Surat : હાઇકોર્ટે રદ્દ કર્યો દાવો, સુપ્રીમે આપ્યો સ્ટે, સુરત જમીન કેસમાં નવો વળાંક

સુરતના રાંદેર ગામની એક જમીન સંબંધિત વિવાદમાં ગુજરાત હાઇકોર્ટના આદેશ સામે સુપ્રીમ કોર્ટે નોટિસ પાઠવી છે અને ત્યાં સુધી જમીનની યથાવત સ્થિતિ જાળવી રાખવાનો આદેશ કર્યો છે. આ કેસ ગુજરાત ગણોત અને ખેતજમીન અધિનિયમની કલમ 43 સાથે સંબંધિત છે.

આ ઘટનાની શરૂઆત વર્ષ 2001 માં થઈ હતી જ્યારે અમજદભાઈ ફજલ અને વસીમભાઇ દલાલે રાંદેરની એક જમીન બાનાખત દ્વારા ખરીદી હતી અને તેનું સંપૂર્ણ પેમેન્ટ ચૂકવીને જમીનનો કબજો પણ મેળવી લીધો હતો. જો કે, વર્ષ 2018 માં મૂળ માલિકોએ આ જ જમીન ત્રાહિત વ્યક્તિને વેચાણ દસ્તાવેજ કરીને વેચી દીધી. આથી અમજદભાઈ અને વસીમભાઇને સુરતની સિવિલ કોર્ટમાં દાવો દાખલ કરવાની ફરજ પડી.

સુરત સિવિલ કોર્ટમાં દાખલ થયેલા આ દાવાને પ્રાથમિક તબક્કે જ રદ્દ કરવા માટે મૂળ માલિકો અને ત્રાહિત ખરીદનારે અરજી કરી હતી, જેને સુરત સિવિલ કોર્ટે નામંજૂર કરી દીધી હતી. આ નિર્ણય સામે મૂળ માલિકો અને ત્રાહિત ખરીદનારે ગુજરાત હાઇકોર્ટમાં રિવિઝન પિટિશન દાખલ કરી. ગુજરાત હાઇકોર્ટે આ રિવિઝન પિટિશનને મંજૂર રાખી અને અમજદભાઈ અને વસીમભાઇનો દાવો રદ્દ કરવાનો આદેશ કર્યો. હાઇકોર્ટે પોતાના આદેશમાં જણાવ્યું કે વર્ષ 2001 માં અમજદભાઈ અને વસીમભાઇની તરફેણમાં થયેલા બાનાખત ગુજરાત ગણોત અને ખેતજમીન અધિનિયમની કલમ 43 હેઠળ કાયદેસર ન હતો, તેથી તેના આધારે દાવો કરી શકાય નહીં અને જમીનનો ખાસ અમલ પણ માંગી શકાય નહીં.

ગુજરાત હાઇકોર્ટના આ આદેશને અમજદભાઈ અને વસીમભાઇએ તેમના વકીલ શ્રી ઋષભ કાપડિયા દ્વારા સુપ્રીમ કોર્ટમાં પડકાર્યો. સુપ્રીમ કોર્ટે આ કેસમાં તારીખ 14 ફેબ્રુઆરીના રોજ નોટિસ કાઢી અને ત્યારબાદ તારીખ 9 એપ્રિલના રોજ બંને પક્ષોના વકીલોને સાંભળ્યા બાદ પક્ષકારોને જમીનની યથાવત પરિસ્થિતિ જાળવી રાખવાનો આદેશ કર્યો.

અરજદારો તરફથી સિનિયર એડવોકેટ નિરંજન રેડ્ડી, સિનિયર એડવોકેટ નિખિલ ગોએલ અને એડવોકેટ ઋષભ કાપડિયાએ સુપ્રીમ કોર્ટમાં રજૂઆત કરી કે સુપ્રીમ કોર્ટના વિવિધ ચુકાદાઓ અનુસાર હાલનો દાવો રદ્દ થઈ શકે નહીં. તેમણે જણાવ્યું કે, કલમ 43 નો બાધ એવા બાનાખતને લાગુ પડતો નથી જેની શરતો અનુસાર વેચનારે યોગ્ય મંજૂરીઓ મેળવીને વેચાણ દસ્તાવેજ કરી આપવાનો હોય. આવા બાનાખતનો ખાસ અમલ કન્ડિશનલ ડિક્રી દ્વારા થઈ શકે છે. વધુમાં, તેમણે દલીલ કરી કે જો કલમ 43 નો બાધ લાગુ પડતો હોય તો પણ જ્યારે એકથી વધુ દાદ માંગવામાં આવી હોય ત્યારે સમગ્ર દાવો ટકવાપાત્ર નથી એમ ઠરાવી શકાય નહીં. જો આમ કરવામાં આવે તો તે અનજસ્ટ એનરિચમેન્ટના સિદ્ધાંતની વિરુદ્ધ છે.

સુપ્રીમ કોર્ટે તમામ રજૂઆતોને ધ્યાનમાં લઈને નોટિસ પાઠવી અને પક્ષકારોને જમીનની યથાવત પરિસ્થિતિ જાળવી રાખવાનો નિર્દેશ આપ્યો છે. હવે આ કેસની વધુ સુનાવણી જુલાઈ મહિનામાં અન્ય આવી જ પિટિશનો સાથે હાથ ધરવામાં આવશે. આ કેસમાં સુપ્રીમ કોર્ટનો ચુકાદો મહત્વનો સાબિત થશે.