શંકરસિંહ વાધેલા ફરી રાજનીતીમાં અજમાશે નસીબ

સ્થાનિક સ્વરાજની સંસ્થાઓની ચૂંટણી પહેલાં પૂર્વ મુખ્યમંત્રી શંકરસિંહ વાઘેલા નવા પક્ષની જાહેરાત કરશે. શંકરસિંહ વાઘેલાએ ‘પ્રજાશક્તિ ડેમોક્રેટિક પાર્ટી’ નામના પક્ષનું રજિસ્ટ્રેશન કરાવીને પાર્ટી અધ્યક્ષ તરીકે વડોદરાના પૂર્વ મેયર રાજેન્દ્રસિંહ રાઠોડની નિમણૂક કરી છે. ગાંધીનગરના પૂર્વ ડેપ્યુટી મેયર યુસુફ પરમારને મહામંત્રી અને પાર્થેશ પટેલને ખજાનચી બનાવ્યા છે. શંકરસિંહ વાઘેલાએ ગિફ્ટ સિટી નજીકના સ્થળે જૂના સમર્થકો સાથે બેઠક કરી નવા પક્ષની જાહેરાત કરવાનો નિર્ણય કર્યો છે.  

ગુજરાતમાં આગામી સમયમાં સ્થાનિક સ્વરાજની સંસ્થાઓની ચૂંટણીની જાહેરાત થનાર છે. તેવા સમયે પૂર્વ મુખ્યમંત્રી શંકરસિંહ વાઘેલાએ ‘પ્રજાશક્તિ ડેમોક્રેટિક પાર્ટી’ નામના પક્ષની જાહેરાત કરવાનો નિર્ણય કર્યો છે. શંકરસિંહની નજીકના સૂત્રોના જણાવ્યા અનુસાર આગામી 22 ડિસેમ્બરના રોજ શંકરસિંહ નવા પક્ષની જાહેરાત કરશે. ગાંધીનગરના અડાલજ નજીક સમર્થકોનું સંમેલન યોજીને ‘પ્રજાશક્તિ ડેમોક્રેટિક પાર્ટી’ ની જાહેરાત કરશે. શંકરસિંહ વાઘેલાએ ‘પ્રજાશક્તિ ડેમોક્રેટિક પાર્ટી’ નામના પક્ષનું રજિસ્ટ્રેશન કરાવીને પાર્ટી અધ્યક્ષ તરીકે વડોદરાના પૂર્વ મેયર રાજેન્દ્રસિંહ રાઠોડ, મહામંત્રી તરીકે ગાંધીનગરના પૂર્વ ડેપ્યુટી મેયર યુસુફ પરમાર અને ખજાનચી તરીકે પાર્થેશ પટેલની વરણી કરી છે.

ગિફ્ટ સિટી નજીકના સ્થળે સમર્થકોની બેઠક કરી

ગાંધીનગરના ગિફ્ટ સિટી વિસ્તારમાં શંકરસિંહ વાઘેલાએ જૂના સમર્થકો સાથે બેઠક કરી હતી. દીવાળીના સ્નેહમિલન તરીકે બેઠક ગણાવીને તેમાં નવા પક્ષની જાહેરાત અંગે ચર્ચા કરવામાં આવી હતી. જેમાં 22 ડિસેમ્બરના રોજ અડાલજ નજીક રાજકીય સંમેલન યોજીને નવા પક્ષની જાહેરાત કરવાનો નિર્ણય કરાયો હોવાનું તેમના એક સમર્થકે નામ નહી લખવાની શરતે જણાવ્યુ છે.

84 વર્ષિય શંકરસિંહ વાઘેલા પક્ષ પલટા માટે જાણીતા

શંકરસિંહ વાઘેલાનો જન્મ 21 જુલાઈ 1940ના રોજ ગાંધીનગર નજીક વાસણ ગામમાં થયો હતો. 1960ના દાયકામાં વાઘેલાએ રાજકીય સફરની શરૂઆત રાષ્ટ્રીય સ્વયં સેવક દળની રાજકીય પાંખ 'જનસંઘ'માં જોડાઈને કરી હતી. ત્યારબાદ તેઓ ભાજપમાં પ્રથમ હરોળના નેતા બન્યા હતા. પક્ષો પલટો કરવા અને પાર્ટી બનાવવા માટે જાણીતા શંકરસિંહ વાઘેલાએ 1995માં ભાજપમાં બળવો કરી રાજપા બનાવી હતી. કોંગ્રેસના ટેકાથી મુખ્યમંત્રી બન્યા બાદ 1998માં તેઓ કોંગ્રેસમાં જોડાયા હતા. 2017માં કોંગ્રેસ છોડી નવી પાર્ટી જન વિકલ્પ મોરચાની રચના કરી હતી. પરંતુ તે વર્ષે યોજાયેલી વિધાનસભા ચૂંટણીમાં એકપણ ઉમેદવાર ન જીતતા જાન્યુઆરી 2019માં તેઓ એનસીપીમાં જોડાયા હતા. એનસીપીમાં રાષ્ટ્રીય મહામંત્રી રહ્યા બાદ મહત્વ ન જળવાતા પાર્ટી છોડી દીધી હતી.

અમિત શાહ અને અખિલેશ યાદવ સાથે બેઠક કરી હતી

વર્ષ 2023ની લોકસભાની સામાન્ય ચૂંટણી બાદ શંકરસિંહ વાઘેલાએ ગૃહમંત્રી અમિત શાહ સાથે બેઠક કરી હતી. ત્યારબાદ તેઓએ લખનઉમાં સમાજવાદી પાર્ટીના અધ્યક્ષ અખિલેશ યાદવ સાથે પણ મીટીંગ કરી હતી. બંને બેઠકો અંગે માધ્યમોમાં ખાસ્સી ચર્ચા ચાલી હતી. જો કે, અન્ય પક્ષમાં જોડાવાના બદલે નવા પક્ષની જાહેરાત કરીને હાલમાં શંકરસિંહ વાઘેલાએ સૌ કોઈને ચોંકાવ્યા છે. પરંતુ, ગુજરાતના નાગરીકો શંકરસિંહ વાઘેલાના નવા પક્ષને આવકારશે કે કેમ તે બાબતે અનેક આશંકા છે.

 ઉલ્લેખનીય છે કે 14 ડિસેમ્બર આસપાસના દિવસોમાં કમુરતાની શરુઆત થવા જઈ રહી છે અને હિન્દુઓ તેમા કોઈ પણ પ્રકારના નવા કામની શરુઆત નથી કરતા, ત્યારે સૌથી મોટો સવાલ એ ઉભો થાય છે કે શંકરસિંહ વાધેલા કમુરતામાં પોતાના નવા પક્ષની આ દિવસોમાં શરુઆત કરશે, અને જો કરશે તો શું તે વર્ષોતી ચાલી આવતી માન્યતાને તોડવા માંગે છે કે પછી તેમને ખુબ જ આત્મવિશ્વાસ છે કે પછી તેઓ આ વાતથી અજાણ છે. એતો આવનારા દિવસોમાં જાણવા મળી જશે. પણ જે પણ થશે ગુજરાતની રાજનીતીમાં ચોક્કસ વળાંગ આવવાનાં અંધાણ હાત તો જોવા મળી રહ્યા છે.