અને તેનો ઉપયોગ અન્ય યુવકે કર્યો હતો તેવું પોલીસ તપાસમાં જાણવા મળ્યું હતું.

બંને યુવકને જયપુરથી પકડી ગાંધીનગર લાવી પૂછપરછ હાથ ધરાઈ છે. anonymousemail.me ७५२थी ઈમેઈલ GNLUને મોકલાયો હતો. જેમાં જણાવ્યુ હતું કે, ગઈકાલે રાત્રે (રવિવારે) તમને જોવાની મજા આવી ગઈ. જો તમારે તમારી જિંદગી બચાવવી હોય તો આજ રાત સુધીમાં કેમ્પસ ખાલી કરી દો. નહીંતર ગઈકાલે જે બોમ્બની બેગ તમે નથી શોધી શક્યા તે તમારી પાસે પહોંચી જશે. મારા માણસો હેન્ડ ગ્રેનેડ અને સ્નાઈપર ગન સાથે કેમ્પસની બહાર સિક્રેટ લોકેશન પર જ છે. માત્ર એક જ ઈશારે તમારી જિંદગી ખતમ થઈ જશે. તમારી ઓથોરિટીને જાણ કરી દો. કેમ્પસની બહાર વિદ્યાર્થીઓના લોકેશનની અમને જાણ છે.

રવિવારે થયેલા ઈ-મેઈલમાં શું હતું? 
આખા GNLU કેમ્પસ અને નજીકની PDPU યુનિવર્સિટીમાં બોમ્બ મૂકવામાં આવ્યા છે. જેની જાણકારી કેટલાક વિદ્યાર્થીઓના EMAIL પર મોકલી દેવાઈ છે. ઓથોરિટી સહિત તમામ વિદ્યાર્થીઓ એક દિવસમાં કેમ્પસ ખાલી કરી દો નહીં તો આવતીકાલની રાતથી તેના પરિણામો માટે તૈયાર રહેજો.

જો તમારા તરફથી કોઈ શંકાસ્પદ પ્રવૃત્તિ ધ્યાનમાં આવશે તો મારા માણસો દ્વારા તે મુજબ કાર્યવાહી કરવામાં આવશે. કોઈપણ એવી પ્રવૃત્તિ ના કરતા જેનાથી ઓથોરિટીનું ધ્યાન તેના પર જાય. હું ફરીથી કઈ દઉ કે, અમારી તમારા પર નજર છે. બોમ્બના લોકેશન તમને ત્યારે જ જણાવીશું જ્યારે આખું કેમ્પસ ખાલી થશે. મેમ્બર ઓફ તાલિબાન.