વડોદરાની સુપ્રસિદ્ધ સરકારી સયાજી હોસ્પિટલના તબીબોએ ફરી એકવાર પોતાની કાબેલિયત પુરવાર કરી છે. ભરૂચની એક ૧૩ વર્ષીય બાળકીના ગળામાં ફસાયેલી ધારદાર પિનને અત્યંત જટિલ સર્જરી દ્વારા સફળતાપૂર્વક બહાર કાઢીને તેને નવજીવન આપ્યું છે. આ ઘટના વાલીઓ માટે અત્યંત સાવચેતી રાખવા સમાન કિસ્સો બની રહી છે.
કેવી રીતે બની ઘટના ?
ભરૂચની રહેવાસી ૧૩ વર્ષીય બાળકી જ્યારે પોતાનો હિજાબ (બુરખો) પહેરી રહી હતી, ત્યારે પિન લગાવવા માટે તેણે વધારાની પિન મસ્તીમાં મોંમાં દબાવી રાખી હતી. અચાનક અજાણતામાં આ પિન તેના ગળામાં ઉતરી ગઈ હતી. પિન ગળી જવાની સાથે જ બાળકીને શ્વાસ લેવામાં ગંભીર તકલીફ થવા લાગી હતી અને તેનું શરીર પડવા લાગ્યું હતું. ગભરાયેલા પરિવારજનોએ તાત્કાલિક તેને ભરૂચની સ્થાનિક હોસ્પિટલમાં સારવાર અપાવી હતી, પરંતુ સ્થિતિ ગંભીર હોવાથી તેને વડોદરા રીફર કરવામાં આવી હતી.
૪ સેન્ટીમીટર લાંબી પિન અને જટિલ સર્જરી :&nbsp;
સયાજી હોસ્પિટલના ઇમરજન્સી વિભાગમાં લાવવામાં આવ્યા બાદ એક્સ-રે અને અન્ય તપાસમાં જાણવા મળ્યું કે, ૪ સેન્ટીમીટર જેટલી લાંબી પિન શ્વાસનળીમાં ઊંડે સુધી ફસાઈ ગઈ હતી. શ્વાસ રુંધાવાને કારણે બાળકીના જીવન પર મોટું જોખમ હતું. ENT (કાન-નાક-ગળા) વિભાગના નિષ્ણાત તબીબોની ટીમે સમય સૂચકતા વાપરી તાત્કાલિક ઓપરેશનનો નિર્ણય લીધો હતો. આશરે અડધા કલાક સુધી ચાલેલી આ જટિલ સર્જરીમાં 'બ્રોન્કોસ્કોપી' પદ્ધતિનો ઉપયોગ કરીને શ્વાસનળીને નુકસાન પહોંચાડ્યા વગર પિનને સુરક્ષિત રીતે બહાર કાઢવામાં આવી હતી.
વાલીઓ માટે લાલબત્તી સમાન કિસ્સો :&nbsp;
સયાજી હોસ્પિટલના રેકોર્ડ મુજબ, છેલ્લા એક વર્ષમાં આ પ્રકારનો આ ત્રીજો કિસ્સો છે જેમાં બાળકના ગળામાં જોખમી વસ્તુઓ ફસાઈ હોય. તબીબોએ આ ઘટના બાદ વાલીઓને ખાસ અપીલ કરી છે કે, નાના બાળકોને પિન, સિક્કા, બટન કે સોય જેવી નાની અને અણીદાર વસ્તુઓથી દૂર રાખવા જોઈએ. આવી વસ્તુઓ મોંમાં રાખવાની આદત જીવલેણ સાબિત થઈ શકે છે.
હાલમાં આ બાળકીની તબિયત સુધારા પર છે અને તે ખતરાની બહાર છે. સયાજી હોસ્પિટલના તબીબોની આ સફળતાની ચારેતરફ પ્રશંસા થઈ રહી છે.&nbsp;

સયાજી હોસ્પિટલ સફળ સર્જરી

ભરૂચની ૧૩ વર્ષીય બાળકીએ મોંમાં રાખેલી પિન ગળી જતા સર્જાયા શ્વાસ રુંધાવાના દ્રશ્યો

March 24, 2026 | 15:43 IST