LPG-PNG કનેક્શન ધરાવનારોએ સિલિન્ડર જમા કરાવવો પડશે

ગુજરાત રાજ્યના પુરવઠા વિભાગ દ્વારા LPG અને PNG કનેક્શન ધરાવતા ગ્રાહકો માટે અત્યંત મહત્વપૂર્ણ સૂચના જાહેર કરવામાં આવી છે. રાજ્યના પુરવઠા સચિવ મોના ખંધારે સ્પષ્ટ કર્યું છે કે જે પરિવારો પાસે પાઇપલાઇન ગેસ (PNG) અને બોટલ ગેસ (LPG) એમ બંને કનેક્શન છે, તેમણે તાત્કાલિક અસરથી પોતાનો એલપીજી સિલિન્ડર જમા કરાવવો પડશે. આ માટે આગામી બુધવાર સુધીની અંતિમ સમયમર્યાદા નક્કી કરવામાં આવી છે.

ડેટા વેરિફિકેશન અને સરેન્ડર પ્રક્રિયા : 

કેન્દ્ર સરકારની માર્ગદર્શિકા મુજબ હવે કોઈ પણ ગ્રાહક એકસાથે પીએનજી અને એલપીજી કનેક્શન રાખી શકશે નહીં. હાલમાં તમામ ગેસ એજન્સીઓ પીએનજી અને એલપીજી ગ્રાહકોના ડેટાનું ક્રોસ-વેરિફિકેશન કરી રહી છે. જો કોઈ ગ્રાહક પાસે બંને સુવિધા જણાશે, તો તેમણે ફરજિયાતપણે એલપીજી સિલિન્ડર સરેન્ડર કરવાની પ્રક્રિયા પૂર્ણ કરવાની રહેશે. આ નિયમનો હેતુ ગેસ વિતરણ વ્યવસ્થામાં પારદર્શિતા લાવવાનો અને જરૂરિયાતમંદો સુધી રાંધણ ગેસ પહોંચાડવાનો છે.

કોમર્શિયલ ગેસ ધારકો માટે રાહતના સમાચાર : 

મુખ્યમંત્રી ભૂપેન્દ્ર પટેલે કોમર્શિયલ એલપીજી લાયસન્સ ધરાવતા ઉદ્યોગકારો અને સંસ્થાઓ માટે એક મહત્વનો નિર્ણય લીધો છે. હવે કોમર્શિયલ લાયસન્સ ધારકો પણ પીએનજી કનેક્શન મેળવી શકશે. આ ઉપરાંત, વિવિધ ક્ષેત્રો માટે ગેસ સપ્લાયની મર્યાદા પણ નક્કી કરવામાં આવી છે:

ફાર્મા, ડેરી અને રેલ્વે કેન્ટીન: આ ક્ષેત્રોને 70 ટકાની મર્યાદામાં એલપીજી આપવામાં આવશે.

હોટલ અને રેસ્ટોરન્ટ: ધાબા અને હોટલ ઉદ્યોગને 10 ટકાની મર્યાદામાં ગેસ પૂરો પાડવામાં આવશે.

ધાર્મિક સંસ્થાઓ: જે સંસ્થાઓ છેલ્લા એક વર્ષથી અન્નક્ષેત્ર ચલાવી રહી છે તેમને 10 ટકાની મર્યાદામાં ગેસ સપ્લાય મળશે.

વૃદ્ધાશ્રમો: અહીં પણ કોમર્શિયલ ગેસ પૂરો પાડવાની વ્યવસ્થા કરવામાં આવી છે.

ગ્રામ્ય વિસ્તારો માટે કેરોસીનની વધારાની ફાળવણી : 

કેન્દ્ર સરકારના પેટ્રોલિયમ મંત્રાલયે ગુજરાત માટે વધારાનો 1452 કિલો લીટર કેરોસીનનો જથ્થો મંજૂર કર્યો છે. આ જથ્થો ખાસ કરીને ગ્રામ્ય વિસ્તારોમાં ઇંધણના વિકલ્પ તરીકે વાપરવા માટે આપવામાં આવશે. દરેક જિલ્લા કલેક્ટરને 36,000 લીટર કેરોસીન ફાળવવામાં આવ્યું છે. નવી માર્ગદર્શિકા મુજબ, સામાન્ય પરિવાર દીઠ 5 લીટર અને સેવાકીય સંસ્થાઓને 25 લીટર સુધી કેરોસીન મળી શકશે.

નવા નિયમોનું પાલન અનિવાર્ય : 

નોંધનીય છે કે જે ઘરોમાં પીએનજી કનેક્શન કાર્યરત છે, ત્યાં હવે નવો ઘરેલુ એલપીજી સિલિન્ડર બુક કરાવી શકાશે નહીં. સરકારે જિલ્લા કલેક્ટરોને પીએનજી નેટવર્કને પ્રાધાન્ય આપવા અને તમામ પ્રક્રિયાનું સંકલન કરવા સૂચના આપી છે. ગ્રાહકોએ સમયમર્યાદામાં પોતાની ગેસ એજન્સીનો સંપર્ક કરી નિયમોનું પાલન કરવાનું રહેશે.