ગુજરાતમાં ચાર વર્ષમાં આ વર્ષે સૌથી ઓછો વરસાદ!

રાજ્યમાં છેલ્લાં ચાર વર્ષમાં આ વર્ષે સૌથી ઓછો વરસાદ થયો છે. આ વર્ષે અત્યાર સુધીમાં સરેરાશ 185 મીમી એટલે કે 20 ટકા વરસાદ થયો છે. છેલ્લા ચાર વર્ષ દરમિયાન 7 જુલાઈ સુધીમાં જોઈએ તો વર્ષ 2023માં 108 ટકા, વર્ષ 2024માં 143 ટકા અને વર્ષ 2025માં 128 ટકા વરસાદ વરસ્યો હતો.

સૌરાષ્ટ્રમાં સૌથી વધુ, કચ્છમાં સૌથી ઓછો વરસાદ
આ વર્ષના વરસાદની વાત કરીએ તો અત્યાર સુધીમાં સૌથી વધુ વરસાદ સૌરાષ્ટ્ર ઝોનમાં 26 ટકા અને સૌથી ઓછો વરસાદ કચ્છમાં 2 ટકા વરસાદ વરસ્યો છે. જ્યારે દક્ષિણ ઝોનમાં 25 ટકા, મધ્ય ઝોનમાં 15 ટકા અને ઉત્તર ઝોનમાં 12 ટકા વરસાદ થયો છે. 

જૂનાગઢ અને અમરેલીમાં સૌથી વધુ વરસાદ
રાજ્યમાં અત્યાર સુધીના વરસાદની સમીક્ષા કરીએ તો સૌથી વધુ જૂનાગઢ જિલ્લાના સરેરાશ 445 મીમી એટલે કે 42.55 ટકા વરસાદ ખાબક્યો છે. જૂનાગઢ જિલ્લામાં ચોમાસા દરમિયાન સરેરાશ 1045 મીમી વરસાદ વરસતો હોય છે. બીજા નંબરે અમરેલી જિલ્લામાં 296 મીમી એટલે કે 42.53 ટકા વરસાદ થયો છે. સૌથી ઓછો દેવભૂમિ દ્વારકામાં 8 મીમી એટલે કે 0.92 મીમી વરસાદ થયો છે. બાકીના જિલ્લાઓમાં સરેરાશ 2 ટકાથી લઈને 38 ટકા સુધીનો વરસાદ નોંધાયો છે.

રાજ્યના 261 તાલુકામાંથી 38 તાલુકામાં 0 થી 50 મીમી, 95 તાલુકામાં 51 થી 125 મીમી, 71 તાલુકામાં 126 થી 250 મીમી, 32 તાલુકામાં 251 થી 500 મીમી, 24 તાલુકામાં 501 થી 1000 મીમી અને 1 તાલુકામાં 1000 મીમીથી વધુ વરસાદ થયો છે.

24 કલાક દરમિયાન 225 તાલુકામાં વરસાદ
છેલ્લાં 24 કલાક દરમિયાન વરસાદની સ્થિતિ જોઈએ તો 34 જિલ્લાના 225 તાલુકામાં સરેરાશ 28.90 મીમી વરસાદ નોંધાયો છે. છેલ્લાં 24 કલાક દરમિયાન 177 તાલુકામાં 0 થી 50 મીમી, 32 તાલુકામાં 51 થી 100 મીમી, 11 તાલુકામાં 101 થી 150 મીમી, 4 તાલુકામાં 151 થી 200 મીમી, 1 તાલુકામાં 201 થી 250 મીમી વરસાદ પડ્યો છે. જ્યારે 43 તાલુકા કોરાધાકોર રહ્યા છે.

છેલ્લાં 24 કલાક દરમિયાન સૌથી વધુ વરસાદ વલસાડના વાપીમાં 218 મીમી, સુરતના કામરેજમાં 164 મીમી, વલસાડના પારડીમાં 161 મીમી, વલસાડના ઉમરગામમાં 159 મીમી અને ભાવનગરના ઘોઘામાં 156 મીમી વરસાદ ખાબક્યો છે.

