અમદાવાદના નિકોલ વિસ્તારમાં આવેલા ખોડલધામ ગ્રાઉન્ડ ખાતે આજે સૌરાષ્ટ્ર લેઉવા પટેલ સમાજ દ્વારા એક ભવ્ય મહાસંમેલનનું આયોજન કરવામાં આવ્યું હતું. આ કાર્યક્રમનો મુખ્ય હેતુ સમાજની એકતા પ્રદર્શિત કરવાનો અને નવનિયુક્ત ગુજરાત ભાજપ પ્રદેશ પ્રમુખ જગદીશ વિશ્વકર્મા સહિત સમાજના મંત્રીઓનું સન્માન કરવાનો હતો. આ પ્રસંગે કેન્દ્રીય મંત્રી મનસુખ માંડવીયા, નાયબ મુખ્યમંત્રી હર્ષ સંઘવી, મંત્રી કૌશિક વેકરિયા અને વલ્લભભાઈ કાકડિયા જેવા દિગ્ગજ નેતાઓ ઉપસ્થિત રહ્યા હતા. કાર્યક્રમ દરમિયાન વક્તાઓએ સૌરાષ્ટ્ર લેઉવા પટેલ સમાજના યુવાનો અને દીકરા-દીકરીઓના ઉજ્જવળ ભવિષ્ય માટે શિક્ષણ અને સંસ્કારના મહત્વ પર વિશેષ ભાર મૂક્યો હતો.
પાટીદાર સમાજને અપીલ
ગૃહમંત્રી હર્ષ સંઘવીએ આ સંમેલનમાં અત્યંત માર્મિક અને સામાજિક સંદેશ આપતા પાટીદાર સમાજને એક મહત્વની અપીલ કરી હતી. તેમણે જણાવ્યું હતું કે, જે સંતાનોએ પોતાના વૃદ્ધ માતા-પિતાને વૃદ્ધાશ્રમમાં મૂક્યા હોય, તેવા લોકો પાસેથી સૌરાષ્ટ્ર લેઉવા પટેલ સમાજના ટ્રસ્ટોએ એક પણ રૂપિયાનું ફંડ લેવું જોઈએ નહિ અને તેમને કોઈ પણ સામાજિક કાર્યક્રમમાં સ્ટેજ પર બેસાડવા જોઈએ નહિ. સંઘવીએ ભાર પૂર્વક કહ્યું કે, સમાજમાં વૃદ્ધાશ્રમોને તાળા કેવી રીતે લાગે તે દિશામાં આપણે સૌએ કામ કરવાનું છે. આ સાથે જ તેમણે વ્યાજખોરો અને ગુંડા તત્વો સામે કડક કાર્યવાહી કરવાની ખાતરી આપી નાગરિકોની સુરક્ષાનો વિશ્વાસ અપાવ્યો હતો.
100 કરોડ રૂપિયાનું ભંડોળ એકત્ર કરવાનું લક્ષ્ય
શિક્ષણ ક્ષેત્રે સમાજની પ્રગતિ અંગે વાત કરતા પૂર્વ મંત્રી વલ્લભભાઈ કાકડિયાએ જાહેરાત કરી હતી કે, સૌરાષ્ટ્ર લેઉવા પટેલ સમાજ દ્વારા શિક્ષણના ઉમદા હેતુ માટે 100 કરોડ રૂપિયાનું ભંડોળ એકત્ર કરવાનું લક્ષ્ય છે. આ માટે 200 જેટલા મોટા દાતાઓને જોડીને આર્થિક રીતે નબળા વિદ્યાર્થીઓને સહાય કરવામાં આવશે. ખાસ કરીને ગામડાઓમાંથી અમદાવાદ અભ્યાસ માટે આવતા દીકરા-દીકરીઓ માટે રહેવાની અને હોસ્ટેલની સુવિધા ઊભી કરવામાં આવશે. ગુલબાઈ ટેકરા ખાતે નિર્માણ પામી રહેલી કન્યા છાત્રાલય આ દિશામાં એક મોટું કદમ છે તેમ તેમણે જણાવ્યું હતું. આ કાર્યક્રમના સફળ આયોજન બદલ તેમણે યુવા કાર્યકર્તાઓની પીઠ થાબડી હતી.
યુવાનો વ્યસન અને કુટેવોથી દૂર રહે તેવી અપેક્ષા
રાજ્ય કક્ષાના કાયદા મંત્રી કૌશિક વેકરિયાએ આજના ડિજિટલ યુગમાં વાલીઓને ચેતવતા કહ્યું હતું કે સોશિયલ મીડિયાના અતિરેક વચ્ચે સંતાનો ગેરમાર્ગે ન દોરાય તેનું ધ્યાન રાખવું એ આપણી નૈતિક જવાબદારી છે. તેમણે જણાવ્યું કે આપણે દીકરા-દીકરીઓને જરૂરી છૂટછાટ આપીએ છીએ, પરંતુ તેઓ સોશિયલ મીડિયાના કારણે કોઈ ખોટા રસ્તે ન ચઢી જાય તેનું સતત મોનિટરિંગ કરવું જરૂરી છે. સૌરાષ્ટ્ર લેઉવા પટેલ સમાજના યુવાનો વ્યસન અને કુટેવોથી દૂર રહીને રાષ્ટ્ર નિર્માણમાં ફાળો આપે તેવી તેમણે અપેક્ષા વ્યક્ત કરી હતી.
શિક્ષણ અને સામાજિક ક્રાંતિ દ્વારા નવી રાહ ચીંધાશે
સામાજિક સમરસતા અને વસ્તી સંતુલન અંગે હાસ્ય કલાકાર મનસુખ વસોયાએ પોતાની લાક્ષણિક શૈલીમાં મહત્વની ટકોર કરી હતી. તેમણે પાટીદાર સમાજને 'અમે બે અને અમારો એક' ના બદલે 'અમે બે અને અમારા બે' ની નીતિ અપનાવવા વિનંતી કરી હતી જેથી સમાજની સંખ્યા અને શક્તિ જળવાઈ રહે. તેમણે સરદાર પટેલના વિચારોને યાદ કરી ઘરની વાત ઘરમાં રાખવા અને અન્યાય સામે હંમેશા એક થઈને લડવા આહવાન કર્યું હતું. આ મહાસંમેલન સાબિત કરે છે કે, સૌરાષ્ટ્ર લેઉવા પટેલ સમાજ આગામી સમયમાં શિક્ષણ અને સામાજિક ક્રાંતિ દ્વારા રાજ્યમાં એક નવો રાહ ચીંધશે.

સૌરાષ્ટ્ર લેઉવા પટેલ સમાજ

મહાસંમેલનમાં શિક્ષણ માટે 100 કરોડનું ભંડોળ એકત્ર કરવા હાકલ કરી

December 29, 2025 | 01:02 IST