અમદાવાદ શહેરમાં વધતા જતા ધ્વનિ પ્રદૂષણને અટકાવવા અને નાગરિકોની શાંતિ જાળવવા માટે પોલીસ કમિશનર જી.એસ. મલિક દ્વારા એક મહત્વપૂર્ણ અને કડક જાહેરનામું બહાર પાડવામાં આવ્યું છે. હવેથી શહેરમાં કોઈપણ ધાર્મિક પ્રસંગ, વરઘોડા કે જાહેર કાર્યક્રમમાં માઈક સિસ્ટમ અથવા ડીજે વગાડવા માટે પોલીસની પૂર્વ મંજૂરી લેવી અનિવાર્ય બની ગઈ છે. આ નિયમોનું ઉલ્લંઘન કરનાર વિરુદ્ધ કડક કાયદાકીય કાર્યવાહી કરવામાં આવશે.
ધાર્મિક સ્થળો માટે મર્યાદિત અવાજના નિયમો :&nbsp;
નવા જાહેરનામા અનુસાર, અમદાવાદના તમામ મંદિરો, મસ્જિદો, ચર્ચ અને અન્ય ધાર્મિક સ્થળોએ માઈક સિસ્ટમનો ઉપયોગ કરવા માટે ચોક્કસ મર્યાદા નક્કી કરવામાં આવી છે. લાઉડસ્પીકરનો અવાજ માત્ર ધાર્મિક સંકુલના પરિસર સુધી જ મર્યાદિત રહેવો જોઈએ. જો બહારના રહીશો કે રસ્તા પરથી પસાર થતા રાહદારીઓને આ અવાજથી અડચણ ઉભી થશે અથવા કોઈ પણ પ્રકારનો ભય જણાશે, તો પોલીસ પાસે તે માઈક સિસ્ટમનો ઉપયોગ તાત્કાલિક બંધ કરાવવાની સત્તા રહેશે.
રાત્રિના સમયે અવાજ પર સંપૂર્ણ પ્રતિબંધ :&nbsp;
શહેરની શાંતિ જાળવવા માટે રાત્રિના ૧૦ વાગ્યાથી સવારના ૬ વાગ્યા સુધી કોઈપણ પ્રકારની માઈક સિસ્ટમ કે ડીજે વગાડવા પર સંપૂર્ણ મનાઈ ફરમાવવામાં આવી છે. આ સમયગાળા દરમિયાન પોલીસ કોઈપણ પ્રસંગ માટે મંજૂરી આપશે નહીં. જોકે, સવારના ૬ થી રાત્રિના ૧૦ વાગ્યા સુધી નિયત કરેલા ડેસિબલ મુજબ અવાજ રાખીને પોલીસની મંજૂરી સાથે સિસ્ટમ વગાડી શકાશે.
સાયલન્સ ઝોન અને રહેણાંક વિસ્તારોમાં કડકાઈ :&nbsp;
હોસ્પિટલો, શૈક્ષણિક સંસ્થાઓ અને અદાલતોની આસપાસના ૧૦૦ મીટરના વિસ્તારને 'સાયલન્સ ઝોન' તરીકે જાહેર કરવામાં આવ્યો છે. આ વિસ્તારોમાં કોઈપણ પ્રકારના શોરબકોર કે માઈક વગાડવા પર સખત પ્રતિબંધ રહેશે. આ ઉપરાંત, રહેણાંક વિસ્તારોમાં આવેલા પાર્ટી પ્લોટ કે ખુલ્લી જગ્યાઓમાં પણ મંજૂરી વગર મોટા અવાજે સંગીત વગાડનાર આયોજકો સામે પોલીસ દંડનીય કાર્યવાહી કરશે.
સાધનો જપ્ત કરવાની ચેતવણી :&nbsp;
પોલીસ કમિશનરે સ્પષ્ટ કર્યું છે કે વરઘોડા, રેલીઓ કે લગ્ન પ્રસંગોમાં નક્કી કરેલી મર્યાદા કરતા વધુ અવાજ રાખવામાં આવશે તો માત્ર દંડથી કામ ચાલશે નહીં. જે તે ડીજે સંચાલક કે આયોજક પાસેથી લાઉડસ્પીકર, એમ્પ્લીફાયર અને ડીજે સિસ્ટમ જેવા મોંઘા સાધનો જપ્ત કરવામાં આવશે અને જવાબદારો વિરુદ્ધ ગુનો નોંધીને ધરપકડ પણ થઈ શકે છે.&nbsp;

અમદાવાદ પોલીસ ડીજે જાહેરનામું

રાત્રે 10 થી સવારે 6 સુધી લાઉડસ્પીકર પર સંપૂર્ણ પ્રતિબંધ, નિયમ ભંગ બદલ સાધનો થશે જપ્ત

March 9, 2026 | 17:43 IST