જ્યારે મંગળવાર સવારથી સુરત, તાપી અને ડાંગ જિલ્લામાં ધોધમાર વરસાદ શરૂ થયો હતો. જેમાં ડાંગના સુબીર, સુરતના કામરેજ, તાપીના વાલોડમાં સવારના 6 થી 10 વાગ્યા સુધીમાં 4 ઈંચ વરસાદ ખાબક્યો છે. જ્યારે સુરતના બારડોલીમાં સાડા ત્રણ ઈંચ અને તાપીના વ્યારામાં પોણા ત્રણ ઈંચ વરસાદ વરસ્યો છે.

રાજ્યના ડેમોમાં 40 ટકા પાણી આવ્યું
ગુજરાતની જીવાદોરી સરદાર સરોવર ડેમમાં હાલમાં દર કલાકે 23 હજાર ક્યુસેક પાણીની આવક થઈ રહી છે. ડેમની ભયજનક સપાટી 454.98 ફૂટ જળ સપાટી સામે હાલમાં 415.41 ફૂટ જળ સપાટી નોંધાઈ છે. સરદાર સરોવર ડેમાં 65 ટકા ભરાઈ ચૂક્યો છે. રાજ્યના અન્ય ડેમોની વાત કરીએ તો, કુલ 206 ડેમ પૈકી 5 ડેમ 100 ટકા, 17 ડેમ 70 થી 100 ટકા, 21 ડેમ 50 થી 70 ટકા, 54 ડેમ 25 થી 50 ટકા અને 109 ડેમ 25 ટકાથી નીચે ભરાયેલા છે. 206 ડેમ પૈકી 11 ડેમ હાઈએલર્ટ પર, 4 ડેમ એલર્ટ પર અને 7 ડેમ વોર્નીંગ લેવલ પર છે.

ભારે વરસાદના પગલે 1528 લોકોનું સ્થળાંતર
રાજ્યમાં ભારે વરસાદના કારણે નીચાણવાળા વિસ્તારોમાં પાણી ભરાતાં 1528 લોકોનું સ્થળાંતર કરવું પડ્યું છે. જેમાં સૌથી વધુ અમરેલી જિલ્લામાં 641 લોકોનું સ્થળાંતર કરવું પડ્યું છે. જ્યારે ગીર સોમનાથમાં 480, જૂનાગઢમાં 297, આણંદમાં 60, નવસારીમાં 50 લોકોનું સ્થળાંતર કરવું પડ્યું છે. આ ઉપરાંત 8 જિલ્લામાંથી 134 લોકોને રેસ્ક્યૂ કરવામાં આવ્યા છે.

6 જિલ્લામાં અતિ ભારે વરસાદની આગાહી
રાજ્યમાં હાલ અનરાધાર વરસાદ વરસી રહ્યો છે તેવામાં હવામાન વિભાગે 6 જિલ્લામાં રેડ એલર્ટ જારી કરીને અતિ ભારે વરસાદની આગાહી કરી છે. આગામી 24 કલાક દરમિયાન ભાવનગર, સુરત, તાપી, નવસારી, ડાંગ અને વલસાડ જિલ્લામાં અતિ ભારે વરસાદ થાય તેવી શક્યતા છે. જ્યારે અમરેલી, ભરૂચ અને નર્મદા જિલ્લામાં ભારે વરસાદ થવાની સંભાવનાએ ઓરેન્જ એલર્ટ જાહેર કરાયું છે. જ્યારે ગીર સોમનાથ, વડોદરા, પંચમહાલ, દાહોદ અને છોટાઉદેપુર જિલ્લામાં છૂટાછવાયા સ્થળે વરસાદ થવાની શક્યતા છે. બાકીના જિલ્લાઓમાં વરસાદની શક્યતા નહિવત છે.

વાવેતર વિસ્તાર માત્ર 22 ટકા સુધી પહોંચ્યો
રાજ્યમાં સરેરાશ 85,30,803 હેક્ટર વિસ્તારમાં વાવેતર થાય છે. તેમાંથી અત્યાર સુધીમાં 18,54,564 હેક્ટર વિસ્તારમાં વાવેતર થયુ છે એટલે કે માત્ર 22 ટકા વિસ્તારમાં વાવેતર થયુ છે. વર્ષ 2025માં આ જ સમયે 43,05,997 હેક્ટર વિસ્તારમાં વાવેતર થયુ હતું એટલે કે 50 ટકા વાવેતર થઈ ગયું હતું.