સુરતમાં કરુણાંતિકા : 11 દિવસ સુધી મોત સામે લડ્યા બાદ આખરે મંત્રએ લીધા અંતિમ શ્વાસ

સુરતમાં એક હૃદયદ્રાવક ઘટના બની છે, જેણે શહેરભરમાં શોકની લાગણી ફેલાવી દીધી છે. સીમાડા વિસ્તારમાં રહેતા અને મૂળ અમરેલીના સાવરકુંડલાના એક પરિવારના 12 વર્ષીય દીકરા મંત્ર અકબરીનું સારવાર દરમિયાન કરુણ અવસાન થયું છે. મંત્ર તેના માતા-પિતાનું એકમાત્ર સંતાન હતો અને ધોરણ-6 માં અભ્યાસ કરતો હતો.

આ દુર્ઘટના ત્યારે બની જ્યારે મંત્ર તેના મિત્રો સાથે સોસાયટીમાં નીચે રમી રહ્યો હતો. અચાનક જ પાંચમા માળેથી પીડબ્લ્યુડીનો એક પોપડો તૂટીને તેના માથા પર પડ્યો હતો. આ અકસ્માતમાં મંત્રને ગંભીર ઈજાઓ પહોંચી હતી અને તે ઘટના સ્થળે જ ઢળી પડ્યો હતો. આ ભયાનક ઘટના CCTV કેમેરામાં પણ કેદ થઈ ગઈ હતી.

મંત્રના પિતા નોકરી કરે છે અને માતા ગૃહિણી છે. પોતાના એકમાત્ર દીકરાને ગુમાવ્યા બાદ આખા પરિવાર પર દુઃખનો પહાડ તૂટી પડ્યો છે. 11 એપ્રિલના રોજ બનેલી આ ઘટના બાદ મંત્રને તાત્કાલિક સારવાર માટે બે ખાનગી હોસ્પિટલોમાં ખસેડવામાં આવ્યો હતો. જો કે, 11 દિવસ સુધી મોત સામે લડ્યા બાદ આખરે તેણે અંતિમ શ્વાસ લીધો.

આ કરુણ ઘટના અંગે સરથાણા પોલીસે નોંધ કરી તપાસ શરૂ કરી છે. પ્રાથમિક તપાસમાં બિલ્ડર દ્વારા નબળી ગુણવત્તાનું મટીરીયલ વાપરવામાં આવ્યું હોવાની આશંકા વ્યક્ત કરવામાં આવી રહી છે. જો બિલ્ડરોએ બાંધકામમાં યોગ્ય ગુણવત્તા વાળો સામાન વાપર્યો હોત તો કદાચ આ દુર્ઘટના ટાળી શકાઈ હોત.

આ ઘટનાએ ફરી એકવાર શહેરના નબળા બાંધકામ અને તંત્રની બેદરકારી સામે સવાલો ઉભા કર્યા છે. એક માસૂમ બાળકની જિંદગી એક ખખડધજ પોપડાના કારણે સમાપ્ત થઈ ગઈ, જે દર્શાવે છે કે બાંધકામની ગુણવત્તાને લઈને કેટલી ગંભીર બેદરકારી દાખવવામાં આવી રહી છે. હવે જોવાનું એ છે કે પોલીસ તપાસમાં શું તથ્યો સામે આવે છે અને આ ઘટના માટે જવાબદાર લોકો સામે શું કાર્યવાહી કરવામાં આવે છે. હાલ તો મંત્રના પરિવાર પર આભ તૂટી પડ્યું છે અને સમગ્ર વિસ્તારમાં શોકની લાગણી છવાયેલી છે.