સુરત શહેરમાં જીમમાં જતી મહિલાઓ અને યુવતીઓની સુરક્ષાને લઈને ગંભીર ફરિયાદો ઉઠતા સુરત પોલીસ એક્શન મોડમાં આવી છે. જીમ ટ્રેનર્સ દ્વારા મહિલાઓને પ્રેમજાળમાં ફસાવી બ્લેકમેઈલ કરવાના કિસ્સાઓ પ્રકાશમાં આવતા પોલીસ કમિશનરની સૂચના મુજબ જીમ સંચાલકો માટે નવી ગાઈડલાઈન જાહેર કરવામાં આવી છે. હવેથી શહેરના તમામ જીમમાં સુરક્ષાના કડક માપદંડોનું પાલન કરવું અનિવાર્ય રહેશે.
જીમ સંચાલકો સાથે પોલીસની મહત્વની બેઠક :&nbsp;
તાજેતરમાં વેસુ, પીપલોદ, રાંદેર અને અડાજણ જેવા વિસ્તારોમાં જીમમાં અનૈતિક પ્રવૃત્તિઓ થતી હોવાના ઈનપુટ્સ મળ્યા હતા. આ મામલે સ્પેશિયલ ઓપરેશન ગ્રુપ (SOG) દ્વારા જીમ માલિકો સાથે ખાસ બેઠક યોજવામાં આવી હતી. પોલીસે સ્પષ્ટ શબ્દોમાં ચેતવણી આપી છે કે જીમ માત્ર કસરત અને સ્વાસ્થ્ય માટે છે, ત્યાં કોઈપણ પ્રકારની અસભ્ય કે અનૈતિક પ્રવૃત્તિ ચલાવી લેવામાં આવશે નહીં.
નવા નિયમો: વોઈસ રેકોર્ડિંગ અને વેરિફિકેશન&nbsp;
ડીસીપી રાજદીપસિંહ નકુમ દ્વારા જીમ માટે નીચે મુજબના કડક નિયમો લાગુ કરવામાં આવ્યા છે:
ઓડિયો CCTV: જીમમાં હવે માત્ર વીડિયો જ નહીં, પરંતુ અવાજ પણ રેકોર્ડ થાય તેવા (Audible) CCTV કેમેરા લગાવવા પડશે. જેથી ટ્રેનર અને સભ્યો વચ્ચે કેવી વાતચીત થાય છે તેની દેખરેખ રાખી શકાય.
પોલીસ વેરિફિકેશન: કોઈપણ ટ્રેનરને નોકરી પર રાખતા પહેલા તેનું પોલીસ વેરિફિકેશન કરાવવું પડશે. ટ્રેનરનો ગુનાહિત ઈતિહાસ અને તેની વર્તણૂકની તપાસ કરવી જીમ માલિકની જવાબદારી રહેશે.
પર્સનલ મેસેજ પર રોક: જીમ ટ્રેનર્સ કોઈપણ મહિલા સભ્યને અંગત સોશિયલ મીડિયા કે મેસેજિંગ એપ પર મેસેજ કરી શકશે નહીં. જો કોઈ ટ્રેનર કનડગત કરતો જણાશે તો તેની સાથે જીમ સંચાલક સામે પણ કાયદેસરની કાર્યવાહી થશે.
પોલીસનું અંડરકવર ઓપરેશન અને વોચ :&nbsp;
જીમની અંદર ખરેખર શું ચાલી રહ્યું છે તે જાણવા માટે પોલીસ હવે 'અંડરકવર' ઓપરેશન પણ હાથ ધરશે. પોલીસના જવાનો સભ્ય બનીને જીમની મુલાકાત લેશે અને ત્યાંના વાતાવરણની તપાસ કરશે. આ ઉપરાંત, પોલીસ અધિકારીઓ અચાનક મુલાકાત લઈને મહિલા સભ્યો અને વરિષ્ઠ નાગરિકો પાસેથી પ્રતિભાવ મેળવશે. જો કોઈપણ જીમમાં છેડતી કે બ્લેકમેઈલિંગ જેવી પ્રવૃત્તિ જણાશે તો જીમ સીલ કરવા સુધીના પગલાં લેવાઈ શકે છે.
મહિલાઓની સુરક્ષા સર્વોપરી :&nbsp;
સુરત પોલીસનો ઉદ્દેશ્ય બહેન-દીકરીઓને સુરક્ષિત વાતાવરણ પૂરું પાડવાનો છે. જો કોઈ પણ મહિલાને જીમમાં કોઈના દ્વારા હેરાન કરવામાં આવતી હોય તો તેઓ તુરંત નજીકના પોલીસ સ્ટેશન અથવા મહિલા હેલ્પલાઈનનો સંપર્ક કરી શકે છે. પોલીસ હવે તમામ જીમ સ્ટાફનો ડેટાબેઝ તૈયાર કરી રહી છે, જેથી ગુનાખોરી પર નિયંત્રણ લાવી શકાય.&nbsp;

સુરત જીમ મહિલા સુરક્ષા નિયમો

જીમમાં વોઈસ રેકોર્ડિંગ CCTV અને ટ્રેનર્સનું વેરિફિકેશન ફરજિયાત

March 9, 2026 | 18:35 IST