રમતાં રમતાં બાળક ગટરમાં ખાબક્યું

સુરતના સચીન વિસ્તારના તંલગપુરગામમાં સોમવારે સાંજે 2 વર્ષીય બાળક બોલ રમતા રમતા ગુમ થઇ ગયો હતો. બાદમાં ઘર નજીકના ગટરની ખાડીમાંથી બાળકની લાશ મળી આવતા ચકચાર મચી જવા પામી હતી.
પ્રાપ્ત માહિતી અનુસાર મુળ ઓરીસ્સાના ગંજામના વતની અને હાલમાં સચીનમાં તંલગપુરગામમાં પ્રાથમિક શાળા પાસે રહેતા મનોજ ગૉડનો 2 વર્ષીય પુત્ર શુભમ સોમવારે સાંજે ઘર નજીક બોલ રમતો હતો. બાદમાં બાળક નહી દેખાતા તેના પરિવાર અને આજુબાજુના લોકો ચિંતાતુર થઈને શોધખોળ આદરી હતી. પણ તેની ભાળ મળી ન હોવાથી પરિવારે પોલીસને જાણ કરી હતી. 
બાદમાં કોઈને શંકા ગઈ કે બાળક નજીકમાં આવેલી ગટરની ખાડીમાં પડી ગયો હશે, જેથી ફાયર બિગ્રેડને જાણ કરતા ત્યાં પહોંચીને તેની મોડી સાંજ સુધી શોધતા મળ્યો નહી, બાદમાં મંગળવારે વહેલી સવારે ફાયરના જવાનો ફરી ત્યાં જઈને શોધખોળ કરી હતી. જે.સી.બી મશીન વડે ખાડ ઉપરના સિમેન્ટના ઢાંકણો ખસેડીને બાળકને શોધ્યો હતો. 
બાદમાં બાળકનો ખાડીમાંથી મૃતદેહ ફાયરે કાઢીને પોલીસે સોપ્યો હતો અને મૃતદેહને સિવિલ ખાતે ખસેડાયો હતો. જયારે બાળક પરિવારનો એકનો એક પુત્ર હતો. જોકે તેના મોતને લીધે પરિવારજનોમાં માતમ છવાઈ ગયો હતો. બાળકના પિતા સંચાખાતામાં કામ કરે છે. આ અંગે સચીન જી.આઇ.ડી.સી પોલીસે તપાસ હાથ ધરી છે.