Ahmedabad : ખોખરામાં અઠવાડિયામાં બીજી ઘટના, કારખાનામાં ભીષણ આગ

અમદાવાદના ખોખરા વિસ્તારમાં એક અઠવાડિયામાં બીજી વખત આગની ઘટના સામે આવી છે. અનુપમ સિનેમા નજીક આવેલા શરણમ-5 એપાર્ટમેન્ટના ચોથા માળે સી-401 નંબરના જીન્સ બનાવવાના કારખાનામાં ભીષણ આગ ફાટી નીકળી હતી. આ ઘટનાને કારણે આસપાસના વિસ્તારમાં ધુમાડો ફેલાયો, જેનાથી લોકોમાં અફરાતફરીનો માહોલ સર્જાયો. સદનસીબે, હાલ સુધી કોઈ જાનહાનિના સમાચાર નથી.   ઘટનાની જાણ થતાં ફાયર વિભાગની પાંચ ટીમો તાત્કાલિક ઘટનાસ્થળે પહોંચી અને આગ ઓલવવાની કામગીરી શરૂ કરી. આગ લાગ્યાને બે કલાકથી વધુ સમય વીતવા છતાં, 15 ફાયર ફાઇટર ગાડીઓ અને 2 લાખ લીટર પાણીનો ઉપયોગ કરવા છતાં આગ પર કાબૂ મેળવી શકાયો નથી. જીન્સના કાપડનો મોટો સ્ટોક હોવાથી આગે વધુ ભીષણ સ્વરૂપ ધારણ કર્યું છે. ડિવિઝનલ ફાયર ઓફિસર સ્વસ્તિક જાડેજાએ જણાવ્યું કે, માહિતી મળતાં જ ફાયર ટીમે તાત્કાલિક કામગીરી શરૂ કરી. બિલ્ડિંગને સમયસર ખાલી કરાવીને આગને આસપાસના કોમર્શિયલ વિસ્તારમાં ફેલાતી અટકાવવામાં આવી. જોકે, આગનું ચોક્કસ કારણ હજુ સુધી સ્પષ્ટ થયું નથી.   આ ઘટનામાં શરણમ-5ના ધાબા પર ગેરકાયદે શેડ બનાવવામાં આવ્યાનું પણ સામે આવ્યું છે, જેને લઈને તંત્ર સામે સવાલો ઉભા થયા છે. આગને કાબૂમાં લેવા ફાયર બ્રિગેડ સતત પાણીનો મારો ચલાવી રહી છે, જ્યારે પોલીસ અને એમ્બ્યુલન્સની ટીમો પણ ઘટનાસ્થળે હાજર છે, જેથી કોઈ આપત્તિજનક સ્થિતિમાં તુરંત મદદ મળી શકે.   નોંધનીય છે કે, ગત 11 એપ્રિલે પણ ખોખરા વિસ્તારના પરિષ્કાર-1 એપાર્ટમેન્ટના ચોથા માળે આગ લાગવાની ઘટના બની હતી. તે ઘટનામાં ફાયર બ્રિગેડે 18 લોકોને સુરક્ષિત બચાવ્યા હતા અને આગ પર કાબૂ મેળવ્યો હતો. આ બંને ઘટનાઓએ ખોખરા વિસ્તારમાં આગ સલામતીના મુદ્દાઓને લઈને ચિંતા વધારી છે.   આ પણ વાંચો : Ahmedabad માં બેફામ BMW નો કહેર, ઇકોને ફંગોળી, બેને ઇજા, યુવક-યુવતી ફરાર!     આપ અમારી WhatsApp ચેનલ સાથે પણ જોડાઇ શકો છો