કચ્છના છારી ઢંઢમાં કુંજનો શિકાર કરનાર ત્રિપુટી ઝડપાઈ

કચ્છના છારી ઢંઢમાં કુંજ પક્ષીઓના શિકાર કરનાર ત્રણ આરોપીની પોલીસે ધરપકડ કરી છે. બંદૂકના ભડાકે ૨૫ કુંજ પક્ષીનો શિકાર કરીને પોલીસને ચકમો આપી નાસી છૂટેલી શિકારી ત્રિપુટીને પોલીસે ઝડપી પાડી છે.ઝડપાયેલાં ત્રણેય આરોપી ભુજના રહેવાસી હોવાનું સામે આવ્યું છે. બાતમીના આધારે મંગળવારે બપોરે નિરોણા પોલીસે છારી ઢંઢમાં તપાસ હાથ ધરતાં પોલીસને જોઈને આરોપી બોલેરો પીક અપ લઇને ભાગી ગયા હતા.

પોલીસે જીપની તલાશી લેતાં તેમાંથી  શિકાર કરેલાં ૨૫ કુંજ પક્ષીના મૃતદેહ એક દેશી બંદૂક, ખાલી અને જીવતાં કારતૂસ, એક મોબાઈલ ફોન મળી આવ્યાં હતાં. નિરોણા પોલીસને બાતમી મળી હતી કે આરોપી ફરીવાર શિકાર કરવા માટે આજ વિસ્તારમાં આવ્યા છે. જેના આધારે પોલીસે તપાસ કરતા ત્રણ આરોપીને ઝડપી પાડયા છે જ્યારે એક ફરાર આરોપીની શોધખોળ હજુ ચાલુ છે. હાલ પોલીસે આરોપી અર્શદ કાસમ ગગડા , મોહસીન મામદ ગગડા  અને ભીલાલ રમજુ ગગડાની ધરપકડ કરી વધુ તપાસ હાથ ધરી છે.

કચ્છના નખત્રાણાના તાલુકામાં આવેલ છારી ઢંઢને ગુજરાત એક માત્ર કન્ઝર્વેશન રિઝર્વ તરીકે જાહેર કરવામાં આવ્યું છે...છારી ઢંઢ દેશ વિદેશના પક્ષીઓ માટે આશ્રય સ્થાન બન્યું છે. કુંજ (કોમન ક્રેન) પક્ષી વાઈલ્ડ લાઈફ પ્રોટેક્શન એક્ટના શિડ્યુલ્ડ 1ની શ્રેણીમાં આવતું સંરક્ષિત પક્ષી છે. આરોપીઓએ 25 જેટલા કુંજ પક્ષીઓનો શિકાર કર્યો હતો. હાલ નિરોણા પોલીસે ત્રણેય આરોપીની ધરપકડ કરી આ મામલે વન વિભાગ જાણ કરી છે. હવે પોલીસ બાદ શિકારી વિરુદ્ધ વન વિભાગ અલગથી ગુન્હો નોંધી કાર્યવાહી હાથ ધરશે.