સુરત શહેરના મોટા વરાછા વિસ્તારમાં માર્ગ અકસ્માતની એક હૃદયદ્રાવક ઘટના સામે આવી છે. પુરપાટ ઝડપે દોડતા વાહનોને કારણે વધુ એક નિર્દોષ યુવકે પોતાનો જીવ ગુમાવવો પડ્યો છે. મોટા વરાછાના દુખીયાના દરબાર રોડ પર બે મોટરસાયકલો વચ્ચે થયેલી ગંભીર ટક્કરના સીસીટીવી ફૂટેજ પણ સામે આવ્યા છે, જે અકસ્માતની ભયાનકતા દર્શાવે છે.
પૂરપાટ ઝડપે આવતી બાઈકો સામસામે અથડાઈ :&nbsp;
ગઈકાલે રાત્રે મોટા વરાછા વિસ્તારમાં આવેલા દુખીયાના દરબાર રોડ પર ટ્રાફિક વચ્ચે બે બાઈક ચાલકો પૂરપાટ ઝડપે આવી રહ્યા હતા. આ દરમિયાન બંને વાહનો પરથી કાબૂ ગુમાવતા બંને બાઈકો સામસામે ધડાકાભેર અથડાઈ હતી. આ ટક્કર એટલી જોરદાર હતી કે આસપાસના રહીશો અવાજ સાંભળીને ઘટનાસ્થળે દોડી આવ્યા હતા. સીસીટીવી ફૂટેજમાં સ્પષ્ટ દેખાય છે કે ટક્કર થતા જ એક યુવક હવામાં ફંગોળાયો હતો અને રસ્તા પર પટકાયો હતો.
એક યુવકનું સારવાર દરમિયાન નીપજ્યું મોત :&nbsp;
અકસ્માત બાદ તરત જ સ્થાનિક લોકોએ 108 એમ્બ્યુલન્સને જાણ કરી હતી. લોહીલુહાણ હાલતમાં બંને યુવકોને તાત્કાલિક હોસ્પિટલ ખસેડવામાં આવ્યા હતા. હોસ્પિટલના બિછાને જીવન-મરણ વચ્ચે ઝોલા ખાતા બે યુવકો પૈકી એક યુવકનું ટૂંકી સારવાર બાદ મોત નીપજ્યું હતું, જ્યારે અન્ય એક યુવકની હાલત હજુ પણ નાજુક હોવાનું જાણવા મળ્યું છે. આ બનાવને પગલે મૃતક યુવકના પરિવારમાં માતમ છવાઈ ગયો છે.
પોલીસ તપાસ અને સીસીટીવી ફૂટેજ :&nbsp;
આ ઘટનાની જાણ થતા જ ઉત્રાણ પોલીસનો કાફલો ઘટનાસ્થળે દોડી આવ્યો હતો. પોલીસે અકસ્માતના સ્થળની તપાસ કરી અને આસપાસના સીસીટીવી ફૂટેજ કબજે કર્યા છે. ફૂટેજમાં અકસ્માત કેવી રીતે સર્જાયો અને કોની બેદરકારી હતી તે સ્પષ્ટ દેખાઈ રહ્યું છે. પોલીસે હાલ અકસ્માતે મોતનો ગુનો નોંધીને મૃતક યુવકના પંચનામા સહિતની કાયદેસરની કાર્યવાહી હાથ ધરી છે.
માર્ગ સલામતી સામે ઉઠતા સવાલો :&nbsp;
મોટા વરાછા જેવા ભરચક વિસ્તારોમાં વાહનોની ગતિ મર્યાદા જાળવવી અત્યંત જરૂરી છે. આ ઘટનાએ ફરી એકવાર સાબિત કર્યું છે કે માર્ગો પરની અતિશય ઝડપ જીવલેણ સાબિત થઈ શકે છે. સ્થાનિક રહીશો પણ આ વિસ્તારમાં સ્પીડ બ્રેકર અને ટ્રાફિક નિયમનની કડક અમલવારીની માંગ કરી રહ્યા છે.

મોટા વરાછા બાઈક અકસ્માત

દુખીયાના દરબાર રોડ પર બે મોટરસાયકલો સામસામે અથડાતા એક યુવકનું કરુણ મોત

March 5, 2026 | 16:24 IST