સુરતમાં હર્ષ સંઘવીને કેન્દ્રીય ગૃહ રાજ્ય મંત્રી બનાવી દીધાઃ કોંગ્રેસના પૂર્વ કોર્પોરેટરની ટીખળ

સુરેશ વણોલ, અમદાવાદ

સુરતના ગોડાદરા વિસ્તારમાં લાગેલા પોસ્ટર્સમાં રાજ્યના ગૃહમંત્રી હર્ષ સંઘવીને કેન્દ્રીય ગૃહ રાજ્યમંત્રી દર્શાવવામાં આવ્યા છે. આ મામલાને લઈ કોંગ્રેસના પૂર્વ કોર્પોરેટરે ટીખળ કરી છે કે, અતિ ઉત્સાહી નેતાએ હર્ષ સંઘવી સાથે એપ્રિલ ફૂલની મજાક કરી છે કે પછી તેમને મહેમાનોના હોદ્દાની ખબર જ નથી. કોંગ્રેસના પૂર્વ કોર્પોરેટરની ટીખળ બાદ વિવાદ થયો છે. 

સુરતના લિંબાયતના ગોડાદરા વિસ્તારમાં 6 એપ્રિલના રોજ ઉત્તર ભારતીય સમૂહ લગ્નનું આયોજન કરવામાં આવ્યું છે. સમુહ લગ્ન સમારોહ માટે લગાવેલાં પોસ્ટરથી વિવાદ થયો છે. પોસ્ટર્સમાં રાજ્યના ગૃહ રાજ્યમંત્રી હર્ષ સંઘવીને કેન્દ્રીય ગૃહ રાજ્યમંત્રી દર્શાવાયા છે. આ વિવાદને લઈ કોંગ્રેસના પૂર્વ કોર્પોરેટર અસલમ સાયકલવાલાએ પોસ્ટર્સ સાથે કોમેન્ટ કરી ટીખળ કરી છે કે, ‘ભાજપના ઉત્તર ભારતીય નેતાઓ દ્વારા આયોજિત "ઉત્તર ભારતીય સમૂહ લગ્ન સમારોહ" ના પોસ્ટર્સમાં ગૃહ રાજ્યમંત્રી હર્ષ સંઘવીને કેન્દ્રીય ગૃહ રાજ્યમંત્રી બનાવી દીધા છે. 

શું આ અતિ ઉત્સાહી નેતાએ હર્ષ સંઘવી સાથે એપ્રિલ ફૂલ કર્યુ છે કે પછી તેમને મહેમાનોના હોદ્દાની ખબર જ નથી.’ મુખ્યમંત્રી ભૂપેન્દ્ર પટેલના ફોટા ગાયબ હોવાથી કોંગ્રેસના પૂર્વ કોર્પોરેટર તેને ભાજપની આંતરિક જૂથબંધી ગણાવી રહ્યા છે. આયોજકોને મહેમાનોના હોદ્દાની ખબર હતી કે મજાકમાં આવી ટિપ્પણી કરવામાં આવી છે તે બાબતે સવાલ કર્યા છે. 

મહત્વપૂર્ણ છે કે, સુરતના લિંબાયત ગોડાદરા વિસ્તારમાં મહર્ષિ આસ્તિક વિદ્યાલય સામે ઉત્તર ભારતીય સમુહ વિવાહ સમિતિ દ્વારા સમૂહ લગ્નનું આયોજન કરવામાં આવ્યું છે. 6 એપ્રિલને રામ નવમીના રોજ ઉત્તર ભારતીય સમુહ વિવાહ સમારોહનું આયોજન કરવામાં આવ્યું છે. હાલમાં તેના પોસ્ટર્સના કારણે સમગ્ર વિવાદ શરૂ થયો છે. 

આ પોસ્ટર્સમાં વડાપ્રધાન નરેન્દ્ર મોદી, પ્રદેશ પ્રમુખ અને કેન્દ્રીય મંત્રી સી.આર.પાટીલ, ધારાસભ્ય સંદિપ દેસાઈ, સંગીતા પાટીલ અને મનુ પટેલના ફોટા સાથે સુરત શહેર ભાજપ પ્રમુખ પરેશ પટેલના નામનો ઉલ્લેખ કરાયો છે. પરંતુ, આ પોસ્ટર્સમાં મુખ્યમંત્રી ભુપેન્દ્ર પટેલનો ફોટો ગાયબ છે. જ્યારે ગૃહમંત્રી હર્ષ સંઘવીના ફોટા નીચે કેન્દ્રીય ગૃહ રાજ્યમંત્રી લખવામાં આવ્યું છે.