રાજકોટ જિલ્લામાં શિક્ષણ જગત અને વહીવટી તંત્ર સામસામે આવી ગયા છે. જિલ્લા વિકાસ અધિકારી (DDO) દ્વારા શાળાઓની આસપાસ તમાકુ અને સિગારેટના વેચાણ પર રોક લગાવવા માટે બહાર પાડવામાં આવેલા એક પરિપત્રએ વિવાદ સર્જ્યો છે. આ આદેશમાં તમાકુ વેચનારાઓ સામે દંડાત્મક કાર્યવાહી કરવાની જવાબદારી શાળાના આચાર્યો અને સરપંચોને સોંપવામાં આવી છે, જેના પગલે શિક્ષક સંઘે આંદોલનનું શસ્ત્ર ઉગામ્યું છે.
શું છે DDOનો વિવાદાસ્પદ પરિપત્ર ?
રાજકોટ DDO અનંદુ સુરેશ ગોવિંદના જણાવ્યા અનુસાર, શાળા કેમ્પસની આસપાસ પાન-મસાલાની દુકાનો હોવાને કારણે વિદ્યાર્થીઓના માનસ પર નકારાત્મક અસર પડે છે. COTPA-2003 કાયદા હેઠળ શૈક્ષણિક સંસ્થાઓની 100 મીટરની ત્રિજ્યામાં તમાકુ ઉત્પાદનોનું વેચાણ ગુનો છે. નવા પરિપત્ર મુજબ, જો કોઈ શાળાની આસપાસ તમાકુ વેચાતું જોવા મળશે, તો તેના માટે સીધી જવાબદારી આચાર્ય અને સરપંચની રહેશે. આકસ્મિક તપાસ દરમિયાન જો નિયમભંગ જણાશે, તો આ અધિકારીઓ સામે કડક કાર્યવાહી કરવાની જોગવાઈ કરવામાં આવી છે.
"ભણાવવું કે દંડ ઉઘરાવવો?" - શિક્ષકોનો સવાલ&nbsp;
રાજકોટ જિલ્લા પ્રાથમિક શિક્ષક સંઘે આ પરિપત્રનો સખત વિરોધ કર્યો છે. સંઘના નેતાઓનું કહેવું છે કે પોલીસ અને વહીવટી તંત્રનું કામ શિક્ષકોને સોંપવામાં આવી રહ્યું છે. તમાકુ વેચનારાઓ અને ગ્રામજનો સામે દંડ ઉઘરાવવાથી સામાજિક સંઘર્ષ ઉભો થવાની ભીતિ છે. શિક્ષકોનું માનવું છે કે બિન-શૈક્ષણિક કામગીરીના કારણે શિક્ષણના સ્તર પર માઠી અસર પડી રહી છે. અગાઉ પણ શિક્ષકોને શ્વાન ગણતરી અને વસ્તી ગણતરી જેવી કામગીરીમાં જોતરવામાં આવ્યા હતા, જેને લઈને પણ વિવાદ થયો હતો.
4000 શિક્ષકોની આંદોલનની ચીમકી :&nbsp;
રાજકોટ જિલ્લાના અંદાજે 4000 જેટલા શિક્ષકો આ વિરોધમાં જોડાયા છે. શિક્ષક સંઘની માંગ છે કે આ પરિપત્ર તાત્કાલિક અસરથી રદ કરવામાં આવે અથવા દંડ ઉઘરાવવાની કામગીરી પંચાયત વિભાગના કર્મચારીઓને સોંપવામાં આવે. જો આગામી દિવસોમાં આ નિર્ણય પાછો ખેંચવામાં નહીં આવે, તો ગાંધી ચિંધ્યા માર્ગે ઉગ્ર આંદોલન કરવાની ચેતવણી આપવામાં આવી છે.
ભૂતકાળના વિવાદોની યાદ તાજી થઈ :&nbsp;
નોંધનીય છે કે એક મહિના પહેલા જ શિક્ષણ વિભાગ દ્વારા શાળાઓની આસપાસ રખડતા કૂતરાઓની ગણતરી કરવાનો આદેશ અપાયો હતો, જેનો રાજ્યભરમાં વિરોધ થયો હતો. હવે તમાકુના વેચાણ માટે આચાર્યોને જવાબદાર ગણાવતા પરિપત્રએ બળતામાં ઘી હોમવાનું કામ કર્યું છે.

શિક્ષણ તમાકુ વિવાદ

શાળા આસપાસ તમાકુ વેચાણ રોકવાની જવાબદારી આચાર્યોને સોંપાતા 4000 શિક્ષકોએ આપી આંદોલનની ચીમકી

March 7, 2026 | 18:50 IST