દક્ષિણ ગુજરાતમાં મેઘરાજાનો મહાકહેર

Heavy Rain South Gujarat: દક્ષિણ ગુજરાતમાં ચોમાસાએ ફરી એકવાર રૌદ્ર સ્વરૂપ ધારણ કર્યું છે.છેલ્લાં 24 કલાક દરમિયાન રાજયમાં 173 તાલુકામાં વરસાદ નોંધાયો હતો.જેમાં સૌથી વધુ દક્ષિણ ગુજરાતમાં મેઘરાજાએ રૌદ્ર સ્વરૂપ ધારણ કરતાં કપરાડામાં 16 ઈંચ તેમજ વલસાડમાં 11 અને ચીખલી અને વાંસદામાં 10 ઈંચ જેટલો ભારે વરસાદ નોંધાતાં ચારેતરફ જળબંબાકારની સ્થિતિ સર્જાઈ છે.સતત વરસતા વરસાદને કારણે અનેક નદીઓ, ખાડીઓ અને નીચાણવાળા વિસ્તારોમાં પાણી ભરાઈ ગયા છે. સુરત શહેરમાં પણ ભારે વરસાદના કારણે ભેદવાડ ખાડી ભયજનક સપાટીએ પહોંચી ગઈ છે, જ્યારે અનેક વિસ્તારોમાં પાણી ભરાવાથી લોકોને ભારે હાલાકીનો સામનો કરવો પડી રહ્યો છે.હવામાન વિભાગે આગામી કલાકોમાં પણ દક્ષિણ ગુજરાત માટે રેડ એલર્ટ જાહેર કર્યું છે. વલસાડ, નવસારી, સુરત, તાપી અને ડાંગ જિલ્લામાં અતિભારે વરસાદ પડવાની શક્યતા વ્યક્ત કરવામાં આવી છે. વહીવટી તંત્ર દ્વારા લોકોને નદી, ખાડી અને પાણી ભરાયેલા વિસ્તારોની નજીક ન જવાની અપીલ કરવામાં આવી છે.

દક્ષિણ ગુજરાત ભારે વરસાદની શકયતા
ઉત્તર ગુજરાત અને દક્ષિણ ગુજરાતમાં વરસાદી માહોલ યથાવત રહેશે. આ સમયગાળા દરમિયાન ઉત્તર ગુજરાતના મોટાભાગના જિલ્લાઓમાં અનેક સ્થળોએ હળવાથી મધ્યમ વરસાદની શક્યતા છે, જ્યારે દક્ષિણ ગુજરાતના જિલ્લાઓમાં મોટાભાગના સ્થળોએ વરસાદ પડી શકે છે. સૌરાષ્ટ્રમાં કેટલાક સ્થળોએ અને કચ્છમાં છૂટાછવાયા સ્થળોએ વરસાદની શક્યતા વ્યક્ત કરવામાં આવી છે. 24 જુલાઈ દરમિયાન પણ આવી જ સ્થિતિ રહેવાની આગાહી છે.

વલસાડ અને નવસારી જિલ્લામાં ભારે તબાહી
વલસાડ જિલ્લો વરસાદનું મુખ્ય કેન્દ્ર બન્યો છે. કપરાડા તાલુકામાં સૌથી વધુ 15.63 ઈંચ (397 મિમી) વરસાદ ઝીંકાતાં ચારેય તરફ જળબંબાકારની સ્થિતિ સર્જાઈ છે. આ સિવાય વલસાડના નાનાપોંઢામાં 11.02 ઈંચ, પારડીમાં 9.37 ઈંચ, વલસાડ શહેરમાં 8.31 ઈંચ અને વાપીમાં 7.28 ઈંચ વરસાદ નોંધાયો છે. નવસારી જિલ્લામાં પણ ભારે વરસાદે વિરામ લીધો નથી. ચીખલીમાં 9.61 ઈંચ, વાંસદામાં 9.25 ઈંચ, ખેરગામમાં 7.91 ઈંચ અને ગણદેવીમાં 4.72 ઈંચ વરસાદ નોંધાયો છે. ડાંગના વાઘઈમાં 7.20 ઈંચ અને આહવા-ડાંગમાં 5.04 ઈંચ વરસાદ વરસ્યો છે.

નવસારીમાં 10 ઇંચ વરસાદથી જળબંબાકાર
નવસારી જિલ્લામાં પણ મેઘરાજાએ ધોધમાર બેટિંગ કરતાં માત્ર એક જ દિવસમાં લગભગ 10 ઇંચ વરસાદ નોંધાયો છે. શહેરના મુખ્ય માર્ગો, બજારો અને રહેણાંક વિસ્તારોમાં પાણી ભરાઈ જતાં જનજીવન પ્રભાવિત બન્યું છે.જિલ્લાના અનેક વિસ્તારોમાં રસ્તાઓ નદીમાં ફેરવાઈ ગયા હોય તેવા દૃશ્યો જોવા મળ્યા હતા. વાહનચાલકોને ભારે મુશ્કેલી પડી હતી. કેટલાક ગામોનો સંપર્ક પણ તૂટ્યો હોવાના અહેવાલો સામે આવ્યા છે. વરસાદને કારણે કૃષિ ક્ષેત્રમાં પણ મિશ્ર અસર જોવા મળી રહી છે. જ્યાં એક તરફ ખેડૂતોને વરસાદથી રાહત મળી છે, ત્યાં બીજી તરફ પાણી ભરાવાથી ઉભા પાકને નુકસાન થવાની ભીતિ પણ વ્યક્ત કરવામાં આવી રહી છે.

