વડોદરાના&nbsp;અકોટા વિસ્તારની GEB સ્કૂલમાં અંગ્રેજી માધ્યમમાં ધોરણ 9માં અભ્યાસ કરતા વિદ્યાર્થી હર્ષ રાઠોડને ગતરોજ રિસેસ અગાઉ ક્લાસરૂમમાં આંખના ભાગે ઇજા થવાની ઘટના બની હતી.
મળતી માહિતી મુજબ, રિસેસ શરૂ થાય તે પહેલાં વિદ્યાર્થીઓ ક્લાસરૂમમાં મસ્તી કરી રહ્યા હતા. આ દરમિયાન, એક વિદ્યાર્થીએ બોલપેન ફેંકી હતી અને સંજોગોવસાત તે જ સમયે હર્ષ રાઠોડ ઊભો થતાં બોલપેન સીધી તેના આંખના ભાગે વાગી હતી. ગંભીર ઈજા થતાં તેને તાત્કાલિક ખાનગી હોસ્પિટલમાં સારવાર માટે ખસેડવામાં આવ્યો હતો.
વાલીનું નિવેદન અને શાળા પર સવાલ
ઈજાગ્રસ્ત વિદ્યાર્થી હર્ષના પિતા શૈલેષ રાઠોડે આ મામલે નિવેદન આપ્યું હતું. તેમણે કહ્યું કે, "મારે આ અંગે કોઈ ફરિયાદ કરવી નથી, તે વિદ્યાર્થીઓ પણ મારા બાળક જેવા છે." જોકે, તેમણે શાળાના વહીવટ સામે સવાલ ઉઠાવતા જણાવ્યું હતું કે, "શાળાએ મારા પુત્રને ઈજા થયા બાદ પ્રાથમિક સારવાર ન કરી અને અમને સીધા બોલાવ્યા હતા."
શાળા તરફથી પ્રતિક્રિયા
આ સમગ્ર ઘટના અંગે શાળાના આચાર્યએ પ્રતિક્રિયા આપતા કહ્યું હતું કે, "અમે હવે તમામ બાળકોને ક્લાસરૂમમાં આ પ્રકારની મસ્તી ન કરવા માટે અપીલ કરી રહ્યા છીએ અને કાળજી રાખવા સૂચના આપી છે."
આ ઘટનાથી શાળાઓમાં રિસેસ પહેલા કે પછીના સમયમાં વિદ્યાર્થીઓની સુરક્ષા અને દેખરેખના મુદ્દા પર ધ્યાન આપવાની જરૂરિયાત ઊભી થઈ છે.

રમત-રમતમાં વિદ્યાર્થીને ઈજા

અકોટાની GEB સ્કૂલમાં ધો. 9ના વિદ્યાર્થી હર્ષ રાઠોડને ક્લાસરૂમમાં બોલપેન વાગી, વાલીએ ફરિયાદ

December 3, 2025 | 24:11 IST