Surat Nasirnagar Demolition Case: સુરતના નાસીરનગર વિસ્તારમાં તાજેતરમાં થયેલા વિવાદિત ડિમોલિશનનો મામલો હવે ગુજરાત હાઈકોર્ટમાં પહોંચ્યો છે. આ કેસની સુનાવણી દરમિયાન હાઈકોર્ટે સુરત મહાનગરપાલિકા (SMC) અને સુરત પોલીસની કામગીરી સામે ભારે નારાજગી વ્યક્ત કરી આકરી ઝાટકણી કાઢી હતી. કોર્ટે આ સમગ્ર ઘટનાને પ્રથમદર્શી રીતે 'ગેરકાયદે ડિમોલિશન' ગણાવ્યું છે અને સવાલ કર્યો છે કે આટલી ગંભીર બાબત હોવા છતાં જવાબદારો સામે હજુ સુધી ફોજદારી ગુનો કેમ દાખલ કરવામાં આવ્યો નથી.
"આ પ્રથમદર્શી ગેરકાયદે ડિમોલિશન" ગુજરાત હાઈકોર્ટે સુનાવણી દરમિયાન સ્પષ્ટ કર્યું હતું કે નાસીરનગરમાં જે રીતે તોડફોડ કરવામાં આવી છે તે પ્રથમદર્શી રીતે સંપૂર્ણ ગેરકાયદેસર છે. કોર્ટે મનપા વહીવટીતંત્રને ટકોર કરતા કહ્યું કે, અસરગ્રસ્ત અરજદારોને માત્ર 'દબાણકર્તા' કહીને તેમની સત્તા છીનવી શકાય નહીં. આ સાથે જ હાઈકોર્ટે સત્તાવાળાઓને આદેશ આપ્યો છે કે જે લોકોના ઘર તોડી પડાયા છે, તેમને મૂળ સ્થળે અથવા અન્ય કોઈ યોગ્ય જગ્યાએ પુનઃવસન કરવાનો નક્કર પ્લાન કોર્ટ સમક્ષ રજૂ કરવામાં આવે.
તપાસ કમિટી અને રાજ્યના વલણ સામે કોર્ટે ઉઠાવ્યા સવાલ નાસીરનગર ડિમોલિશનની તપાસ માટે સુરત મનપાના ડેપ્યુટી કમિશનરના અધ્યક્ષ સ્થાને એક કમિટીની રચના કરવામાં આવી છે. આ કમિટીના સ્તર પર સવાલ ઉઠાવતા હાઈકોર્ટે કહ્યું કે, આ મામલામાં કમિશનર કરતા પણ ઉચ્ચ સ્તરના (હાયર લેવલ) અધિકારી દ્વારા તપાસ થવી જરૂરી છે. કોર્ટે આશ્ચર્ય વ્યક્ત કરતા કહ્યું, "શું કોર્પોરેશન આવી રીતે ચાલે છે? આવું તો ઘણું બધું થતું હશે, આ કિસ્સામાં વધારે લોકો હતા એટલે તેઓ કોર્ટ સુધી આવી શક્યા."
રાજ્ય સરકારના વલણ અંગે ટિપ્પણી રાજ્ય સરકારના વલણ અંગે ટિપ્પણી કરતા કોર્ટે સરકારી વકીલને પૂછ્યું કે, આમાં રાજ્ય સરકારનું સ્ટેન્ડ શું છે? જ્યારે સરકારી વકીલે જણાવ્યું કે આમાં પોલીસ સિવાય રાજ્ય સીધું સંકળાયેલું નથી, ત્યારે કોર્ટે આકરા શબ્દોમાં કહ્યું કે, "શું રાજ્યની નાગરિકો પ્રત્યે કોઈ જવાબદારી નથી? શા માટે રાજ્ય સરકાર સામે ચાલીને નથી કહેતી કે આ ગેરકાનૂની છે અને પગલાં કેમ નથી લેતી? જો તમે આને માત્ર લોકલ મુદ્દો ગણતા હોવ, તો અમે પણ એ જ નજરિયાથી જોઈશું. આ કોઈ સ્થાનિક અધિકારીનું કામ નથી, આની પાછળ ચોક્કસ કોઈકનો મોટો ટેકો હોવો જોઈએ."
પોલીસની ઢીલી કામગીરી અને ફરિયાદ ન નોંધાવા અંગે આક્રોશ ડિમોલિશન સમયે પોલીસ કર્મચારીઓની કથિત હાજરી હોવા છતાં કોઈ કાર્યવાહી ન થવા પર કોર્ટે ગંભીર સવાલો કર્યા હતા. કોર્ટે પૂછ્યું કે, "જ્યારે લોકો ફરિયાદ કરવા ગયા ત્યારે પોલીસે કેમ કશું ન કર્યું? 1 મહિના કરતાં પણ વધુ સમય વીતી ગયો હોવા છતાં હજુ સુધી કોઈ પોલીસ ફરિયાદ (FIR) કેમ નથી થઈ? તમે હજુ માત્ર તપાસ જ કરો છો, આમાં તમારી ગંભીરતા ક્યાં છે? શું લોકોના ઘર તોડી નાખવા એ ફોજદારી ગુનો નથી?"
26 અરજદારો દ્વારા હાઈકોર્ટમાં પિટિશન સુરત નાસીરનગર ડિમોલિશન મુદ્દે કુલ 26 અસરગ્રસ્ત અરજદારોએ ગુજરાત હાઇકોર્ટમાં ન્યાય માટે અરજી દાખલ કરી છે. આ પિટિશનમાં રાજ્ય સરકાર, સુરત મહાનગરપાલિકા (SMC), સુરત પોલીસ કમિશનર, SOG ના DCP રાજદીપસિંહ નકુમ, સ્થાનિક બિલ્ડર, પોલીસ-SMC ના કર્મચારીઓ તેમજ ટોરેન્ટ પાવરને પક્ષકાર બનાવવામાં આવ્યા છે. ગત 29 જૂનની સુનાવણીમાં સરકારી વકીલે કોર્ટને માહિતી આપી હતી કે, પીડિતો તરફથી પોલીસ સમક્ષ પ્રથમ રજૂઆત 1 જૂને નહીં પરંતુ 10 જૂને આવી હતી. આ અરજી સુરત પોલીસ જનરલ રજિસ્ટ્રીથી થઈને 16 જૂને DCP ઝોન 3 અને ત્યારબાદ 19 જૂને ચોકબજાર પોલીસ સ્ટેશનના PI ને મોકલવામાં આવી હતી. હાલ આ કેસમાં વિભાગીય તપાસ ચાલુ છે અને અત્યાર સુધીમાં 10 થી વધુ પોલીસ કર્મચારીઓના નિવેદનો નોંધવામાં આવ્યા હોવાનો દાવો પોલીસે કોર્ટ સમક્ષ કર્યો છે.

"લોકોના ઘર તોડી પાડવા એ ફોજદારી ગુનો નથી?", મનપા અને પોલીસને આકરા સવાલો

July 2, 2026 | 15:32 IST