સુરેન્દ્રનગર જિલ્લામાં 300 ખેડૂતો સામે પાણી ચોરીના કેસ કરાતા ખળભળાટ

એક તરફ રાજ્યમાં સિંચાઇના પાણી માટે ખેડૂતો પારાવાર તકલીફનો સામનો કરી રહ્યા છે તો બીજી તરફ સુરેન્દ્રનગર જિલ્લામાં પોલીસે ખેડૂતો સામે પાણીચોરીના 300 કેસ નોંધ્યા છે અને એક ખેડૂતને તો પાણી ચોરીના ગુનામાં પાસા હેઠળ મોકલવામાં આવ્યો છે. ખેડૂતોનો આરોપ છે કે સરકાર ખેતી માટે યોગ્ય પુરતું સિંચાઇનું પાણી આપવામાં નિષ્ફળ ગઇ છે ત્યારે બીજી તરફ ખેડૂતો સામે પાણી ચોરીના કેસ કરીને હેરાનગતિ કરી રહી છે. 

સુરેન્દ્રનગર જિલ્લામાં ખેડૂતો સામે પાણી ચોરીના 300 કોસ નોંધવામાં આવતા ખેડૂતોને હાહાકાર મચી ગયો છે. સ્થાનિક ખેડુતો કહે છે કે સિંચાઇનું પાણી પુરુ મળતું નથી તેથી ખેડૂતો સિંચાઇનું પાણી લે તો તેમની સામે પાણી ચોરીના કેસ કરવામાં આવ્યા છે તે યોગ્ય નથી. કેટલાક કિસ્સામાં તો નિર્દોષ ખેડૂતો સામે ખોટા કેસ કરાયા છે તો કેટલાકે એફિડેવીટ પણ કરી છે કે અમારાથી ક્યાંક ભૂલ થઇ ગઇ છે પણ તેઓ નિર્દોષ હોવાનો પુરાવો રજૂ ના કરી શકતા તેમની સામે કેસ ચાલી રહ્યો છે. ગયા મહિને તો એક ખેડૂતને પાણી ચોરી બદલ પાસા હેઠળ ધકેલાયો હોવાનો આરોપ પણ સ્થાનિક ખેડૂતો કરી રહ્યા છે. 

સરકારની આ નીતિ સામે ખેડૂતોમાં ભારે રોષ જોવા મળી રહ્યો છે. સિંચાઇનું પાણી ખેડૂતોને મળતું નથી તો ખેડૂતો શું કરે તેવા સવાલ પુછાઇ રહ્યા છે. કૃષિ પેકેજનો લાભ આપવામાં પણ  અનેક શરતો મુકવામાં આવી છે. આ વિસ્તારમાં ઘણા બુટલેગરો છે તજેમને પાસામાં ધકેલાયા નથી પણ જગતના તાતને પાણી ચોરીના ગુનામાં પાસામાં ધકેલાયો છે તેવો આરોપ લગાવાયો છે.