તાંત્રિકની હેવાનિયત, જાણો કેવી રીતે શીખ્યો સિરીયલ કિલર બનવાની કળા

તાંત્રિક વિધીથી અનેક ગણા રુપિયા કમાઇ આપવાની લાલચ આપી 12 વ્યક્તિને સોડિયમ નાઇટ્રેટ આપીને મારી નાખનારા તાંત્રિક નવલસિંહનું તો પોલીસ કસ્ટડીમાં મોત થયું છે પરંતુ હવે તેની ધીમે તેની ક્રાઇમ કુંડળી ખુલી રહી છે. પોલીસ તપાસમાં ઘટસ્ફોટ થયો છે કે નવલસિંહ સોડિયમ નાઇટ્રેટનો ઉપયોગ કરીને કેવી રીતે લોકોનો શિકાર કરવો તેનુ જ્ઞાન તે પોતાના ઉજ્જૈનના એક તાંત્રિક ગુરુ પાસેથી શીખ્યો હતો. 

 તાજેતરમાં પોલીસના હાથે તાંત્રિક નવલસિંહ ઝડપાયો હતો અને તેનું પોલીસ કસ્ટડીમાં મોત થયું હતું પરંતુ તેણે મરતા પહેલા તે ખુલાસા કર્યા તે ચોંકાવનારા છે. તેણે તાંત્રિક વિધીમાં 12 લોકોને ત્રણથી ચાર ગણા રુપિયા કરવાની લાલચ આપીને મોતને ઘાટ ઉતાર્યા હતા. નવલસિંહ સોડિયમ નાઇટ્રેટ ઠંડા પીણામાં આપીને પીવડાવી દેતો હતો.

જો કે પોલીસે જ્યારે પુછ્યું કે આવો આઇડિયા તેને કોણે આપ્યો હતો ત્યારે તેણે પોતાના તાંત્રિક ગુરુની પોલ ખોલી હતી. તેના ઉજ્જૈનમાં રહેતા તાંત્રિક ગુરુએ તેને લોકોને સોડિયમ નાઇટ્રેટ આપવાનું શીખવ્યું હતું. જો કે ઉજ્જૈનના તેના આ તાંત્રિક ગુરુનું ત્રણ વર્ષ પહેલા જ મોત થઇ ચુક્યું છે. 

ચોંકાવનારી માહિતી એ પણ છે કે તેણે જે 12 લોકોને મારી નાખ્યા હતા તેમના પોસ્ટમોર્ટમમાં સોડિયમ નાઇટ્રેટ હોવાના પુરાવા મળ્યા ન હતા જેથી પોસ્ટમોર્ટમ કરનારા તબીબોએ બેદરકારી દાખવી હોવાનું જોવા મળ્યું છે. પોલીસે પણ આ ગુનાઓમાં જાણે અપૂરતી તપાસ કરી હોય તેવું જોવા મળ્યું છે.