ક્યાં ક્યાં  જિલ્લામાં રેડ એલર્ટ અને ઓરેન્જ એલર્ટ
સુરત, નવસારી, વલસાડ અને ડાંગ જિલ્લામાં આગામી ત્રણ કલાક એટલે કે દસ વાગ્યાથી એક વાગ્યા માટે અતિ ભારે વરસાદની આગાહી કરતું રેડ એલર્ટ નાઉ કાસ્ટ હેઠળ હવામાન વિભાગે જાહેર કર્યું છે.સૌરાષ્ટ્રના ગીર સોમનાથ, અમરેલી, ભાવનગર તેમજ ભરુચ, નર્મદા, તાપી, છોટા ઉદેપુર, પંચમહાલ, દાહોદ તથા બનાસકાંઠા, મહેસાણા અને સાબરકાંઠામાં પણ ભારે વરસાદનું ઓરેન્જ એલર્ટ જાહેર કરવામાં આવ્યું છે.

સુરતના અનેક વિસ્તારોમાં પાણી ભરાયા
સુરત શહેરના ઉધના, ભેદવાડ, પાંડેસરા, ગોડાદરા, લિંબાયત, વેસુ સહિત અનેક વિસ્તારોમાં ભારે વરસાદના કારણે પાણી ભરાયા હતા. મુખ્ય માર્ગો પર વરસાદી પાણી ફરી વળતાં ટ્રાફિક વ્યવસ્થા ખોરવાઈ ગઈ હતી.અનેક વાહનો પાણીમાં બંધ પડી ગયા હતા. ઓફિસ જતાં કર્મચારીઓ, વિદ્યાર્થીઓ અને સામાન્ય નાગરિકોને ભારે મુશ્કેલીઓનો સામનો કરવો પડ્યો હતો. કેટલાક વિસ્તારોમાં ડ્રેનેજ સિસ્ટમ પર પણ સવાલો ઊભા થયા છે.સુરત મહાનગરપાલિકા દ્વારા વરસાદી પરિસ્થિતિને ધ્યાનમાં રાખીને કંટ્રોલ રૂમ સક્રિય કરવામાં આવ્યો છે. પાલિકા કમિશનર સહિતના અધિકારીઓ દ્વારા વિવિધ વિસ્તારોની મુલાકાત લેવામાં આવી રહી છે.જ્યાં પાણી ભરાયા છે ત્યાં પંપ દ્વારા પાણીનો નિકાલ કરવામાં આવી રહ્યો છે. ફાયર વિભાગ, ડિઝાસ્ટર મેનેજમેન્ટ અને અન્ય વિભાગોને પણ સ્ટેન્ડબાય રાખવામાં આવ્યા છે.

દક્ષિણ ગુજરાતમાં શાળાઓમાં રજા
અતિભારે વરસાદની આગાહીને પગલે નવસારી, વલસાડ અને તાપી જિલ્લાના કલેક્ટરો દ્વારા તમામ શાળાઓ અને શૈક્ષણિક સંસ્થાઓમાં રજા જાહેર કરવામાં આવી છે. વિદ્યાર્થીઓની સુરક્ષાને ધ્યાનમાં રાખીને આ નિર્ણય લેવામાં આવ્યો છે.વાલીઓને પણ બાળકોને બિનજરૂરી બહાર ન મોકલવાની અપીલ કરવામાં આવી છે.

માંગરોળ અને જાફરાબાદ બંદરે 3 નંબરનું સિગ્નલ
દરિયામાં પણ ખરાબ હવામાનની સ્થિતિને પગલે સાવચેતીના પગલાં લેવામાં આવ્યા છે. અરબી સમુદ્રમાં ઉગ્ર પવન અને ઊંચા મોજાંની શક્યતાને ધ્યાનમાં રાખીને માંગરોળ અને જાફરાબાદ બંદર પર 3 નંબરનું ભય સૂચક સિગ્નલ ફરકાવવામાં આવ્યું છે. માછીમારોને દરિયો ન ખેડવા અને જે માછીમારો દરિયામાં હોય તેઓને તાત્કાલિક સુરક્ષિત બંદરો પર પરત ફરવા સૂચના આપવામાં આવી છે.

આગામી 24 કલાક ભારે આગાહી 
હવામાન વિભાગના અનુમાન મુજબ આગામી 24 કલાક દક્ષિણ ગુજરાત માટે અત્યંત મહત્વના રહેશે. કેટલાક વિસ્તારોમાં અતિભારેથી અત્યંત ભારે વરસાદની શક્યતા છે. જો વરસાદનું જોર યથાવત રહેશે તો પૂર જેવી સ્થિતિ સર્જાવાની સંભાવના પણ વ્યક્ત કરવામાં આવી રહી છે.રાજ્ય સરકાર, જિલ્લા વહીવટી તંત્ર અને સ્થાનિક સ્વરાજ્યની સંસ્થાઓ દ્વારા સતત સ્થિતિ પર નજર રાખવામાં આવી રહી છે. બચાવ અને રાહત કામગીરી માટે તમામ વિભાગોને સતર્ક રાખવામાં આવ્યા છે. નાગરિકોને અફવાઓથી દૂર રહી માત્ર સત્તાવાર સૂચનાઓનું પાલન કરવાની અપીલ કરવામાં આવી છે.