વડોદરામાં અધૂરુ પેચ વર્ક કરીને રસ્તો ખુલ્લો કરી દેવાતા ખાડામાં રિક્ષા ખાબકી, ચાલકનું મોત

વડોદરા શહેરના વિકાસના કામોમાં શિથિલતા અને બેદરકારીનો વધુ એક જીવલેણ દાખલો સામે આવ્યો છે. સરદાર એસ્ટેટથી વૃંદાવન તરફ જતા માર્ગ પર પાણીની લાઈન શિફ્ટિંગ બાદ રોડનું અધૂરું પેચવર્ક કરીને રસ્તો ખુલ્લો મુકાઈ જતા એક 38 વર્ષીય રિક્ષાચાલક યુવકનું દુઃખદ મોત થયું છે. મૃતકની ઓળખ અનિલભાઈ ઠાકોરભાઈ વસાવા તરીકે થઈ છે.

વિસ્તારમાં ચાલી રહેલા બ્રિજ અને પાણી લાઈનના કામે રોડ ખોદાયા બાદ યોગ્ય રીતે સમારકામ ન કરવામાં આવતા રસ્તામાં થયેલા ખાડામાં અનિલભાઈની રિક્ષા વહેલી સવારે પલટી ખાઈ ગઈ હતી. ઘટનાસ્થળે જ તેમનું મૃત્યુ નિપજ્યું હતું, જેના કારણે તેમના પરિવારમાં શોકની લાગણી છવાઈ ગઈ છે.

 

દુર્ઘટના થયા બાદ થોડા જ કલાકોમાં મહાનગરપાલિકા દોડતી થઈ ગઈ હતી અને ખાડા ભરવાનું કામ તાત્કાલિક ધોરણે શરૂ કર્યું હતું. જોકે, આ ઘટનાની જવાબદારી લેવાય તે પહેલા જ પાણી પુરવઠા વિભાગના અધિકારીએ આશ્ચર્યજનક અને અસંવેદનશીલ નિવેદન આપ્યું હતું કે, "પેચવર્ક બાકી હતું, વાહનચાલકોએ ધ્યાન રાખવું જોઈએ."

 

સ્થાનિક રહીશો અને સામાજિક કાર્યકરો આ નિવેદન સામે નારાજગી વ્યક્ત કરી રહ્યા છે અને માગ કરી રહ્યા છે કે જવાબદાર અધિકારીઓ સામે કડક કાર્યવાહી કરવામાં આવે.

દર વર્ષે ચોમાસામાં આવાં અકસ્માતો સામે આવતા હોવા છતાં પાલિકા દ્વારા રસ્તાઓની જાળવણી અને સુરક્ષા સંબંધિત નીતિમાં કોઈ ખાસ સુધારો થતો દેખાતો નથી. આ ઘટનાએ ફરી એકવાર અધિકારીઓની બેદરકારી અને તંત્રની પોલ ખોલી નાખી છે.

આ પણ વાંચો---

Vadodara : સાવલી નગરપાલિકાએ 'બુદ્ધિના પ્રદર્શન' કરી જનતાના રૂપિયા કડવામાં ભેળવ્યા...