ઠાકોર સમાજ સંગઠિત થઈ સરકારને સવાલ પૂછશે- ‘અમારી અવગણના ક્યા સુધી?’ 

સુરેશ વણોલ, અમદાવાદ

ગુજરાત વિધાનસભામાં વિક્રમ ઠાકોરને આમંત્રણ નહી આપવાનો મામલો ગરમાયો છે. ગાંધીનગરના કુડાસણમાં વિક્રમ ઠાકોરે ક્ષત્રિય ઠાકોર સમાજના કલાકારોનું સંમેલન બોલાવ્યુ હતુ. ક્ષત્રિય ઠાકોર સમાજની અવગણના મુદ્દે આંદોલન છેડી ‘અમારી અવગણના ક્યા સુધી?’ જેવો સવાલ કરવા ઠાકોર સમાજના આગેવાનોને હાકલ કરી હતી. આ સંમેલનમાં ગોપાલજી ઠાકોર, ભરતજી ઠાકોર, કાજલ મહેરીયા સહિતના કલાકારો અને આગેવાનો જોડાયા હતા. 

ગુજરાતમાં ક્ષત્રિય ઠાકોર સમાજના કલાકારો અને અગ્રણીઓની અવગણના સામે હવે સમાજ સંગઠિત થઈ ગયો છે. કુડાસણ ખાતે તુલસી ફાર્મમાં યોજાયેલાં સ્નેહ મિલન સંમેલનમાં મોટી સંખ્યામાં ઠાકોર સમાજના લોકો એકઠા થયા હતા. આ સંમેલનનું આયોજન ગુજરાતી ફિલ્મ અભિનેતા વિક્રમ ઠાકોર દ્વારા કરવામાં આવ્યું હતું. રાજ શેખાવત, ભરતજી ઠાકોર, રોહિત ઠાકોર, ગોપાલજી ઠાકોર, અને કાજલ મહેરિયા જેવા જાણીતા કલાકારો ઉપસ્થિત રહ્યા હતા.

વિક્રમ ઠાકોરે ખુલ્લેઆમ રાજ્ય સરકાર સામે નારાજગી વ્યક્ત કરતા કહ્યું હતું કે, વિધાનસભા સત્રમાં ગુજરાતી ફિલ્મ ઉદ્યોગના કલાકારોને આમંત્રિત કરવામાં આવ્યા હતા. પરંતુ ઠાકોર સમાજના કલાકારોને અવગણવામાં આવ્યા હતા. તેમણે કહ્યું કે, “મે મૃતપાય થયેલી ગુજરાતી ફિલ્મ ઇન્ડસ્ટ્રીને જીવંત કરી છે. પરંતુ સરકાર અમને સન્માન આપવાના બદલે અવગણના કરી રહી છે. અમારી અવગણના હવેથી મંજૂર નથી.

રાજ્ય સરકાર દ્વારા ઠાકોર સમાજને કોઈપણ સરકારી કાર્યક્રમમાં આમંત્રણ આપવામાં આવતું નથી, તે મુદ્દે ઉગ્ર ચર્ચા થઈ હતી. કાંકરિયા કાર્નિવલ હોય કે ગાંધીનગરની અન્ય ઈવેન્ટો, ઠાકોર સમાજના કલાકારોને સન્માન મળતું નથી. સંમેલનમાં જોડાયેલા તમામ વક્તાઓએ એક જ અવાજ ઉઠાવ્યો,  ‘ઠાકોર સમાજની અવગણના હવે મંજુર નહીં!’

વિક્રમ ઠાકોરે સ્પષ્ટ કર્યુ કે, “આ સંમેલન એક શરૂઆત છે”, “અમે હવે લડી લેશું! જો સરકાર અમારું સન્માન કરવા તૈયાર નહીં હોય તો અમે પોતાનો હક છીનવી લઈશું.” આગામી સમયમાં મોટા સંમેલન અને આંદોલન યોજાશે. ઠાકોર સમાજ સંગઠિત થઈ સરકારને સવાલ પૂછશે-‘અમારી અવગણના ક્યાં સુધી?’

રાજ શેખાવતે કહ્યું કે, “ક્ષત્રિય એકતા જિંદાબાદ! વિક્રમ ઠાકોર ગુજરાતી સિનેમાનો અમિતાભ બચ્ચન છે. તેમના જેવી પ્રતિભાને અવગણવામાં આવે તો તે ઠાકોર સમાજનું અપમાન છે. હવે અમે સન્માન માટે લડીશું!”

ભરતજી ઠાકોરે કહ્યું કે, “આજે અમે એકત્ર થયા છીએ, પરંતુ ભવિષ્યમાં આ સંમેલન મોટા આંદોલનમાં પરિણમશે.” ગોપાલજી ઠાકોરે ઠાકોર સમાજના કલાકારોની અવગણનાને લઇ ઉગ્ર વલણ દાખવ્યું. તેમણે કહ્યું કે, “ઠાકોર સમાજમાં કલાકાર બનવું ગુનો છે? 

અમારું સન્માન તો દૂર, હંમેશા અવગણના કરવામાં આવે છે. જો સમાજ સંગઠિત નહીં થાય, તો ક્યારેય આગળ નહીં વધી શકે.” તેમણે ઉમેર્યુ કે, “કોઈના હોંશિયાર બની ખીર-પૂરી ન ખાઓ, પોતાનાં પરિશ્રમથી ખીચડી કઢી ખાઓ!”

કાજલ મહેરિયાએ પણ વિક્રમ ઠાકોરને સમર્થન આપતા કહ્યું કે, “મારો વિવાદ હંમેશા હાઈ લેવલે જાય છે. પણ હું અહીં મારા સમાજ માટે આવી છું. વિક્રમ ઠાકોર લડાઈ લડી રહ્યા છે. તેને હું સમર્થન આપું છું.” આ પ્રસંગે પોતાનું લોકપ્રિય ‘ક્ષત્રિય ઠાકોર’ ગીત ગાઈને સમર્થન આપ્યુ હતુ.